Янгиликлар
30
Shańaraq abat bolsa, mámleket abat boladı
Xalqımız ázelden shańaraqtı muqaddes dárgay, insan kamal tabatuǵın eń áhmiyetli mákan sıpatında qádirlep kelgen. "Shańaraq abat bolsa, máhálle abat, máhálle abat bolsa, mámleket abat boladı," dep biykarǵa aytılmaǵan. Haqıyqatında da, hár qanday jámiyettiń bekkemligi, rawajlanıwı hám keleshegi bárinen burın shańaraqlardıń tatıwlıǵı hám abadanlıǵına baylanıslı.
Shańaraq - insannıń dáslepki tárbiya mektebi. Perzent dúnyaǵa kelip, jaqsılıq hám jamanlıq, ádep-ikramlılıq, miyrim-shápáát, húrmet hám juwapkershilik sıyaqlı insanıy pazıyletlerdi bárinen burın shańaraqta úyrenedi. Ata-ananıń óz-ara húrmeti, bir-birine bolǵan itibarı hám mehiri perzent tárbiyasına tikkeley tásir kórsetedi. Sonıń ushın da salamat hám bekkem shańaraqta ósken perzentler keleshekte jámiyettiń múnásip, watansúyiwshi hám ruwxıy jetik aǵzaları bolıp kamalǵa keledi.
Ózbekstan Respublikasında shańaraq institutın bekkemlew mámleket siyasatınıń ústin jónelislerinen biri bolıp, Prezidentimizdiń 2018-jıl 27-iyundaǵı PQ-3808-sanlı “Ózbekstan Respublikasında Shańaraq institutın bekkemlew konsepciyasın tastıyıqlaw haqqında” qararına tiykar shańaraqlıq ajrasıwlardıń aldın alıw, salamat hám turaqlı shańaraqlardı qáliplestiriw áhmiyetli wazıypa sıpatında belgilengen.
Búgingi kúnde elimizde shańaraqtı qollap-quwatlaw, hayal-qızlardıń huqıqların qorǵaw, jas shańaraqlarǵa járdem beriw hám perzentler tárbiyasına ayrıqsha itibar qaratılmaqta. Sebebi, mámlekettiń rawajlanıwı insan kapitalına, insan kapitalı bolsa, bárinen burın, shańaraqta qáliplesetuǵın tárbiya hám qádiriyatlarǵa baylanıslı.
Tilekke qarsı, ayırım jaǵdaylarda shańaraqlarda ushırasıp atırǵan kelispewshilikler, óz-ara túsinbewshilik hám juwapkershiliksizlik jaǵdayları ajırasıwlarǵa sebep bolmaqta. Bunday jaǵdaylar tek ǵana erli-zayıplınıń emes, al perzentlerdiń de ruwxıy jaǵdayına unamsız tásir kórsetedi. Sonıń ushın shańaraqtaǵı hár bir mashqalanı sabır-taqat, óz-ara húrmet hám qarım-qatnas arqalı sheshiwge umtılıw áhmiyetli. Shańaraqtı saqlap qalıw, onıń bekkemligin támiyinlew jámiyet turaqlılıǵınıń áhmiyetli faktorlarınan biri bolıp esaplanadı.
Shańaraqta tınıshlıq hám tatıwlıq húkim súrse, máhállede de tınıshlıq boladı. Máhálleler abat hám tatıw bolsa, pútkil mámlekette turaqlılıq, rawajlanıw hám abadanlıq támiyinlenedi. Sebebi jámiyetti dúziwshi tiykarģı buwın - shańaraq. Hár bir shańaraqtıń baxıtlı hám abadan turmısı mámlekettiń rawajlanıwına qosılǵan múnásip úles bolıp esaplanadı.
Búgingi globallasıw dáwirinde milliy qádiriyatlarımızdı qásterlep saqlaw, jaslardı shańaraqlıq turmısqa tayarlaw, olarda juwapkershilik hám húrmet sezimlerin qáliplestiriw áhmiyetli wazıypalardan biri bolıp qalmaqta. Ata-analar perzentlerine tek ǵana materiallıq támiynat emes, al joqarı mánawiyat, jaqsı pazıyletler hám watansúyiwshilik sezimlerin de sińdiriwi kerek.
Juwmaq ornında aytıw múmkin, shańaraq – jámiyettiń tayanıshı, mámlekettiń bekkem tiykarı. Hár bir shańaraqta miyrim-shápáát, óz-ara húrmet hám awızbirshilik húkim súrse, jámiyet te rawajlanadı, mámleket te rawajlanadı. Solay eken, shańaraqlarımızdı saqlaw, bekkemlew hám qádiriyatlarımızdı keleshek áwladqa jetkeriw bárshemizdiń áhmiyetli wazıypamız bolıp esaplanadı. Sebebi, shańaraq abat bolsa, mámleket abat boladı.
Nókis rayonı ádillik bólimi PHAJ bólimi 1-dárejeli inspektorı G.Zarubayeva