Янгиликлар
30
Mámleketlik emes kommerciyalıq emes shólkemlerdi mámleket tárepinen qollap-quwatlaw tártibi qanday?
Respublikamızda ámelge asırılıp atırǵan reformalarda belsene qatnasıwshı hám birge islesiwshi sıpatında mámleketlik emes kommerciyalıq emes shólkemlerdiń rolin jáne de arttırıw, olardıń huqıqları menen nızamlı mápleriniń qorǵalıwın bekkemlew, mámleket tárepinen qollap-quwatlaw kólemin keńeytiw jáne olarǵa qolaylı sharayatlar jaratıw maqsetinde Ózbekstan Respublikasının 03.01.2007-jildagi 76-sanlı Nızamı hámde Ózbekstan Respublikası Prezidentiniń 03.03.2021-jılǵı PQ-5012-sanlı qararı qabil etildi.
Ózbekstan Respublikasının 03.01.2007-jildagi 76-sanlı Nızamı menen Mámleketlik emes kommerciyalıq emes shólkemlerdiń jumısın subsidiyalar, grantlar hám sociallıq buyırtpalar túrinde qollap-quwatlawı múmkin.
Mámleketlik subsidiya Ózbekstan Respublikasınıń respublikalıq byudjetinen, Qaraqalpaqstan Respublikasınıń respublikalıq byudjetinen, wálayatlardıń wálayatlıq byudjetlerinen hám Tashkent qalasınıń qalalıq byudjetinen, mámleketlik maqsetli qorlardıń qarjıları esabınan mámleketlik emes kommerciyalıq emes shólkemlerdi qollap-quwatlaw ushın beriletuǵın hám arnawlı joybarlar menen baylanıslı bolmaǵan finanslıq yamasa basqa materiallıq járdem bolıp tabıladı.
Mámleketlik grant mámleketlik emes kommerciyalıq emes shólkemlerge sociallıq paydalı maqsetlerge erisiwge qaratılǵan joybarlardı ámelge asırıw ushın tańlaw tiykarında Ózbekstan Respublikasınıń respublikalıq byudjeti, Qaraqalpaqstan Respublikasınıń respublikalıq byudjeti, wálayatlardıń wálayatlıq byudjetleri hám Tashkent qalasınıń qalalıq byudjeti qarjıları esabınan beriletuǵın pul qarjıları hám materiallıq resurslar bolıp tabıladı.
Mámleketlik emes kommerciyalıq emes shólkemlerge mámleketlik sociallıq buyırtpa sociallıq hám sociallıq áhmietke iye joybarlardı ámelge asırıw ushın mámleketlik uyım hám mámleketlik emes kommerciyalıq emes shólkem arasında shártnama dúziw arqalı jumıslardı orınlaw yamasa ilajlar ótkeriwge qaratılǵan mámleketlik tapsırma bolıp tabıladı.
Sonday-aq Ózbekstan Respublikası Prezidentiniń 03.03.2021-jılǵı PQ-5012-sanlı qararına tiykar 2021-jıl 1-marttan baslap mámleketlik emes kommerciyalıq emes shólkemler tárepinen dizimnen ótkeriwshi uyımdı xabardar etken halda (maǵlıwmat ushın) sırt el dáreklerinen alınatuǵın pul qarjıları hám múlktiń bir kalendar jıldaǵı jámi summası bazalıq esaplaw muǵdarınıń jigirma esesinen júz esesine shekem asırıldı.
Qaraqalpaqstan Respublikası Ádillik ministrliginiń
Mámleketlik emes kommerciyalıq emes shólkemler sektorı baslıǵı A.Otarbayev