Янгиликлар
23
Shańaraqlıq ajırasıwlar - jámiyetti kriziske ushıratıwshı faktor
Shańaraqlıq ajırasıwlar - jámiyetti kriziske ushıratıwshı faktor
Shańaraq jámiyettiń eń áhmiyetli buwını, insan tárbiyası hám ruwxıy kamalınıń dáslepki mákanı. Bekkem shańaraqlar turaqlı jámiyettiń tiykarın quraydı. Sol sebepli shańaraqlarda júz berip atırǵan ajırasıwlar tek ǵana erli-zayıplılar emes, al perzentler, tuwısqanlar hám pútkil jámiyettiń turmısına unamsız tásir kórsetedi.
Ózbekstan Respublikasında shańaraq institutın bekkemlew mámleket siyasatınıń ústin jónelislerinen biri bolıp, Prezidentimizdiń 2018-jıl 27-iyundaǵı PQ-3808-sanlı “Ózbekstan Respublikasında Shańaraq institutın bekkemlew konsepciyasın tastıyıqlaw haqqında” qararına tiykar shańaraqlıq ajrasıwlardıń aldın alıw, salamat hám turaqlı shańaraqlardı qáliplestiriw áhmiyetli wazıypa sıpatında belgilengen.
Búgingi kúnde ajırasıwlar sanınıń artıwı túrli faktorlarǵa baylanıslı. Shańaraq aǵzaları arasında óz-ara húrmet hám túsinisiwdiń jetispewshiligi, ekonomikalıq qıyınshılıqlar, juwapkershiliksizlik, sabırsızlıq hám shańaraqlıq turmısqa tayar emeslik usılardıń qatarına kiredi. Geyde ápiwayı kelispewshiliklerdi kelisim arqalı sheshiw múmkin bolsa da, ayırım shańaraqlarda qarım-qatnastıń joqlıǵı mashqalalardı jáne de tereńlestiredi.
Ajırasıwlardıń eń úlken soqqısı perzentlerge tiyedi. Ata-ananıń ajırasıwı balanıń ruwxıy jaǵdayı, bilim alıwı hám keleshektegi turmıslıq kózqarasına unamsız tásir kórsetiwi múmkin. Miyrim-shápáát hám itibardıń jetispewshiligi bolsa jas áwlad tárbiyasında hár qıylı mashqalalardı keltirip shıǵaradı.
Sol sebepli shańaraqtı saqlaw, erli-zayıplılar arasında óz-ara húrmet hám isenimdi bekkemlew áhmiyetli wazıypa esaplanadı. Jaslardı nekege puqta tayarlaw, shańaraqlıq qádiriyatlardı úgit-násiyatlaw, mashqalalardı tınısh jol menen sheshiw mádeniyatın rawajlandırıw ajırasıwlar sanın azaytıwǵa xızmet etedi.
Juwmaqlap aytqanda, shańaraq ajırasıwları jámiettiń rawajlanıwına unamsız tásir kórsetiwshi faktorlardan biri bolıp esaplanadı. Bekkem shańaraq - bekkem jámiyet girewi. Hár birimiz shańaraqlıq qádiriyatlardı qásterlep saqlawǵa úles qossaq, salamat hám abadan jámiyet qurıw jolında áhmiyetli qádem taslaǵan bolamız.
Nókis rayonı Ádillik bólimi PHAJ bólimi
1-dárejeli inspektorı Zarubayeva Gauxar Berdibay qızı