Янгиликлар
02
Miynet shártnamasin jumis beriwshiniń baslamasi menen biykar etiw tiykarlari
Ózbekstan Respublikası Konstituciyasınıń 42-statyasında hár kim múnásip miynet etiw, kásip hám jumıs túrin erkin tańlaw, qáwipsizlik hám gigiena talaplarına juwap beretuǵın qolaylı miynet sharayatlarında islew, miyneti ushın hesh qanday kemsitiwlersiz hám miynetke haqı tólewdiń belgilengen eń kem muǵdarınan az bolmaǵan tárizde ádil haqı alıw, sonday-aq jumıssızlıqtan nızamda belgilengen tártipte qorǵanıw huqıqına iye.
Miynet nızamshılıǵında miynet shártnamasın biykar etiw degende xızmetker hám jumıs beriwshi arasındaǵı jeke tártiptegi miynet qatnasıqlarınıń tamamlanıwı túsiniledi.
Miynet shártnamasın biykar etiw jumısqa qabıl etiw huqıqına iye bolǵan shaxslar tárepinen ámelge asırıladı hám jumıs beriwshiniń buyrıǵı menen rásmiylestiriledi. Aqırǵı jumıs kúni miynet shártnaması biykar etilgen kún bolıp tabıladı.
Jumıs beriwshi miynet shártnaması biykar etilgen kúni xızmetkerge onıń miynet dáptershesin yamasa elektron miynet dáptershesinen kóshirmesin, sonday-aq miynet shártnamasın biykar etiw haqqındaǵı buyrıqtıń kóshirmesin beriwi shárt. Jumıs beriwshi xızmetkerdiń jazba arzasına bola oǵan jumıs penen baylanıslı hújjetlerdiń tiyisli túrde tastıyıqlanǵan kóshirme nusqaların da beriwi shárt.
Miynet shártnaması biykar etilgende xızmetker menen esap-kitap etiliwi kerek. Jumıs beriwshi tárepinen xızmetkerge tiyisli bolǵan barlıq summalardı tólew xızmetker menen miynet shártnaması biykar etilgen kúni ámelge asırıladı.
Eger xızmetker miynet shártnaması biykar etilgen kúni islemegen bolsa, tiyisli summalar esap-sanaq haqqında xızmetker tárepinen talap qoyılǵannan keyin úsh kúnnen keshiktirmey tóleniwi kerek.
Ózbekstan Respublikası Miynet kodeksiniń 161-statyasına muwapıq, belgisiz múddetke dúzilgen miynet shártnamasın, sonday-aq múddeti tamam bolǵansha múddetli miynet shártnamasın jumıs beriwshiniń baslaması boyınsha biykarlaw tiykarlanǵan bolıwı kerek.
Tómendegi sebeplerden (tiykarlardan) biriniń bar ekenligi miynet shártnamasın biykarlawdıń tiykarlılıǵın bildiredi:
1) shólkem (onın ayrıqsha bólimshesi) óz shólkemlestiriwshileriniń (qatnasıwshılarınıń) yaki shólkemlestiriw hújjetleri menen buǵan wákillik berilgen yuridikalıq shaxs uyımınıń qararı menen saplastırılǵanlıǵı yaki jeke tártiptegi isbilermen tárepinen jumıstıń toqtatılǵanlıǵı;
2) texnologiyanıń, óndiristi hám miynetti shólkemlestiriwdiń ózgeriwi, jumıslar (ónim, xızmetler) kóleminiń qısqarıwı menen baylanıslı bolǵan shólkem (onıń ayrıqsha bólimi), jeke tártiptegi isbilermen xızmetkerleriniń sanınıń yamasa shtatınıń ózgeriwi;
3) xizmetkerdiń qánigeligi jeterli bolmaganlıǵı sebepli iyelep turgan lawazımına yaki atqarıp atırgan jumısına muwapıq emesligi;
4) xızmetkerdiń óz miynet minnetlemelerin sistemalı túrde buzganlıǵı. Aldın miynet minnetlemelerin buzǵanı ushın xızmetker intizamiy yamasa materiallıq juwapkershilikke tartılǵan yamasa oǵan miynet haqqındaǵı nızamshılıqta hám miynet haqqındaǵı basqa da huqıqıy hújjetlerde názerde tutılǵan tásir ilájları qollanılǵan kúnnen baslap bir jıl dawamında xızmetker tárepinen qayta intizamiy orınsız is-háreket islengeni ushın miynet minnetlemelerin sistemalı túrde buzıw bolıp tabıladı;
5) xızmetkerdiń óz miynet minnetlemelerin bir márte qopal túrde buzganlıǵı. Xızmetker menen dúzilgen miynet shártnamasın biykar etiwge alıp keliwi múmkin bolǵan miynet minnetlemeleriniń bir márte qopal túrde buzılıwlarınıń dizimin belgilew usı Kodekstiń 162-statyasına muwapıq ámelge asırıladı;
6) usı Kodekste hám basqa nızamlarda belgilengen basqa sebepler (tiykarlar).
Eger jámáát kelisiminde yaki jámáát shártnamasında miynet shártnamasın jumıs beriwshiniń baslaması boyınsha biykar etiw ushın kásiplik awqamı komitetiniń aldın ala razılıǵın alıw názerde tutılǵan bolsa, miynet shártnamasın bunday razılıqsız biykar etiwge jol qoyılmaydı.
Miynet shártnaması jumıs beriwshiniń baslaması boyınsha, shólkem (onıń ayrıqsha bólimi) óz shólkemlestiriwshileriniń (qatnasıwshılarınıń) yamasa shólkemlestiriw hújjetleri menen oǵan wákillik berilgen yuridikalıq shaxs uyımınıń qararı boyınsha saplastırılǵanlıǵı yamasa jeke tártiptegi isbilermen tárepinen jumıs toqtatılǵanlıǵı múnásibeti menen, shólkem basshısı, ayrıqsha strukturalıq bólim basshısı menen, shólkem múlk iesi ózgergenligi múnásibeti menen shólkem basshısı, onıń orınbasarları, bas buxgalter hám shólkemniń ayrıqsha bóliminiń basshısı menen biykar etilgende kásiplik awqamı komitetiniń kelisimi talap etilmeydi.
Jumıs beriwshi kásiplik awqamı komiteti tárepinen xızmetker menen miynet shártnamasın biykar etiwge kelisim beriw haqqındaǵı qararı qabıl etilgen kúnnen baslap bir aydan keshikpey miynet shártnamasın biykar etiwge haqılı.
Xojeli rayonı ádillik bólimi
Yuridikalıq xızmet kórsetiw orayı
bas yuriskonsultı U.D.Erejepova