Янгиликлар
10
Neke hám ajırım
Neke-erkek hám hayal ortasındaǵı shańaraq qurıwǵa tiykar bolatuǵın áhmiyetli sociallıq múnásebet. Shańaraq bolsa jámiyettiń en áhmiyetli buwını bolıp esaplanadı. Bekkem shańaraqta óz-ara húrmet, mehr-aqıbet, isenim hám juwapkershilik ayrıqsha áhmiyetke iye.
Neke qurıwdan aldın insan shańaraqlıq turmıstıń juwapkershiligin túsiniwi, bir-birin húrmet etiwi hám keleshekte perzentler tárbiyası haqqında oylawı kerek. Shańaraqta er hám hayal bir-birin qollap quwatlasa, turli mashqalalardı kelisim hám sabır menen sheshse, shańaraq bekkem boladı.
Jámiyette shańaraqtan shańaraq payda bolıp barıwı jazılmaǵan insanıylıq nızım. Sonın ushında jas shańaraq payda bolgannan keyin onı qollap-quwatlap, ayaqqa turıp ketiwine járdem kórsetiw arqalı jámiyetten óz ornına iye bolıwına erisiledi.
Biz jámiyettiń tiykarǵı aǵzası bolǵanımız ushın tikkeley juwapkermiz. Tárbiya júda keń túsinik. Sonın ishinde perzentti keshirimli, keń peyil bolıwǵa tárbiyalaw úlken áhmiyetke iye. Bunday tárbiyalanǵan perzent tek ǵana shańaraqta emes, xalıq arasında abıray-ataqqa iye bolatuǵın insan bolıp jetilisedi.
Ajırım nekeniń biykar etiliwi bolıp, ol shańaraq turmısında qatań ózgerislerge alıp keledi. Ayırım jaǵdaylarda erli-zayıp ortasındaǵı kelispewshilikler, isenimsizlik, úzliksiz jánjeller yamasa basqa qatań sebepler ajırımǵa alıp keliwi múmkin.
Shańaraqqa eń qáwipli nárse bul-ajırım. Demek, ajırımlardıń aldın alıw ushın gúres-sol shańaraq tiregi bolgan erli-zayıplınıń ata-anaları, tuwǵan-tuwısqanları, sonınan qonsı-qoba menen máhálle belsendileri, el-tore aǵaları tárepinen teńdey alıp barılsa óz nátiyjesin beredi.
Mashqalalar júzege kelgende, erli-zayıp asıǵıp qarar qabıl qılmastan, áwele tınısh qarım-qatnas qılıwı, kelispewshilik sebeplerin anıqlawı hámde imkanı bolsa, shańaraqtı saqlap qalıwǵa háreket etiwi kerek. Zárúr hallarda qánigelerden máslahát alıw paydalı.
Juwmaqlap aytqanda, neke-úlken juwapkershilik talap etetuǵın áhmiyetli qarar. Shańaraqta mehr-muhabbat, húrmet, isenim hám sabır bolsa, onıń bekkemligi támiyinlenedi. Ajırım bolsa aqırǵı shara sıpatında qaralıwı hám onıń perzentler hámde shańaraq aǵzalarına tásiri esapqa alınıwı kerek.
Shańaraq tınıshlıǵı-jámiyet tınıshlıǵınıń tiykarı.
Shomanay rayonı ádillik bólimi
PHAJ bólimi 1-dárejeli inspektorı P.Ibraimova