Янгиликлар
08
Joqarı, orta arnawlı kásip-óner hám professional bilim alǵanlıq haqqındaǵı mámleketlik nusqadaǵı hújjetlerdiń dublikatın alıw tártibi
Bilim alǵanlıq haqqındaǵı hújjetler (diplom, attestat) hár bir puqaranıń turmısında áhmiyetli orın tutadı. Biraq, hár túrli jaǵdaylar sebapli bul hújjetler joǵalıwı, jaramassız bolıp qalıwı yamasa hámme maǵlıwmatlar durıs kórsetilmegen bolıwı múmkin. Sonday jaǵdaylarda puqaralar óz diplomlarınıń dublikatın (nusqasın) qalay alıwı múmkin.
Hújjet kórsetiw tártibi qanday?
Búgingi kúnde mámleketimizde bilimlendiriw salasında engizilip atırǵan sanlılastırıw processi bul baǵdardı da ápiwayılastırdı. Házirgi waqıtta joqarı, orta arnawlı kásip-óner hám professional bilim alǵanliq haqqındaǵı hújjetlerdiń dublikatın alıw mámleketlik xızmetler arqalı ámelge asırıladı.
Puqaralar dublikat alıw ushın tómendegi eki usıldıń birinen paydalansa boladı:
Mámleketlik xızmetler orayına (MXO) ózi barǵan halda arza tapsırıw.
BIMXP (my.gov.uz) arqalı onlayn múrájat etiw.
Arza beriwshi ózi menen birge tómendegilerdi tayarlap qoyıwı kerek:
Puqaranıń pasportı yamasa ID-kartası maǵlıwmatları;
Joǵalǵan hújjettiń seriyası hám nomeri (eger saqlanıp qalǵan bolsa, ápiwayı nusqası);
Hújjet jaramassız bolıp qalǵan jaǵdayda – sol hújjettiń ózi (tıkarǵı nusqası);
Familiyası, atı yamasa ákesiniń atı ózgergenligi sebebi menen almastıp atırģan bolsa – bul jaǵdaydı tastıyıqlawshı hújjet (mısalı, nekedan ótkenlik haqqında gúwalıģı qızlar familiyasın ózgertkende).
Burınǵı tártipler boyınsha gazetaǵa daģaza beriw yamasa sud arxivlerinen maǵlıwmatnama alıw sıyaqlı artıqsha májburiyatlar házirgi kúnde talap etilmeydi.
Mámleketlik xızmet kórsetilgeni ushın belgilengen muǵdarda jıyın óndieiledi (my.gov.uz arqalı tapsırılsa, 10 payızlıq shegirme bar).
Arza tapsırılǵannan soń, tiyisli bilimlendiriw shólkemi (joqarı oqıw ornı, kolledj yamasa texnikum) maǵlıwmatlardıń haqıyqatlıǵın tekseredi hám belgilengen múddet ishinde jańa dublikattı tayarlap beredi. Dublikat hújjet óziniń yuridikalıq kúshi boyınsha tiykarǵı (joǵalǵan) hújjet penen bir qıylı esaplanadı.
Hújjet tapsırıwda nege itibar beriw kerek?
Eger bilimlendiriw shólkemi saplastırılǵan (reorganizaciya etilgen yamasa jabılǵan) bolsa, bul jaǵdayda múrájatlar tiyisli joqarı shólkemge yamasa mámleketlik arxivlerge jiberiledi. Sonday-aq, arzada oqıw ornınıń atı, oqıǵan jılları hám qániygeligi anıq kórsetiliwi process tezlesiwine járdem beredi.
Zamanagóy xızmetlerden durıs paydalanıw puqaralardıń waqıtın hám qárejetin únemlewge xızmet etedi. Hújjetińiz joǵalǵan bolsa, áwre-sarsanlıqqa jol qoymaw ushın Mámleketlik xızmetler orayı arqalı yamasa my.gov.uz portal arqalı múrájat etiwi múmkin.
Moynaq rayonı ádillik bólimi
Mámleketlik xızmetler orayı hújjetlerdi qabıl qılıw hám usınıw bas qánigesi G.Abdixanova