Янгиликлар

Toshkent davlat yuridik universitetida maxsus uch yillik ta’lim dasturlariga qabulning yangi tartibi tasdiqlandi

---

2026-yil 30-iyunda O‘zbekiston Respublikasi Vazirlar Mahkamasining 350-son qarori bilan Toshkent davlat yuridik universitetining maxsus uch yillik ta’lim dasturlariga o‘qishga qabul qilishga oid nizomlar tasdiqlandi.
Mazkur qaror yuridik ta’lim tizimini takomillashtirish, malakali huquqshunos kadrlarni tayyorlash hamda turli toifadagi abituriyentlar uchun oliy yuridik ta’lim olish imkoniyatlarini kengaytirishga xizmat qiladi.
Maxsus uch yillik ta’lim dasturining maqsadi Yangi tartibga muvofiq, 2026/2027-o‘quv yilidan boshlab Toshkent davlat yuridik universitetida bakalavriatning maxsus uch yillik ta’lim dasturlari joriy etiladi. Ushbu dastur akademik litseylar, yuridik texnikumlar bitiruvchilari hamda oliy ma’lumotga ega bo‘lgan shaxslarning yurisprudensiya yo‘nalishida ta’lim olishini ta’minlashga qaratilgan. Qabul alohida kvota va to‘lov-kontrakt asosida amalga oshiriladi.
Kimlar ushbu dasturda ishtirok etishi mumkin?
Qaror bilan quyidagi toifadagi talabgorlar uchun alohida qabul tartiblari belgilangan:
* Toshkent davlat yuridik universiteti huzuridagi akademik litseylar bitiruvchilari;
* yuridik texnikumlar bitiruvchilari;
* oliy ma’lumotga ega bo‘lgan fuqarolar.
Har bir toifa uchun qabul shartlari, hujjatlarni topshirish tartibi va baholash mezonlari alohida nizomlar asosida amalga oshiriladi.
Oliy ma’lumotga ega shaxslar uchun yangi imkoniyat Qarorga ko‘ra, oliy ma’lumotga ega bo‘lgan fuqarolar Toshkent davlat yuridik universitetida "Yurisprudensiya" ta’lim yo‘nalishi bo‘yicha ikkinchi va undan keyingi oliy ta’limni maxsus uch yillik dastur asosida olishlari mumkin.
Abituriyentlar har yili belgilangan muddatlarda elektron ro‘yxatdan o‘tadi hamda mutaxassislik fanlari va chet tili bo‘yicha test sinovlarida ishtirok etadi. Natijalar reyting asosida baholanadi va qabul amalga oshiriladi.
Tanlovning shaffofligi va ochiqligi ta’minlanadi Yangi tartibda qabul jarayonining shaffofligini ta’minlashga alohida e’tibor qaratilgan. Jumladan:
* qabul kvotalari va qo‘shimcha o‘rinlar haqida ma’lumotlar oldindan e’lon qilinadi;
* suhbat va test sinovlari belgilangan mezonlar asosida o‘tkaziladi;
* abituriyentlarning natijalari reyting tizimi asosida baholanadi;
* barcha jarayonlar amaldagi qonunchilik talablari asosida tashkil etiladi.
Qarorning ahamiyati Mazkur qaror yuridik ta’lim tizimini zamonaviy talablar asosida rivojlantirish, amaliy ko‘nikmalarga ega mutaxassislarni tayyorlash hamda huquqshunoslik sohasida bilim olish istagidagi fuqarolar uchun qo‘shimcha ta’lim imkoniyatlarini yaratishga xizmat qiladi.
Shuningdek, yangi tartib iqtidorli akademik litsey va yuridik texnikum bitiruvchilarining oliy yuridik ta’limga izchil o‘tishini ta’minlash, oliy ma’lumotga ega shaxslarga esa qisqartirilgan muddatda yurisprudensiya yo‘nalishini egallash imkonini beradi.
Vazirlar Mahkamasining 2026-yil 30-iyundagi 350-son qarori yuridik ta’lim tizimini takomillashtirish yo‘lidagi muhim huquqiy hujjatlardan biri bo‘lib, mamlakatda yuqori malakali huquqshunos kadrlar tayyorlash sifatini yangi bosqichga olib chiqishga xizmat qilishi kutilmoqda.

To‘rtko‘l tumani adliya boʼlimi,
Yuridik xizmat ko‘rsatish markazi bosh yuriskonsulti                                            D.Аllabergenov

---