Янгиликлар
26
Ustaz miynetine joqarı itibar: joqarı mamanlıqtaǵı pedagoglardı qollap-quwatlaw - bilimlendiriw sapasınıń áhmiyetli faktorı
Elimizde bilimlendiriw sistemasın jáne de jetilistiriw, pedagoglardıń kásiplik abırayın arttırıw hám olardıń múnásip miynetin xoshametlew mámleketlik siyasattıń tiykarǵı baǵdarlarınan biri bolıp esaplanadı. Mine, usı iygilikli maqsetler jolında Ózbekstan Respublikası Ministrler Kabinetiniń 2026-jıl 19-fevraldaǵı 69-sanlı "Joqarı mamanlıq kategoriyasına (bas oqıtıwshı lawazımına) iye bolǵan pedagoglardı sociallıq qollap-quwatlaw boyınsha qosımsha ilajlar haqqında"ǵı qararı qabıl etildi.
Bul hújjet joqarı mamanlıqqa iye bolǵan pedagoglardıń miynetin múnásip bahalaw, olardıń turmıs sharayatın jaqsılaw hám bilimlendiriw tarawında uzaq jıllar nátiyjeli jumıs alıp barıp atırǵan muǵallimlerdi sociallıq qollap-quwatlawǵa xızmet etedi.
Qararǵa muwapıq, 2026-jıldan baslap keminde 15 jıllıq pedagogikalıq jumıs stajına jáne joqarı mamanlıq kategoriyası (yamasa bas oqıtıwshı lawazımı) ǵa iye bolǵan pedagoglarǵa turaq jay satıp alıw ushın alınatuǵın ipoteka krediti boyınsha baslanǵısh tólemniń 25 procenti mámleketlik byudjet esabınan subsidiya etip beriledi. Bul jeńillik kóp jıllıq nátiyjeli miynet etken pedagoglardıń turaq jay menen támiyinleniw imkaniyatların keńeytedi hám olardıń sociallıq turaqlılıǵın bekkemlewge xızmet etedi.
Qarar menen ipoteka subsidiyasın ajıratıwdıń anıq hám ashıq-aydın tártibi de tastıyıqlanǵan. Oǵan bola, talabanlar elektron tárizde arza tapsıradı, olar belgilengen sociallıq normalar tiykarında bahalanadı. Sonıń ishinde, pedagogtıń keminde 15 jıllıq miynet stajına iye ekenligi, joqarı mamanlıq kategoriyası yamasa bas oqıtıwshı statusınıń bar ekenligi jáne turaq jayǵa mútájligi tiyisli mámleketlik uyımlardıń málimleme sistemaları arqalı tekseriledi. Bul bolsa subsidiyalardıń ádil hám mánzilli ajıratılıwın támiyinleydi.
Bul qarardıń jáne bir áhmietli tárepi sonda, ol pedagoglardıń óz ústinde turaqlı islewi, joqarı mamanlıq kategoriyasın qolǵa kirgiziwge umtılıwın xoshametleydi. Bul bolsa bilimlendiriw mákemelerinde sabaq sapası, zamanagóy pedagogikalıq texnologiyalardı qollanıw hám oqıwshılardıń bilim dárejesin arttırıwǵa unamlı tásir kórsetedi. Sebebi joqarı tájiriybeli muǵallim - sapalı bilimlendiriwdiń eń áhmiyetli kepilliklerinen biri.
Búgingi kúnde elimizde "ustaz" degen joqarı ataqqa bolǵan húrmet hám itibar izbe-iz artıp barmaqta. Pedagoglardı materiallıq hám ruwxıy qollap-quwatlaw, olar ushın múnásip miynet hám jasaw sharayatların jaratıw keleshek áwladtıń tárbiyasına qaratılǵan áhmietli investiciya bolıp esaplanadı. Usı mániste, Ministrler Kabinetiniń 69-sanlı qararı tek ǵana pedagoglardıń sociallıq qorǵalıwın kúsheytip qoymastan, al bilimlendiriw sistemasında maman kadrlardı saqlap qalıw, kásip abırayın arttırıw hám jaslardı ustazlıq kásibine keńnen tartıwǵa da xızmet etedi.
Sebebi, jámiyet rawajlanıwınıń tiykarı - bilimli hám watansúygish jaslar bolıp esaplanadı. Bunday áwladtı tárbiyalaw bolsa bilimli, tájiriybeli hám múnásip qádirlengen ustazlardıń qolında. Sonlıqtan bul qarar bilimlendiriw tarawın rawajlandırıw, pedagoglardıń miynetin múnásip xoshametlew hám "Insan qádiri ushın" principin ámelde támiyinlew jolındaǵı áhmiyetli huqıqıy hújjetlerden biri sıpatında ayrıqsha áhmiyetke iye.
Shomanay rayonı ádillik bólimi
MXO direktorı B.E.Dawletmuratov