Янгиликлар
13
Energiyanı únemlew baǵdarındaǵı reformalar
Energiyanı únemlew baǵdarındaǵı reformalar
Ekonomika tarmaqları rawajlanıp, xalıqtıń turmıs dárejesi jaqsılanǵanı sayın energiyaǵa bolǵan talapta asıp baradı. Sol sebepli mámleketimizde energiya islep shıǵarıw quwatı kólemin asırıw, elektr tarmaqaların modernizaciyalaw, xalqımızdı bul áhmiyetli resurs penen úziliksiz támiynlew mámleket siyasatı dárejesine kóterildi.
Usı tarawda alıp barılıp atırǵan túp reformalar nátiyjesinde aqırǵı altı jılda
5 mıń megabattan zıyat jańa elektr quwatları jaratıldı.
Búgingi kúnde bul baǵdardaǵı jumıslar sistemalı ráwishte dawam ettirilip, energiya islep shıǵarıw túpten rawajlandırılmaqta. Hátteki buǵan qosımsha suw, quyash, samal energetikası stanciyaları jaratılmaqta.
Esaplawlarǵa kóre, dúnyadaǵı paydalanatuǵın birlemshi energiya támiynatınıń besten bir bólegi qayta tikleniwshi energiya resurslarınan alınadı. Usı sektor 2040-jılǵa shekem hár jılı 2,6 procent ósiwdi dawam ettiriw kútilmekte.
Mámleketimiz úlken quyash energiyası resurslarına iye bolıp, jıldıń derlik 300 kúni quyashlı boladı. Aymaqlarımızdıń kóp bóleginde joqarı kórsetkish 5,5-6 kVt/m.di qurap onıń texnikalıq imkaniyatları 200 mln.tonna neft ekvivalentine teń. Bul paydalanıwdaǵı barlıq energiya resurslarınan úsh ese artıq ekenligin esapqa alsaq, bar imkániyattan nátiyjeli hám únemli paydalanıw jaqsı nátiyje boladı.
Elektr energiyası talabın qandırıwdıń jáne bir nátiyjeli usılı energiya resurslarınan paydalanıw esaplanadı. Quyash, samal, suw hám basqa tábiyat resurslarınan elektr energiyası islep shıǵarıw dúnyada álleqashan globallasıp barmaqta.
Sonlıqtan, keyingi jıllarda mámleketimizde ekonomika tarmaqları hám sociallıq tarawda energiya nátiyjeliligin asırıw, qayta tikleniwshi energiya resurslarınan paydalanıwdı rawajlandırıw boyınsha keń kólemli jumıslar ámelge asırılıp, energetika tarawın rawajlandırıwdıń huqıqıy tiykarları jaratıldı. “Qayta tikleniwshi energiya resurslarınan paydalanıw haqqındaǵı hám basqa qatar nızamlar tarawdıń huqıqıy tiykarları bolıp xızmet qılmaqta.
Sonı aytıp ótiw kerek, “jasıl” energetikanı rawajlandırıw insanlardı tek ǵana energiya menen támiynlewde emes, bálkim qorshaǵan ortalıq, tábiyattı qorǵawda da áhmiyetke iye. Mámleketimizde usı tarawdı qollap-quwatlawǵa ayrıqsha itibar qaratılıp, ótken qısqa dáwirde úlken nátiyjelerge erisildi.
Házirgi waqıtta mámleketimizde energetika turaqlılıǵın támiynlew maqsetinde jańa joybarlardı iske túsiriw hám elektr tarmaqların jańalaw hám modernizaciya qılıw boyınsha is-ilájlar turaqlı dawam ettirilmekte.
Ilimpazlardıń esap-sanaqlarına qaraǵanda, Ózbekstanda quyash stanciyaların qurıw arqalı jámi 600 milliard kVt/saat elektr energiyası islep shıǵarıw imkaniyatı bar. Bul respublikanıń házirde energiyaǵa bolǵan jámi mútájliginen 8 ese kóp degeni. 2030-jılǵa barıp mámlekette quyash elektr energiyası islep shıǵarıw quramıda qayta tikleniwshi resurslar úlesi 30 payızdan artıwı názerde tutılmaqta.
Eger joqarıdaǵı rejeler hám joybarlar ámelge asırılsa, sanı barǵan sayın kóbeyip atırǵan xalıq hám isbilermenlik subyektlerin tolıǵı menen elektr energiyası menen támiynlew imkaniyatı payda boladı.
Ulıwmalastırıp aytqanda, mámleketimizde tarawǵa tiyisli ámelge asırılıp atırǵan reformalar xalıq hám ekonomika tarmaqlarınıń elektr energiyasına bolǵan mútájligin támiynlewdiń jánede jaqsılanıwına imkániyat jaratıwı menen birge, energetika turaqlılıǵın támiynlewge xızmet etedi. Eń áhmiyetlisi, bul kólemdegi unamlı ózgerisler, jańalanıwlar adamlar turmısında óz sáwleleniwin tawmaqta.
Shımbay rayonı Ádillik bólimi
yuridikalıq xızmet kórsetiw orayı
bas yuriskonsultı D.Erjanov