Янгиликлар
27
Intizamiy jazanı qollanıw hám alıp taslaw tártibi
Miynet haqqındaǵı nızamshılıqqa muwapıq, intizamiy qılmıs degende xızmetker tárepinen óz miynet (lawazım) májbúriyatların orınlamaǵanlıǵı ya bolmasa lazım dárejede orınlamaǵanlıǵı túsiniledi.
Xızmetker tárepinen intizamiy qılmıs isleniwi xızmetkerdi intizamıy juwapkershilikke tartıw ushın tiykar boladı.
Eger xızmetkerdiń óz miynet májbúriyatların orınlamaǵanlıǵı yaki lazım dárejede orınlamaǵanlıǵı xızmetkerge baylanıslı bolmaǵan sebeplerge bola payda bolsa, yaǵnıy xızmetkerdiń óz miynet wazıypaların orınlaw ushın jumıs beriwshi tárepinen zárúr sharayatlar jaratılmasa, fors-major hám basqa da halatlarda, xızmetkerdi intizamıy juwapkershilikke tartıwǵa jol qoyılmaydı.
Ózbekstan Respublikası miynet haqqındaǵı nızamshılıq talaplarına bola, intizamiy jaza sharaları jumısqa qabıllaw huqıqı berilgen tárepler (uyımlar) tárepinen ámelge asırıladı.
Jumıs beriwshi miynet intizamıń buzǵanlıǵı ushın xızmetkerge Ózbekstan Respublikası Miynet kodeksiniń 312-statyasına tiykarlanıp sógis, ortasha aylıq is haqısınıń otız payızınan kóp bolmaǵan muǵdarda járiyma (shólkemniń ishki miynet tártibi qaǵıydalarında xızmetkerge ortasha aylıq is haqısınıń eliw payızınan kóp bolmaǵan muǵdarda járiyma salınıwı da názerde tutılıwı múmkin) hámde xızmetker óz miynet májbúriyatların turaqlı túrde buzǵanlıǵı hám miynet májbúriyatların bir márte qopal ráwishte buzǵanlıǵı ushın miynet shártnamasın biykarlaw siyaqlı intizamiy jaza sharaların qollanıwǵa haqılı.
Intizamiy jazalardı joqarıda kórsetilgen tártip penen izbe-iz qollaw shárt emes. Onı tańlaw huqıqı jumıs beriwshige tiyisli. Bunda jaza sharasın qollanıwda intizamiy qılmıstıń awır-jeńilligi, onıń isleniw jaǵdayları, xızmetkerdiń aldıńǵı jumısı hám minez-qulqı esapqa alınadı.
Ózbekstan Respublikası Miynet kodeksiniń 313-statyası talabına muwapıq, jumıs beriwshi xızmetkerden intizamıy jaza sharası qollanılǵanǵa shekem, sonday-aq, eger intizamiy qılmıs, xızmet tekseriw nátiyjelerine bola anıqlanǵan bolsa, jazba túrde túsindiriwdi (túsinik xat) talap etiwi shárt. Eger xızmetker jazba túrde túsinik xat beriwden bas tartsa sol jerde bolǵan gúwalar qatnasıwında aktlestiriledi.
Xızmetkerge intizamiy jaza sharasın qollaw jumıs beriwshiniń buyrıǵı menen rásmiylestiriledi hám buyrıq qabıl qılınǵan kúnnen baslap úsh jumıs kúni ishinde xızmetker jumısta bolmaǵan waqıt esapqa alınbastan, oǵan jazanıń sebepleri kórsetilgen halda qol qoydırıp járiyalanadı.
Ózine qarata intizamiy jaza sharasın qollaw haqqında shıǵarılǵan buyrıq penen tanıstırılmaǵan xızmetker intizamiy jaza almaǵan dep esaplanadı.
Miynet kodeksiniń 315-stayasına tiykarlanıp jumıs beriwshi intizamiy jazanı óz baslamasına bola, xızmetkerdiń tikkeley basshısınıń, kásiplik awqam komitetiniń iltimasnamasına, sonday-aq xızmetkerdiń iltimasına bola bir jıl ótkenge shekem múddetinen aldın alıp taslaw huqıqına iye.
Intizamiy jazanı múddetinen aldın alıp taslaw jumıs beriwshiniń buyrıǵı menen rásmiylestiriledi. Onı alıp taslaw ushın belgili bir múddettiń ótiwi talap etilmeydi.
Shımbay rayonı ádillik bólimi
YXKO bas yuriskonsulti Sh.Matniyazov