Янгиликлар
07
Ekologiya tarawındaǵı huqıqbuzarlıqlardı islegenlik ushın finanslıq sankciyalar engiziledi
Ózbekstan Respublikasınıń 2026-jıl 4-may kúni “Tábiyattı qorǵaw haqqında”ǵı Nızamına kirgizilgen ózgerislerge bola, ekologiya, qorshaǵan ortalıqtı qorǵaw hám tábiyattan paydalanıw tarawındaǵı huqıqbuzarlıqlardı islegenlik ushın finanslıq sankciyalar engiziliwi belgilendi (Nızam 2026-jıl 5-avgust kúni kúshine kiredi).
Nızamǵa bola, dáryalardıń ózenlerin tazalawǵa hám jaǵalıqların bekkemlewge baylanıslı jumıslardı ámelge asırıw tártibin buzǵanlıq ushın yuridikalıq shaxslarǵa qarata qorshaǵan ortalıqqa jetkerilgen zıyannıń 3 esesi muǵdarında járiyma túrindegi finanslıq sankciyalar qollanıladı.
Suwlardı pataslaǵanı, sonday-aq, suw ob'ektlerine aqaba suwlardı aǵızıwǵa jol qoyıw shártleri haqqındaǵı talaplardı buzǵanı ushın yuridikalıq shaxslarǵa qorshaǵan ortalıqtı pataslaǵanı ushın tóleniwi kerek bolǵan kompensaciya tóleminiń 10 esesi muǵdarında járiyma túrindegi finanslıq sankciyalar qollanıladı.
YUridikalıq shaxslarǵa tiyisli bolǵan yamasa olarǵa biriktirilgen aymaqtaǵı tereklerdi qorǵaw hám saqlawǵa baylanıslı nızamshılıqta belgilengen ilajlardı kórmegenligi ushın yuridikalıq shaxslarǵa qorshaǵan ortalıqqa jetkerilgen zıyannıń 5 esesi muǵdarında járiyma túrindegi finanslıq sankciyalar qollanıladı
Tereklerdi hám shaqalardı nızamǵa qayshı túrde keskenlik, zıyanlandırǵanlıq, joq etkenlik yamasa basqa orınǵa kóshirip ótkizgenlik ushın yuridikalıq shaxslarǵa qarata qorshaǵan-ortalıqqa jetkizilgen zıyannıń bes esesi muǵdarında járiyma túrindegi finanslıq sankciyalar qollanıladı.
Sanaat shıǵındıların, xojalıq shıǵındıların hám basqa shıǵındılardı toplaw, tasıw, jaylastırıw, zıyansızlandırıw, saqlaw, utilizaciya qılıw, qayta islew, realizaciya qılıw waqtında tábiyattı qorǵaw talapların buzǵanlıq ushın yuridikalıq shaxslarǵa qarata shıǵındılar jaylastırılǵanlıǵı ushın tóleniwi lazım bolǵan kompensatsiya tóleminiń bes esesi muǵdarında járiyma túrindegi finanslıq sankciyalar qollanıladı.
Nókis qalası ádillik bólimi
YUXKO bas yuriskonsulti Sh.Ametov