Янгиликлар
01
“Úgit-násiyat poezdi” Qaraqalpaqstanda…
“Úgit-násiyat poezdi” Qaraqalpaqstanda…
Ózbekstan Respublikası Prezidenti Administraciyası tapsırması menen tastıyıqlanǵan "Qaraqalpaqstan Respublikasında jaslarǵa baylanıslı reformalardıń nátiyjeliligin arttırıw, olardıń qızıǵıwshılıqları hám niyetlerin júzege shıǵarıw boyınsha jańa baslamalar, innovaciyalıq ideyalardı óz ishine alǵan kompleksli ilajlar baǵdarlaması"nıń orınlanıwın támiyinlew maqsetinde usı jıldıń 27-30-aprel kúnleri Tashkent mámleketlik yuridikalıq universiteti rektorı basshılıǵında professor-oqıtıwshı hám studentlerden ibarat "Úgit-násiyat poezdi" joybarın ámelge asırıwshı topar Qaraqalpaqstan Respublikasında bolıp, Nókis qalası, Nókis hám Kegeyli rayonındaǵı jaslar menen ushırastı.
Ilajlar dáslep, Tashkent mámleketlik yuridika universiteti hám Berdaq atındaǵı Qaraqalpaq mámleketlik universiteti arasında óz-ara birge islesiw haqqındaǵı kelisim memorandumına qol qoyıwdan baslandı.
Memorandumda, studentlerdiń ámeliyatın hám professor-oqıtıwshılardıń stajirovkaların shólkemlestiriw, ilimiy laboratoriyalar hám materiallıq-texnikalıq bazanı óz-ara paydalanıw, sırt elli ekspertlerdiń qatnasıwında seminar, trening hám sheberlik sabaqların ótkeriw, sonday-aq, studentler, magistrler hám doktorantlardıń ilimiy jumıslarına "ustaz-shákirt" sisteması tiykarında basshılıq etiw názerde tutılǵan.
Bunnan soń, Ádillik baǵında “Eko akciya” ótkerildi. Akciyada Tashkent mámleketlik yuridikalıq universiteti rektorı, professor Baxshillo Xodjaev basshılıǵındaǵı úgit-násiyatlaw toparı aǵzaları, ekologiyalıq akciya belsendileri, Qaraqalpaqstan Respublikası Ádillik ministrligi basshıları hám Qaraqalpaq mámleketlik universiteti yuridika fakulteti studentleri qatnastı.
Iygilikli baslama dawamında aymaqtı kóklemzarlastırıw, jasıl maydanlardı keńeytiw hám qorshaǵan ortalıqtı abadanlastırıwǵa qaratılǵan keń kólemli jumıslar ámelge asırıldı. Qatnasıwshılar tárepinen kóplegen náller egilip, aymaqtıń ekologiyalıq jaǵdayın jaqsılawǵa múnásip úles qosıldı.
Bul baslama mámleketimizde "jasıl mákan" ideyası tiykarında ekologiyalıq turaqlılıqtı támiyinlew, tábiyattı saqlaw hám keleshek áwlad ushın salamat ortalıq jaratıwǵa qaratılǵan izbe-iz háreketlerdiń áhmietli bólegi bolıp, Ózbekstan boylap "ekologiyalıq belbew"di qáliplestiriw, jasıl aymaqlardı izbe-iz keńeytiw jolındaǵı jumıslardıń ámeliy dawamı ekenin atap ótiw kerek.
Ilajlar sheńberinde, Nókis rayonında Ádillik seyili de ótkerildi. Seyil sheńberinde xalıqtıń huqıqıy sawatlılıǵın arttırıw, puqaralardıń múrájatların tikkeley orınlarda úyreniw hám jaslardı sociallıq-huqıqıy processlerge jedel tartıw maqsetinde shólkemlestirilgen joybarda Tashkent mámleketlik yuridikalıq universiteti rektorı Baxshillo Xodjaev basshılıǵındaǵı universitet jámááti hám studentler qatnasıp, puqaralar ushın kóshpeli qabıllaw ótkerildi.
Kóshpeli qabıllaw procesinde puqaralardıń jer, kadastr, salıq, kredit, kommunallıq xızmetler hám basqa da baǵdarlardaǵı múrájatları tıńlandı. Ilaj dawamında 20 dan aslam múrájat qabıl etilip, olardıń 12 si ornında huqıqıy túsinik beriw arqalı sheshildi, 8 múrájat tiyisli tártipte qadaǵalawǵa alındı.
Sonday-aq, Tashkent mámleketlik yuridikalıq universiteti studentleri tárepinen xalıqqa huqıqıy másláhátler berildi, puqaralar tiyisli shólkemler hám xızmetlerge jiberildi. Sonday-aq, kóshpeli mámleketlik xızmetlerden paydalanıw, advokat, huqıqtanıwshı, notarius hám mediator xızmetleri haqqında maǵlıwmatlar berildi.
"Ádillik seyili" sheńberinde shólkemlestirilgen kórgizbeler, huqıqtı qorǵaw uyımlarınıń arnawlı texnikaları hám xızmet qurallarınıń kórgizbesi, sport ilajları qatnasıwshılarda úlken qızıǵıwshılıq oyattı.
Sonıń menen birge, studentler tárepinen "Teńlesime huqıqıy járdem," "Meniń máhállemde jınayat bolmaydı" hám "Elimiz keleshegi - nızamǵa boysınatuǵın hám huqıqbuzarlıqqa shıdamsız jaslar menen" ideyaları tiykarında úgit-násiyat ilajları da ótkerildi. Bul baslamalar jaslar arasında huqıqbuzarlıqlardıń aldın alıw, nızamǵa húrmet hám juwapkershilik sezimin kúsheytiwge xızmet etti.
Bunday túrdegi ilajlar usı jıl juwmaǵına shekem grafik tiykarında hár ayda ótkeriliw arqalı barlıq rayon (qala)lardı qamtıp alıw maqset etilgen.
Nurya Berdiniyazova
Qaraqalpaqstan Respublikası
Ádillik ministrligi sektor baslıǵı