Янгиликлар
15
“Qaraqalpaq júweri gúrtigi” taǵamı geografiyalıq kórsetkish sıpatında mámleketlik dizimnen ótkerildi
“Qaraqalpaq júweri gúrtigi” taǵamı geografiyalıq kórsetkish sıpatında mámleketlik dizimnen ótkerildi
Qaraqalpaqstan Respublikası aymaģına tán bolģan “Qaraqalpaq júweri gúrtigi” taģamı geografiyalıq kórsetkish sıpatında mámleketlik dizimnen ótkerildi.
Júweri qaraqalpaqlar ómirinde áhmiyetli xojalıq hám mádeniy áhmiyetge iye bolģan dástúriy eginlerden biri bolıp esaplanadı.
Júweri qaraqalpaqlardıń kúndelikli awqatlanıw sistemasında da áhmiyetli orın iyelegen. Onıń tiykarında tayarlanģan “Júweri gúrtik” taģamı toyımlı bolıp, ásirese qıs máwsiminde tiykarģı azıq-awqat wazıypasın atqarģan. Bul awqatlar uzaq waqıt ashlıqtı basıwı hám ápiwayı ónimlerden tayarlanıwı menen ajıralıp turģan.
XIX–XX ásir baslarında biyday hám gúrish jetispeytuģın dáwirlerde júweri xalıqtıń tiykarģı dán egisine aylangan.
Mádeniy jaqtan júweri gúrtik qaraqalpaqlardıń dástúriy awqatlanıw mádeniyatın sáwlelendiredi. Ol tek kúndelikli awqat emes, al qonaq kútiwde de tartılģan. Júweri gúrtik qaraqalpaqlardıń tábiyiy sharayatqa beyimlesken turmıs tárizi, diyqanshılıq tájiriybesi hám milliy asxanasınıń áhmiyetli elementlerinen biri bolıp pútkil Qaraqalpaqstan Respublikası aymaģında tayarlanadı.
“Qaraqalpaq júweri gúrtigi”n tayarlawda tómendegi tiykarģı ónimlerden paydalanıladı: gósh (mal, tawıq góshleri bolıwı múmkin), geshir, kartoshka, piyaz, júweri unınan ibarat.
Sonday-aq, geografiyalıq kórsetkish sıpatında dizimnen ótkeriliwi “Qaraqalpaq júweri gúrtigi” taģamınıń ataması hám dástúriy tayarlaw texnologiyasın huqıqıy jaqtan qorģaydı, sapa standartların bekkemleydi hám Qaraqalpaqstannıń aymaqlıq gastronomiyalıq brendi sıpatında úgit-násiyatlaw imkaniyatın keńeytedi.
Atap ótiw kerek, geografiyalıq kórsetkish – ónimniń belgili bir aymaqqa tiyisli ekenligin bildiriwshi hám sol aymaqtıń tábiyiy-klimatlıq hám de sociallıq-mádeniy faktorlarına baylanıslı ayrıqsha sapa hám abıraydı kepilleytuģın intellektual múlk obyekti sanaladı.
“Qaraqalpaq júweri gúrtigi” taǵamı geografiyalıq kórsetkish sıpatında 2026-jıl 14-may kúni GK 27-san menen Ózbekstan Respublikası Ádillik ministrligi tárepinen diziminen ótkerildi.
Dushanov Rasul Muratbayevich
Qaraqalpaqstan Respublikası Ádillik ministrligi
sektor baslıģı