Янгиликлар
30
Miynet intizamın buzǵanlıq ushın qanday jaza sharaları bar?
Jumıs beriwshi xızmetkerdi qálegeninshe jazalawı yamasa óz bilgeninshe járiyma salıwı múmkin be? Jańa Miynet kodeksine bola, miynet tártibin buzǵanlıq ushın qollanılatuǵın sharalar qatań belgilep qoyılǵan hám onnan shetke shıǵıw nızamǵa qayshı bolıp esaplanadı.
Miynet intizamı degen ne?
Bul - xızmetkerdiń jumis waqtında kárxana ishki tártip-qaǵıydalarına, miynet minnetlemelerine hám basshınıń nizamlı buyrıqlarına ámel etiwi. Jumıska kesh qalıw, sebepsiz kelmew yaki wazıypalardı orınlamaw intizam buzılıwı esaplanadı.
Nızamlı jaza túrleri. Nızamshılıqta xızmetkerge tek ǵana tómendegi intizamıy jaza sharaları belgilengen:
1. Sógis (eń jeńil jaza sharası).
2. Járiyma: Xızmetkerdiń ortasha aylıq miynet haqısınıń 30% ten kóp bolmaǵan muǵdarda járiyma salıw. (Eger ishki qaģıydalarda kórsetilgen bolsa, ayrıqsha jaģday sıpatında 50% ke shekem bolıwı múmkin).
3. Miynet shártnamasın biykar etiw: Xızmetker óz minnetlemelerin turaqlı túrde yamasa bir márte qopal túrde buzǵanda jumıstan bosatıw (eń awır jaza).
Nızamda kórsetilmegen jaza túrlerin qollanıw (máselen, "wazıypasın tómenletiw," "náwbetten tısqarı náwbetshilikke qoyıw" yamasa miynet haqını pútkilley tólemew) pútkilley qadaǵan etiledi.
Jaza qollanıwdıń májbúriy shártleri: Jumıs beriwshi xızmetkerdi jazalawdan aldın tómendegi qaǵıydalarǵa ámel etiwi shárt:
1. Túsinik xatı: Jaza qollanıwdan aldın xızmetkerden jazba túrde túsindirme xatı talap etiliwi shárt. Xızmetker xat beriwden bas tartsa, bul haqqında akt dúziledi.
2. Múddet: Intizamıy jaza qolaysız is-háreket anıqlanǵan kúnnen baslap 1 ay ishinde (xızmetkerdiń keselligi yamasa dem alısta bolǵan waqtın esapqa almaǵan halda) qollanılıwı kerek.
3. Bir qáte ushın bir jaza: Bir tártip buzılıwı ushın tek bir jaza sharası qollanılıwı múmkin (hám sógis berip, hám járiyma salıw múmkin emes).
Taqıyatas rayonı ádilik bólimi
YXKO bas yuriskonsultı Sh.Pirnazarova