Янгиликлар
30
Mayıplıǵı bolǵan shaxslardıń miynetin huqıqıy jaqtan tártipke salıw haqqında
Házirgi kúnde mayıplıǵı bolǵan shaxslardıń bántligin támiynlew maqsetinde olardı jumısqa ornalastırıw ushın bir qansha ilájler islep shıǵılmaqta. Atap aytqanda, “Xalıq bántligi haqqında” Ózbekstan Respublikası Nızamına muwapıq belgilengen is orınlarınıń eń kem sanı esabınan qosımsha bos turǵan jumıs orınlarına jergilikli miynet uyımlarınıń jollamasına tiykar jumısqa ornalastırıw kepillenedi.
Bunnan tısqarı 2020-jıl 22-iyulde Nızamshılıq palatası tárepinen “Mayıplıǵı bolǵan shaxslardıń huqıqları haqqında” Nızamı qabıl etilgen. Onıń 7-babı “Mayıplıǵı bolǵan shaxslardıń bántligi haqqında” bolıp, bul boyınsha olar ádettegi miynet sháráyatları shólkemlestirilgen mekemelerde, cexlarda hám uchastkalarda islewge,sonday-aq nızamshılıqta qadaǵalanbaǵan jeke tártiptegi miynet iskerligi yáki basqa iskerlikti ámelge asırıwǵa haqılı.
Miynet qatnasıqlarınıń bárshe formalarına qarata, atap aytqanda jumısqa qabıllaw shártlerine, jumısqa jallawǵa, miynet iskerligin ámelge asırıwǵa, jumısın saqlap qalıwǵa, xizmette (jumısta) lawazım boyınsha kóteriliwge, sonday-aq qáwipsiz miynet shárayatların támiynlewge qarata mayıplıq belgisine kóre kemsitiw qadaǵalanadı.
Mayıplıǵı bolǵan shaxslardıń miynet haqqındaǵı nızamshılıqta názerde tutılǵan waqtınsha miynetke jaramsızlıǵı hám dem alıslarda bolıw dáwirinde jumıs beriwshiniń baslaması menen miynet shártnamasın biykarlawǵa jol qoyılmaydı, bul jaǵdayǵa shólkem iskerligi tolıq toqtatılǵan jaǵdaylar kirmeydi.
Mayıplıǵı bolǵan shaxslardıń túngi waqıtta, sonday-aq nızamshılıqta belgilebegen jaǵdaylardan basqa jumıstan tısqarı waqıtta hám dem alıs kúnleri jumısqa shaqırılıwǵa jol qoyılmaydı.
I hám II topar nágiranlıǵı bolǵan islewshi shaxslarǵa qarata miynetke haqı tólew muǵdarı kemeytirilmegen halda qısqartılǵan is waqtı dawamlılıǵı belgilenedi hám miynet haqqındaǵı nızamshılıqqa muwapıq hár jılǵı tiykarǵı uzayttırılǵan dem alıs beriledi.
Mámleket mayıplıǵı bolǵan shaxslardı jumısqa jaylastırıw hám olardıń bántligin támiynlew, sonday-aq miynet bazarında olardıń básekiles ekenligin asırıw maqsetinde mayıplıǵı bolǵan shaxslardı kásiplik reabilitaciya qılıwdı ámelge asıradı, olardı miynette gúzetip baradı, sonday-aq olardıń mas keletuǵın jumısqa kiriwin, saqlap qalıwın hám óz jumısında lawazım boyınsha kóteriliwin támiynleydi.
Mayıplıǵı bolǵan shaxslardıń miynetke tiyisli jeke tártiptegi huqıqıy qatnasıqlarda basqa xizmetkerler sıyaqlı huqıqlarǵa iye. Is waqtı, miynet dem alısları hám basqa miynet shárt-shárayatları barısında ózleri ushın nızamshılıqta, sonday-aq miynet haqqındaǵı basqa huqıqıy hújjetlerde belgilengen qosımsha jeńilliklerden paydalanadı.
Nókis rayonı ádillik bólimi
Mámleketlik xızmetler orayı baslıǵı A.Nızamatdinov