Янгиликлар
13
Shańaraq muqaddes mákan
Shańaraq muqaddes mákan
Ózbekstan Respublikası Konstitutciyasına tiykar shańaraq bul jamiyettiń tiykarǵı buwını bolıp hám ol mámleket tárepinen qorǵaladı. Shańaraq -Insan ómiri mángiligi hám áwladlar dawamıylıǵın tamiyinlewshi qádiriyatlar besigi, keleshek áwladlar ushın biytakrar tarbiya qorǵanı sanaladı. Sonlıqtan, xalqımız ázelden shańaraqtı eń muqaddes mákan dep bilip, onıń mángiligin saqlaw ushın barlıq talaplarına amel etip jasap kelmekte. Shańaraq-insan ómirindegi eń áhmiyetli mákan bolıp, ol tek ǵana jasaw ornı emes, al tárbiya, mehir húrmet hám qádiriyatlar qáliplesetuǵın muqaddes dárgay bolıp esaplanadı. Shańaraq insannıń dáslepki mektebi esaplanadı. Bala áyne shańaraqta jaqsı-jamanın ajıratıwdı, adamlar menen múnásibette bolıwdı, ómirge bolǵan múnásibetti úyrenedi.
Shańaraq muqaddes deliniwiniń tiykarǵı sebebi-onda insannıń ruwxıy hám mánawiy tiykarı jaratıladı. Ata-ananıń mehir-muhabbatı, itibarı hám tárbiyası arqalı perzent kámil insan bolıp kamalǵa keledi. Sonıń ushın da shańaraqta húkim súretuǵın ortalıq-tınıshlıq isenim hám mehirge tiykarlanǵan bolıwı kerek.
Shańaraq-bul "mehir hám muhabbat mákanı", tárbiya hám ádep deregi, insaniylıq qáliplesetuǵın orın, áwladlar dawamlılıǵın támiyinlewshi dárgay.
Eger shańaraqta húrmet, mehir hám túsinisiw bolsa jámiyet te salamat boladı. Sebebi jámiyettiń tiykarı - bul shańaraq. Juwmaqlap aytqanda, shańaraq - bul insan ushın eń muqaddes mákan. Onı qásterlep saqlaw, qádirlew hám bekkemlew hár birimizdiń minnetimiz.
Toydıq Mambetmuratova
Bozataw rayonı ádillik bólimi
PHAJ bólimi baslıǵı