Янгиликлар
02
Adliya Plus - huqıqıy xızmetler bir qosımshada
Búgingi sanlı dáwirde mámleketlik xızmetlerdi xalıqqa tez, qolaylı hám ashıq-aydın tárizde kórsetiw áhmiyetli wazıypalardan biri bolıp esaplanadı. Usı maqsette Ózbekstan Respublikası Ádillik ministrligi tárepinen "Adliya Plus" mobil qosımshası engizilip, puqaralarǵa kóplegen huqıqıy hám mámleketlik xızmetlerden aralıqtan paydalanıw imkaniyatı jaratıldı.
"Adliya Plus" - Ádillik ministrligi xızmetleriniń birden-bir sanlı platforması bolıp, qosımsha arqalı 100 den aslam xızmetlerden paydalanıw, elektron arza hám múrájatlar jiberiw, olardıń kórip shıǵılıw procesin baqlaw jáne bar xızmetler sheńberinde nátiyjelerdi elektron túrde alıw múmkin. PHAJ xızmetleri - endi jáne de qolaylı.
Qosımshanıń áhmiyetli baǵdarlarınan biri - puqaralıq halatı aktlerin jazıw (PHAJ) xızmetlerin sanlastırıw bolıp tabıladı. Sonıń ishinde, puqara ayırım jaǵdaylarda PHAJ bólimine jeke barmastan, tuwılıwdı hám nekeni dizimge alıw ushın onlayn arza beriwi, elektron hújjetlerden paydalanıwı múmkin. Bul, ásirese, jańa perzentli bolǵan shańaraqlar ushın úlken qolaylıq. Sebebi sanlı xızmetler artıqsha waqıt hám qarjı jumsalıwı, náwbet kútiw hám bir neshe márte uyımǵa múrájat etiw zárúrligin azaytadı. Bir qosımshada - bir neshe imkaniyat "Adliya Plus" arqalı PHAJ xızmetleri menen bir qatarda notariat, advokatura, intellektuallıq múlk, isenim xatı hám wákillikler sıyaqlı baǵdarlarǵa baylanıslı xızmetler hám maǵlıwmatlardan da paydalanıw múmkin. Sonday-aq, paydalanıwshı óz arzalarınıń jaǵdayın baqlawı, huqıqıy málimleme hám túsinikler menen tanısıwı hám Ádillik ministrliginiń jańalıqlarınan xabardar bolıp barıwı múmkin. Waqıt - eń úlken qolaylıq. Sanlastırıwdıń tiykarǵı maqseti tek ǵana texnologiyanı engiziw emes, al insan ushın qolaylılıq jaratıw bolıp tabıladı. "Adliya Plus" da mine usı princip tiykarında xalıqtıń huqıqıy xızmetlerden paydalanıwın ápiwayılastırıw, mámleketlik xızmetlerdi jáne de ashıq hám jedel etiwge xızmet etpekte. Búgin zamanagóy puqara ushın kóplegen huqıqıy xızmetler bir neshe minutta mobil qurılmaǵa jaqınlaspaqta. "Adliya Plus" - ádillik xızmetleriniń sanlı kórinisi, zamanagóy texnologiyalar arqalı insan mápine xızmet etip atırǵan qolaylı platforma bolıp esaplanadı.
Bir qosımsha - kóplegen xızmetler, az waqıt hám kóbirek qolaylıq!
Nókis rayonı ádillik bólimi
PHAJ bólimi 1-dárejeli inspektorı G.Zarubayeva