Янгиликлар
22
Jumıs jılı hám miynet dem alısı huqıqınıń payda bolıwı
Jumıs jılı hám miynet dem alısı huqıqınıń payda bolıwı
Miynet kodeksiniń 225-statyasına kóre, xızmetkerdiń birinshi miynet dem alısın alıw huqıqı ol jumısqa qabıl etilgen kúnnen baslap payda boladı. Keyingi jıllarda bolsa hár bir gezektegi miynet dem alısın alıw huqıqı tiyisli jumıs jılı baslanǵan kúnnen baslap, sol jıl juwmaqlanatuǵın kúnge shekem júzege keledi.
Jumıs jılınıń kalendar jılınan parqı - kalendar jıl hár dayım 1-yanvardan baslanıp, 31-dekabr kúni tamamlansa, jumıs jılı xızmetker miynet shártnaması tiykarında jumıs baslaǵan sáneden esaplanadı. Máselen, xızmetker 2021-jıl 2-yanvarda jumısqa kirgen bolsa, onıń birinshi jumıs jılı 2021-jıl 2-yanvardan 2022-jıl 1-yanvarǵa shekem, ekinshi jumıs jılı bolsa 2022-jıl 2-yanvardan 2023-jıl 1-yanvarǵa shekem dawam etedi.
Jumıs jılı da 12 aydan ibarat bolsa da, oǵan tek ǵana miynet dem alısı huqıqın beretuǵın jumıs stajına kirgiziletuǵın dáwirler qosıladı. Miynet kodeksiniń 226-statyasında usı staj quramına kiretuǵın waqıtlar belgilep berilgen.
Ayırım jaǵdaylarda jumıs jılınıń tamamlanıw sánesi kóshiriliwi múmkin. Máselen, xızmetkerdiń jumıs jılı 2022-jıl 9-iyulden baslanǵan bolsın. Normal jaǵdayda bul jumıs jılı 2023-jıl 8-iyulda tamamlanıwı kerek edi. Biraq xızmetkerge is haqısı saqlanbaytuǵın 60 kúnlik dem alıs berilgen. Nızamshılıqqa muwapıq, bunday dem alıstıń 14 kúni jumıs stajına kirgiziledi, qalǵan 46 kúni bolsa kirgizilmeydi. Sol sebepli jumıs jılınıń juwmaqlanıw sánesi 46 kúnge jıljıtıladı hám 2023-jıl 23-avgustta juwmaqlanadı. Kelesi jumıs jılı bolsa 2023-jıl 24-avgusttan baslanadı. Gezektegi miynet dem alısların esapqa alıw ushın maǵlıwmatlar xızmetkerdiń T-2 formasındaǵı jeke betinde sáwlelendiriledi. Eger jumıs jılı dawamında miynet dem alısı huqıqın bermeytuǵın dáwirler bar bolsa, olar haqqında jeke bettiń "Qosımsha maǵlıwmatlar" bóliminde tiyisli belgi kirgiziledi. Ayırım shólkemlerde bolsa jumıs jılınıń keshiktiriliwi haqqındaǵı maǵlıwmatlar miynet haqısı saqlanbaǵan dem alıs yamasa bala tárbiyası dem alısın beriw haqqındaǵı buyrıqlarda da kórsetiledi.
Juwmaqlap aytqanda, jumıs jılın durıs esaplaw hám oǵan tásir etiwshi faktorlardı anıq belgilew miynet dem alısı huqıqın nızamlı hám ádil támiyinlewde úlken áhmiyetke iye.
Nókis rayonı ádillik bólimi
Yuridikalıq xizmet kórsetiw orayı baslıģı G.Izekeeva