Янгиликлар
27
Ishga qabul qilish tartibi
O‘zbekiston Respublikasi Mehnat kodeksiga muvofiq, fuqarolar mehnat qilish, kasb va ish joyini erkin tanlash huquqiga ega. Xodimni ishga qabul qilish ish beruvchi va xodim o‘rtasida mehnat shartnomasi tuzish orqali amalga oshiriladi.
Mehnat kodeksining 124-moddasiga asosan ishga kirayotgan shaxs pasport yoki ID-karta, mehnat daftarchasi (mavjud bo‘lsa), harbiy hisob hujjatlari, ta’lim yoki malaka to‘g‘risidagi hujjatlar hamda qonunchilikda nazarda tutilgan boshqa hujjatlarni taqdim etadi. Ish beruvchi qonunchilikda nazarda tutilmagan hujjatlarni talab qilishga haqli emas.
Ishga qabul qilish jarayonida nomzodning kasbiy malakasi, ish tajribasi va lavozimga muvofiqligi o‘rganiladi. Ayrim toifadagi xodimlar uchun dastlabki tibbiy ko‘rikdan o‘tish majburiy hisoblanadi.
Mehnat shartnomasida ish joyi, lavozimi, mehnat vazifalari, ish haqi miqdori, ish vaqti, dam olish vaqti, mehnat sharoitlari hamda taraflarning huquq va majburiyatlari belgilanadi. Mehnat shartnomasi yozma shaklda tuziladi va ikki nusxada rasmiylashtirilib, taraflar tomonidan imzolanadi.
Mehnat kodeksiga muvofiq, ayrim hollarda xodim uchun dastlabki sinov muddati belgilanishi mumkin. Sinov muddati xodimning kasbiy tayyorgarligi va ishga layoqatini baholash maqsadida qo‘llaniladi.
Mehnat shartnomasi tuzilgandan so‘ng ish beruvchi xodimni ishga qabul qilish haqida buyruq chiqaradi va xodimni ushbu buyruq bilan tanishtiradi. Shuningdek, xodim ichki mehnat tartibi qoidalari, mehnatni muhofaza qilish, texnika xavfsizligi va yong‘in xavfsizligi talablari bilan tanishtiriladi.
Ishga qabul qilish jarayonida mehnat qonunchiligida belgilangan tenglik tamoyiliga rioya qilinishi shart. Jinsi, irqi, millati, tili, dini, ijtimoiy kelib chiqishi yoki boshqa holatlarga ko‘ra kamsitishga yo‘l qo‘yilmaydi.
Xulosa qilib aytganda, ishga qabul qilish qonunchilikda belgilangan tartib asosida amalga oshirilib, xodimning mehnat huquqlari va qonuniy manfaatlarini ta’minlashga xizmat qiladi.
Beruniy tumani adliya bo`limi
Yuridik xizmat ko`rsatish markazi bosh yuristkonsulti N.Omirbekov