Янгиликлар
15
Ádillik járdemi menen 36 806 196 sum muǵdarındaǵı pul kompensaciyası óndirip berildi
Xojeli rayonı ádillik bólimine puqaralar B.Seydametov B.Djanabayev, B.Allaniyazov, J.Saparov, A.Ibragimova, T.Kamalov, A.Ibragimovlar Xojeli rayonındaģı máhállelerde baslıq bolıp islegenligi, bıraqta Ózbekstan Mahalleleri awqamınıń Xojeli rayonlıq bólimi tárepinen paydalanılmaģan bárshe tiykarģı hám qosımsha dem alıs pulları tólep berilmegenliginen narazı bolıp qılģan múrájatı kelip tústi.
Qarızdarlıqtı saplastırıw maqsetinde Ózbekstan Respublikası máhálleleri awqamına qarjı ajıratıw boyınsha xat jiberilgenligi málim etilgen, bıraqta qarızdarlıq saplastırılmaģanlıģı anıqlandı.
Ózbekstan Respublikası Miynet kodeksiniń Kodekstiń 172-statyasına kóre miynet shártnaması biykar etilgende xızmetker menen esap-kitap qılınıwı kerekligi belgilengen. Esap-kitap xızmetkerge aqırına shekem alınbaģan is haqını, xızmetker tárepinen paydalanılmaģan barlıq tiykarģı hám qosımsha dem alıslar ushın kompensaciyalardı, eger miynet haqqındaģı nızamshılıqta yaki miynet haqqındaģı basqa huqıqıy hújjetlerde yaki miynet shártnamasında basqa tólemlerdi tólew názerde tutılģan bolsa, usı tólemlerdi tólewdi óz ishine aladı.
Jumıs beriwshi tárepinen xızmetkerge tiyisli bolģan barlıq summalardı tólew xızmetker menen miynet shártnaması biykar etilgen kúni ámelge asırıladı dep kórsetilgen.
Sonıń menen birge, Kodekstiń 333-statyasına muwapıq, jumıs beriwshi is haqını, dem alıs tólemlerin, miynet shártnaması biykar etilgendegi tólemlerdi hám (yamasa) xızmetkerge tóleniwi kerek bolģan basqa da tólemlerdi tólew múddetin buzģan jaģdayda, olardı tólew múddetinen keyingi kúnnen baslap haqıyqıy esap-kitap qılınģan kúndi óz ishine alģan múddetke shekem hár bir keshiktirilgen kún ushın Ózbekstan Respublikası Oraylıq bankiniń sol waqıtta ámelde bolģan qayta qarjılandırıw stavkasınan kelip shıqqan halda procentler (pullı kompensaciya) menen birge tólewi shártligi belgilengen.
Xojeli rayonı ádillik bólimi tárepinen puqaralar B.Seydametov B.Djanabayev, B.Allaniyazov, J.Saparov, A.Ibragimova, T.Kamalov, A.Ibragimovlardıń mápin gózlep Puqaralıq isleri boyınsha Nókis rayonlararalıq sudına dawa arza kiritildi.
Nátiyjede Juwapkerden dawagerler paydasına paydalanılmaģan bárshe tiykarģı hám qosımsha dem alıslar ushın jámi 23 318 259 sum muģdarındaģı qarızdarlıq hám de Ózbekstan Respublikası Miynet kodeksiniń 333-statyasına tiykar esaplanģan qarızdarlıq ushın hár bir keshiktirilgen kúnge jámi 36 806 196 sum muģdarındaģı pullı kompensaciya óndirip berildi.
Xojeli rayonı ádillik bólimi baslıģı A.Ixlasov