Янгиликлар
20
Mektep basshıları jumısında jańa basqısh: menedjerlik sertifikatı - sapalı bilimlendiriw girewi
Bilimlendiriw sistemasında ámelge asırılıp atırǵan reformalar tiykarında zamanagóy bilim hám basqarıw kónlikpelerine iye basshı kadrlardı qáliplestiriw áhmiyetli wazıypa sıpatında belgilengen. Usı maqsette Ózbekstan Respublikası Ministrler Kabinetiniń 2023-jıl 25-dekabrdegi 681-sanlı "Mámleketlik ulıwma orta bilimlendiriw mákemeleri direktorı lawazımına talabanlardı menedjerlik oqıw kurslarında oqıtıw hám olarǵa menedjerlik sertifikatın beriw tártibi haqqındaǵı rejeni tastıyıqlaw haqqında"ǵı qararı qabıl etildi. Bul hújjet mektep direktorların tańlaw, tayarlaw hám olardıń kásiplik potencialın arttırıwda jańa basqıshtı baslap berdi.
Qararǵa muwapıq, 2024-jıl 1-yanvardan baslap Abdulla Avloniy atındaǵı pedagoglardı kásiplik rawajlandırıw hám jańa metodikalarǵa úyretiw milliy-izertlew institutında mektep direktorı lawazımına talabanlardı menedjerlik oqıw kurslarında oqıtıw hám olarǵa arnawlı portal arqalı elektron tárizde menedjerlik sertifikatın beriw sisteması engizildi. Bul sistema basshı kadrlardı zamanagóy basqarıw principleri, strategiyalıq rejelestiriw, finanslıq basqarıw, jámáátti nátiyjeli basqarıw hám bilimlendiriwdiń sapasın arttırıw boyınsha zárúr bilim hám kónlikpeler menen qurallandırıwdı názerde tutadı.
Rejege bola, mámleketlik ulıwma orta bilimlendiriw mákemesi direktorı lawazımına talabanlar menedjerlik sertifikatına iye bolıwı shárt. Sertifikatqa iye bolǵan talabanlar ǵana mektep direktorı lawazımına tańlawda qatnasıw huqıqına iye boladı. Sonday-aq, ámelde jumıs alıp barıp atırǵan mektep direktorlarınan da hár bes jılda bir márte menedjerlik sertifikatın jańalap barıw talap etiledi. Sertifikattıń ámel etiw múddeti de bes jıl etip belgilengen.
Usı qarar menen basshı xızmetkerlerdi xoshametlew mexanizmi de engizildi. Atap aytqanda, 2024-jıl 1-sentyabrden baslap menedjerlik sertifikatına iye bolǵan mektep direktorlarına lawazım miynet haqısınıń 50 procenti, direktor orınbasarlarına bolsa 30 procenti muǵdarında hár aylıq qosımsha ústeme tólenbekte. Bul bolsa basshılardıń óz ústinde islewi, mamanlıǵın turaqlı arttırıp barıwı hám bilimlendiriwdiń sapası ushın juwapkershiligin jáne de kúsheytiwge xızmet etpekte.
Menedjerlik oqıw kurslarınıń engiziliwi mekteplerdi basqarıwda xalıqaralıq tájiriybe hám zamanagóy menedjment principlerin keńnen qollanıw imkaniyatın jaratpaqta. Endi mektep basshısınan tek ǵana pedagogikalıq bilim emes, al strategiyalıq pikirlew, nátiyjeli jámáát basqarıwı, finanslıq sawatlılıq, málimleme texnologiyalarınan paydalanıw hám innovaciyalıq qatnaslardı ámeliyatqa engiziw de talap etiledi. Bul bolsa bilimlendiriw mákemeleriniń basqarıw sapası hám nátiyjeliligin arttırıwǵa xızmet etedi.
Álbette, bul reformalardıń baslı maqseti - mekteplerde zamanagóy pikirleytuǵın, juwapkershilikli hám intaker basshılardı qáliplestiriw arqalı bilimlendiriwdiń sapasın jańa basqıshqa alıp shıǵıw bolıp esaplanadı. Sebebi, kúshli basshı - kúshli jámáát, kúshli jámáát bolsa bilimli hám básekige shıdamlı áwladtı tárbiyalawdıń áhmiyetli faktorı bolıp esaplanadı.
Usı mániste, Ministrler Kabinetiniń 681-sanlı qararı bilimlendiriw sistemasında professional menedjerlik mádeniyatın rawajlandırıw, basshı kadrlar potencialın bekkemlew hám Jańa Ózbekstannıń rawajlanıwı ushın maman hám zamanagóy basqarıw kónlikpelerine iye mektep direktorların tayarlawǵa xızmet etetuǵın áhmiyetli huqıqıy tiykar bolıp qalmaqta.
Shomanay rayonı ádillik bólimi MXO bólim baslıǵı A.T.Orazbaev