Янгиликлар
15
Xojalıq gaz ballonların alıw tártibi ápiwayılastırıldı
Ózbekstan Respublikası ministrler Kabinetiniń 2026-jıl 17-apreldegi “Turar jay shańaraqların xojalıq gaz ballonları menen támiyinlewde mámleketlik xızmetin kórsetiwdiń hákimshilik reglamentin tastıyıqlaw haqqındaǵı”qararı menen tábiyiy gaz menen gazlastırılmaǵan turar jay shańaraqların xojalıq gaz ballonları menen támiyinlewdiń jańa tártibi belgilendi.
2026-jıl 1-iyunnan baslap fizikalıq shaxslarǵa xojalıq gaz ballonların usınıw xızmeti tek Mámleketlik xizmetler orayları yamasa Birden-bir ınteraktiv mámleketlik xizmetler portalı (YIDXP) arqalı kórsetiledi.
Arza beriwshi Mámleketlik xizmetler orayına barıp arza beriwi yamasa YIDXP arqalı elektron túrinde arza tapsırıw múmkin. Xızmet ushın jıynım pul óndirilmeydi.
Arza wákillikli operatorǵa jiberilgenen keyin:
• maǵlıwmatlar “E-gaz” programmasına kiritiledi;
• bir jumıs kúni ishinde arzadaǵı maǵlıwmatlar tekseriledi;
• ush jumıs kúninde arza jayına shıǵıp uyreniledi;
• talaplar orınlanǵanda shártnamalar rásmiylestiriledi;
• xojalıq gaz ballon 10 jumıs kúni ishinde biypul jetkezip beriledi.
Arza tómendegi jaǵdaylarda biykar etiliwi múmkin:
• arza tolıq toltırılmaǵan bolsa;
• kórsetilgen maǵlıwmatlar tastıyıqlanbasa;
• shańaraqqa aldın xojalıq gaz ballonı berilgen bolsa hám qosımsha balon soralsa;
• gaz plita ámelde bolmasa yamasa asxana texnikalıq talaplarǵa juwap bermese.
Eger bir úyde eki yamasa onnan artıq shańaraq jasasa hám hár bir shańaraq ushın bólek yamasa ulıwma texnikalıq talaplarǵa sáykes gaz plita hám de asxana bolsa, hár bir shańaraqqa birewden balon ajratılıwı múmkin.
Qarar menen xojalıq gaz ballonları hám suyıltırılǵan gaz qarıydarlarınıń esabın jurgiziwshi “E-gaz” avtomatlastırılǵan sistemasın rawajlandırıw da názerde tutılǵan. Sistema arqalı maǵlıwmatlardı elektron túrinde qabıllaw, saqlaw, jańalaw hám ulıwmalastırıw processleri ámelge asıriladı.
Usı qarar xalıqqa xojalıq gaz ballonların alıw xızmetinen aralıqtan hám elektron túrinde paydalanıw imkaniyatların keńeytiwge qaratılǵan.
Nókis qalası ádillik bólimi
Mámleketlik xizmetler orayi bólim basliǵi B.Nurlibekov