Янгиликлар
11
Xalıqaralıq sertifikat iyeleri ushın jańa imkaniyat: imtixan qárejetleri mámleket tárepinen qaplanadı
Ózbekstan Respublikasında jaslardı qollap-quwatlaw, olardıń bilim hám potencialın xoshametlew maqsetinde áhmiyetli mexanizmlerden biri engizilgen. Ministrler Kabinetiniń 2021-jıl 13-apreldegi 209-sanlı qararına muwapıq, xalıqaralıq imtixan sistemaları boyınsha joqarı nátiyje kórsetken jaslarǵa imtixan tapsırıw qárejetleri tolıq qaplap beriledi.
Bul qarar Ózbekstan Respublikası Prezidentiniń jaslardı qollap-quwatlawǵa qaratılǵan baslamalarınıń orınlanıwın támiyinlew hám de xalıqaralıq dárejedegi bilim hám kónlikpelerdi iyelewge umtılıp atırǵan jaslardı xoshametlew maqsetinde qabıl etilgen.
Qararǵa bola, imtixan tapsırıw waqtında 31 jasqa tolmaǵan Ózbekstan Respublikası puqaraları hám mámleketimizde turaqlı jasawshı puqaralıǵı bolmaǵan shaxslar xalıqaralıq imtixanlarda belgilengen joqarı nátiyjelerdi qolǵa kirgizgen jaǵdayda, jumsalǵan qarjıların qaytarıp alıw huqıqına iye boladı.
Imtixan qárejetlerin kompensaciyalaw wazıypası Ózbekstan Respublikası Jaslar isleri agentligine júklengen. Arzalar Mámleketlik xızmetler orayları yamasa Birden-bir interaktiv mámleketlik xızmetler portalı arqalı qabıl etiledi. Puqaralar arnawlı sertifikat hám tólem kvitanciyasın elektron túrde usınıwı kerek.
Qararǵa muwapıq, inglis tili boyınsha IELTS imtixanınan keminde 7 ball, TOEFL iBT imtixanınan keminde 94 ball, SAT imtixanınan keminde 1200 ball toplaǵan jaslar kompensaciya alıw huqıqına ie. Sonday-aq, GRE, GMAT hám Cambridge Assessment English sertifikatları boyınsha da belgilengen joqarı nátiyjeler ushın qárejetler qaplanadı.
Bunnan tısqarı, nemis, francuz, ispan, italyan, túrk, koreys, yapon, qıtay, arab hám rus tilleri boyınsha xalıqaralıq sertifikatlardı qolǵa kirgizgen jaslar da kompensaciya alıw imkaniyatına ie. Sonıń ishinde, Goethe-Certifikat boyınsha C1, TOPIK boyınsha 5-dáreje, JLPT boyınsha N2, HSK boyınsha 5-dáreje hám basqa da joqarı nátiyjeler usı baǵdarlama sheńberinde qollap-quwatlanadı.
Kompensaciya alıw ushın áhmiyetli shártlerden biri - sertifikat berilgen kúnnen baslap 180 kalendar kún ishinde múrájat etiw. Jaslar isleri agentligi sertifikatlardıń haqıyqıylıǵın tekseredi hám tastıyıqlanǵan jaǵdayda kompensaciya qarjıları puqara tańlaǵan Xalıq banki filialı arqalı tólep beriledi.
Bul sistema jaslardıń shet tillerin úyreniwge bolǵan qızıǵıwshılıǵın arttırıw, olardı xalıqaralıq bilimlendiriw hám miynet bazarında básekige shıdamlı kadrlar sıpatında qáliplestiriwge xızmet etpekte. Eń áhmiyetlisi, xalıqaralıq sertifikat alıw ushın jumsalǵan qarjılardıń qaytarılıwı jaslar ushın qosımsha xoshamet hám finanslıq járdem wazıypasın atqarmaqta.
Qánigelerdiń pikirinshe, bul mexanizm tek ǵana jaslardıń bilim dárejesin arttırıwǵa emes, al mámlekette xalıqaralıq standartlarǵa sáykes maman kadrlardıń sanın kóbeytiwge de xızmet etedi.
Nókis qalası ádillik bólimi
Mámleketlik xizmetler orayi bas qanigesi G.Allambergenova