Янгиликлар
30
"Jańa Ózbekstan jasları - 2030": strategiyasında neler belgilengen?
2026-jıldıń 20-aprelinde qabıl etilgen PF-66-sanlı Prezident Pármanı - "Jańa Ózbekstan jasları - 2030" strategiyası mámleket jasları ushın jańa dáwirdi baslap berdi. Bul hújjet tek ǵana reformalar toplamı emes, al jaslardıń bilimli, erkin pikirleytuǵın, zamanagóy kásiplerdi ielegen hám jámietke paydalı insan bolıp jetilisiwine qaratılǵan keń kólemli baǵdarlama boldı. Búgingi kúnde Ózbekstanda xalıqtıń sanı 38 millionnan asıp, onıń 9,5 millionın 14-30 jastaǵı jaslar quraydı. Hár jılı ortasha esapta 270 mıń jas shańaraq payda bolmaqta. Bul demografiyalıq jaǵday mámleketten jaslar siyasatına uzaq múddetli hám sistemalı qatnas jasawdı talap etedi. Strategiyanıń bas maqseti de - jaslardıń barlıq tarawlardaǵı potencialın tolıq júzege shıǵarıw.
Strategiyanıń eń áhmietli baǵdarlarınan biri - jaslardıń bántligin támiyinlew hám isbilermenlikti qollap-quwatlaw. Sońǵı jılları jaslar arasında isbilermenlikke qızıǵıwshılıq kúshli artıp barmaqta. Sol sebepli párman tiykarında startap joybarların qarjılandırıw, biznes inkubatorlar ashıw hám jeńilletilgen kreditler ajıratıw belgilendi. Ásirese, jas isbilermenlerdi sanlı texnologiyalar, IT, logistika hám kreativ industriya tarawlarına keńirek tartıw maqset etildi.
Bilimlendiriw tarawı da strategiyanıń tiykarǵı bólimlerinen biri boldı. Hújjette sapalı hám inklyuziv bilimdi rawajlandırıw, shet tillerin úyretiwdi ǵalaba en jaydırıw hám kásiplik bilim beriwdi keńeytiw wazıypaları anıq belgilengen. Házirgi kúnde jaslardan tek ǵana diplom emes, al zaman talabına say kónlikpeler talap etiledi. Sol sebepli strategiya IT, jasalma intellekt, injenerlik hám innovaciya tarawlarında oqıtıwdı kúsheytiwdi maqset etedi.
Pármanda jas shańaraqlardı qollap-quwatlaw máselesine de úlken itibar berilgen. Jas shańaraqlar ushın ipoteka baǵdarlamaları, jumısqa jaylastırıw hám sociallıq járdemlerdi keńeytiw názerde tutılmaqta. Bul jaslardıń turmıs sapasın jaqsılaw menen birge, jámiette sociallıq turaqlılıqtı da támiyinlewge xızmet etedi.
Strategiyada jaslardıń mádeniy, fizikalıq hám ruwxıy rawajlanıwına da ayrıqsha orın berildi. Sporttı ǵalaba en jaydırıw, volontyorlıq háreketlerin keńeytiw, jaslardı mádeniy hám ilimiy joybarlarǵa tartıw arqalı olardıń jámietlik belsendiligin arttırıw maqset etilgen. Bul bolsa watansúyiwshi, belsendi hám sociallıq juwapker jas áwladtı tárbiyalawǵa qaratılǵan.
Juwmaqlap aytqanda, PF-66-sanlı párman - jaslar siyasatındaǵı tariyxıy qádemlerdiń biri. Bul strategiya jaslarǵa bilim alıw, jumıs tabıw, isbilermenlik penen shuǵıllanıw, óz qábiletin rawajlandırıw hám jámiyetlik turmısta belsene qatnasıw ushın keńnen jol ashıp berdi. Sebebi jaslar - Jańa Ózbekstannıń tek búgini emes, al jarqın keleshegi de bolıp tabıladı.
Taqıyatas rayonı ádilik bólimi
YXKO bas yuriskonsultı Sh.Pirnazarova