Qaraqalpaqstan Respublikası Ádillik ministrligi tárepinen 2022-jıldıń 1-yarım jıllıǵı dawamında ámelge asırılǵan jumıslar.
Qaraqalpaqstan Respublikası Ádillik ministrligi tárepinen 2022-jıldıń 1-yarım jıllıǵı dawamında ámelge asırılǵan jumıslar.
Ministrlik hám rayon (qala) ádillik bólimleri tárepinen ótken dáwir dawamında 7 102 xatlar hám basqa hújjetlerdiń orınlanıwı támiyinlendi.
Fizikalıq hám yuridikalık shaxslardan 3 344 múrájatları kelip túsip, usınnan 2 406 múrájat, yaǵnıy 72 payızı qanaatlanǵan.
Ádillik ministrligine kelip túsken múrájatlardıń basım kópshiligi miynet, sociallıq qorǵaw, jer ajıratıw hám de basqa da máseleler menen baylanıslı bolıp esaplanadı.
Puqaralardıń huqıqların tiklew maqsetinde, sudlarǵa jámi 8 mlrd. 399 mln sumlıq 2264 dawa arzalar kirgizilip, usınnan 8 mlrd. 317 mln.sumlıq 2162 dawa arzalar qanaatlanǵan bolsa, 102 dawa arzalar kórip shıǵılmaqta.
Ministrlik tárepinen mámleketlik uyımları hám shólkemlerde nızamshılıq normalarınıń durıs qollanılıwı ústinen turaqlı ráwishte monitoring jumısları alıp barılmaqta. Usınıń nátiyjesinde 2022-jıldıń 1-yarım jıllıǵı dawamında mámleketlik uyımları hám shólkemleri tárepinen 103 404 jaǵdayda nızambuzılıwına jol qoyılǵanlıǵı anıqlandı.
Atap aytqanda, 1 339 mámleketlik uyımları hám shólkemlerde úyreniwler ótkerilip, anıqlanǵan nızambuzılıwı jaǵdayların saplastırıw maqsetinde, 1 277 usınıslar, usınnan hákimshilik juwapkershilikke tartıw boyınsha 403, jınayıy juwapkershilikke tartıw boyınsha 7 usınıslar hám de 1 747 eskertiwler kiritildi.
Tásir sharaları nátiyjelerine kóre, mámleketlik uyımları hám shólkemleriniń 320 lawazımlı shaxsları hám juwapker xızmetkerleri hákimshilik juwapkershilikke, 1 shaxs jınayıy juwapkershilikke tartıldı.
Kiritilgen usınıslarǵa tiykar, puqaralarımızdıń 2 mlrd 682 mln swmlıq pul qarjıları qaytarıldı hám tólep berildi.
Anıqlanǵan nızambuzıwshılıq jaǵdayları mekemeler kesiminde tallawdan ótkerilgende basım kópshilik bólimin bilimlendiriw mekemelerinde 43 749 (42 %), miynetti qorǵaw shólkemlerinde 9174 (8%), den-sawlıqtı saqlaw shólkemlerinde 2454 (2%), social támiynat mákemelerinde 1503 ti nızam buzıw jaǵdayları quraydı.
Ministrlik sisteması tárepinen jańadan qabıl etilgen normativ-hújjetlerdi orınlawshılarǵa óz waqtında jetkerip beriw, xalıq penen tıǵız baylanıstı támiyinlew, olardıń mashqalaların úyreniw hámde huqıqıy másláhat beriw maqsetinde 2022-jıldıń 1-yarım jıllıǵı dawamında 15 901 úgit-násiyat jumısları ámelge asırıldı. Usınnan, 7 761 ǵalaba xabar quralları arqalı, 7 566 awızeki hámde 574 kórgizbeli hám jazba huqıqıy úgit násiyat jumısları bolıp esaplanadı.
Sonday-aq, 142 advokatlıq byuroları, 6 advokatlıq firmaları hámde 2 advokatlaıq kollegiyaları mámleketlik dizimnen ótkerildi.
Ministrlik tárepinen jámi 602 mámleketlik emes kommerciyalıq emes shólkemleri dizimnen ótkerilgen bolsa, usınnan 411 mámleketlik diziminen, 191 esap diziminen ótkerildi.
Bunnan tısqarı, búgingi kúnde 66 diniy shólkemler dizimge alınǵan.
Házirgi waqıtta mámleketlik emes kommerciyalıq emes hám diniy shólkemlerge xızmetler tolıq elektron formada, insan faktorısız tolıq ámelge asırılıwı engizildi.
Xalqımızǵa 127 mıńnan artıq notarial xızmetler kórsetilip, 25 mlrd swmnan artıq mámleketlik bajı pulları óndirildi.
Ózbekstan Respublikası “Mediaciya haqqında”ǵı Nızam talaplarına tiykar, ministrlik tárepinen mediatorlardı tayarlaw arnawlı oqıw kursların tamamlaǵan jámi 56 jeke ámeliyat penen shuǵıllawshı notariuslar professional mediatorlar reestrine kiritildi.
Mámleketlik xızmetlerin kórsetiw sistemasında ámelge asırılıp atırǵan reformalar nátiyjesinde xalıqqa hámde isbilermenlik subektlerine qolay hám tez mámleketlik xızmetlerdi usınıwdıń zamanagóy infradúzilmesi jaratıldı.
Búgingi kúnde qala hám rayonlarda 17 mámleketlik xızmetleri orayları hám de olardıń alıs aymaqlarında jaylasqan 8 filialları iskerlik kórsetip kiyatırǵan bolıp, olar arqalı fizikalıq hám yuridikalıq shaxslarǵa sapalı mámleketlik xızmetleri kórsetilip kelinbekte.
Alıs aymaqlardaǵı puqaralar ushın “Mobil mámleketlik xızmetlerin” kórsetiw maqsetinde, 2 arnawlı avtobus hámde 16 damas xızmet avtomashinaları menen támiyinlenip, olar tárepinen usı jıldıń 6 ayı dawamında 24 mıńnan aslam xızmetler kóshpeli tártipte kórsetilgen.
Búgingi kúnge shekem oraylar hám de olardıń 8 filialları arqalı fizikalıq hám yuridikalıq shaxslarǵa jámi 3 mln 250 mıńnan aslam xızmetler kórsetildi.
Rayon (qala) PHAJ bólimleri tárepinen arxivlerde qaǵaz kórinisinde saqlanǵan 3 mln. 700 mıńnan artıq akt jazıwları “PHAJdıń birden-bir elektron arxivi” málimleme sistemasına kiritilip, sanlastırılıwı támiyinlendi.
2022-jıldıń 1-yarım jıllıǵı dawamında 31 mıń 984 akt jazıwları dizimge alındı. Usınnan, tuwılǵanlıqtı dizimge alıw 18 955, nekeni dizimge alıw 7316, nekeden ajırasqanlıq 1045, ólimdi dizimge alıw jaǵdayı 4668 di quraydı.
Alıp barılǵan túsindiriw jumısları nátiyjesinde ózleriniń jeke brendlerin jaratıwǵa qızıǵıwshılıq bildirgen 31 isbilermenlik subektlerine jańadan brendlerin jaratıwda hámde mámleketlik dizimge alınıwında qollap-quwatlandı.
Qaraqalpaqstan Respublikası Ádillik ministrligi.