Янгиликлар
27
Medicina xızmetkerlerine múnásip itibar - insan qádirin ulıǵlawdıń ámeliy kórinisi
Mámleketimizde insan salamatlıǵın qorǵaw, medicina sistemasınıń nátiyjeliligin arttırıw hám taraw xızmetkerlerin hár tárepleme qollap-quwatlaw mámleketlik siyasattıń tiykarǵı baǵdarlarınan biri bolıp esaplanadı. Mine, usı iygilikli maqsetler jolında Ózbekstan Respublikası Ministrler Kabinetiniń 2026-jıl 12-iyundegi 310-sanlı "Mámleketlik medicina mákemelerinde jumıs alıp barıp atırǵan medicina hám farmacevtika xızmetkerlerin materiallıq jaqtan qollap-quwatlaw ilajları haqqında"ǵı qararı qabıl etildi. Bul qarar taraw xızmetkerleriniń sociallıq qorǵalıwın bunnan bılay da kúsheytiwge qaratılǵan áhmiyetli hújjet sıpatında úlken áhmiyetke iye.
Qarar menen mámleketlik medicina mákemelerinde keminde 15 jıl miynet stajına iye bolǵan medicina hám farmacevtika xızmetkerleri ushın bir qatar sociallıq jeńillikler engizildi. Sonıń ishinde, ipoteka krediti tiykarında satıp alınatuǵın turaq jaydıń dáslepki tóleminiń 25 procenti mámleket tárepinen qaplap beriletuǵını belgilendi. Bul jeńillik kóp jıllıq hadal miynet etken shıpakerler, miyirbiykeler hám farmacevtlerdiń turaq jay sharayatın jaqsılawǵa xızmet etedi.
Qarardıń jáne bir áhmiyetli tárepi - tájiriybeli medicina xızmetkerleriniń perzentlerin qollap-quwatlawǵa qaratılǵanı. Endi keminde 15 jıl miynet stajına iye bolǵan xızmetkerlerdiń perzentlerine respublika joqarı bilimlendiriw mákemeleriniń bakalavriat basqıshında oqıw ushın tólenetuǵın jıllıq kontrakt pulınıń 30 procenti, biraq belgilengen sheklengen muǵdardan aspaǵan bólegi mámleketlik qarjılar esabınan qaplap beriledi. Bul bolsa taraw wákilleriniń perzentleri ushın sapalı joqarı bilim alıw imkaniyatların keńeytedi.
Bul jeńilliklerdi ámelge asırıw processlerin sanlastırıw da názerde tutılǵan. Arzalar elektron tárizde qabıl etiliwi, avtomat tekseriliwi hám subsidiyalar ashıq-aydın túrde ajıratılıwı belgilengen. Bul bolsa artıqsha qaǵazpazlıqtı qısqartadı, múrájatlardı jedel hám ádil kórip shıǵıw imkaniyatın beredi.
Qararǵa muwapıq, bul sociallıq qollap-quwatlaw ilajların qarjılandırıw ushın Densawlıqtı saqlaw ministrligi janındaǵı Medicinanı rawajlandırıw mámleketlik maqsetli qorınıń qarjılarınan paydalanıladı. Sonday-aq, hár jılı usı maqsetler ushın mámleketlik byudjet sheńberinde 100 milliard sum qarjı ajıratılıwı belgilengen. Bul bolsa qabıl etilgen ilajlardıń úzliksiz hám nátiyjeli ámelge asırılıwın támiyinleydi.
Álbette, bul qarar mámleketimizde medicina tarawı xızmetkerleriniń miynetine berilgen joqarı baha hám olardı sociallıq qorǵawǵa qaratılǵan gezektegi áhmiyetli qádem bolıp tabıladı. Ol tek ǵana shıpakerler hám farmacevtlerdiń turmıs abadanlıǵın arttırıwǵa emes, al tarawda maman kadrlardı saqlap qalıw, olardıń kásiplik jumısına xoshametlewdi kúsheytiw jáne xalıqqa kórsetilip atırǵan medicinalıq xızmetlerdiń sapasın bunnan bılay da arttırıwǵa xızmet etedi.
Nege degende, salamat milletti qurıw bárinen burın medicina xızmetkerleriniń múnásip miynet etiwi hám sociallıq qorǵalıwı menen tıǵız baylanıslı. Usı mániste, Ministrler Kabinetiniń 310-sanlı qararı "Insan qádiri ushın" principiniń densawlıqtı saqlaw tarawındaǵı jáne bir ámeliy kórinisi sıpatında mámleketimiz medicina sistemasınıń rawajlanıwında úlken áhmiyetke iye.
Shomanay rayonı ádillik bólimi
MXO bas qanigesi T.G.Dawletmuratov