Янгиликлар
01
Qaraqalpaqstan Respublikası Ádillik ministrligi tárepinen 2026-jıldıń 1-sheregi dawamında ámelge asırılǵan jumıslar haqqında maǵlıwmat berildi.
Ministrliktiń tiykarǵı wazıypalarınan biri birden-bir mámleketlik huqıqıy siyasattı júrgiziw, norma dóretiwshiligi jumısların muwapıqlastırıw, mámleketlik hám xojalıq basqarıw, jergilikli mámleketlik hákimiyatı uyımları jumıslarında huqıqtı qollaw ámeliyatın izshil hám bir túrde támiyinlew boyınsha ilajlardı ámelge asırıw bolıp tabıladı.
Bul baǵdarda ministrlik tárepinen 2026-jıldıń 1-sheregi dawamında bir qatar jumıslar ámelge asırıldı.
Atap aytqanda, fizikalıq hám yuridikalıq shaxslardan ministrlik hám rayon (qala) ádillik bólimlerine jámi 2 084 múrájat kelip tústi, usınnan 1 266 múrájat (60,7 payızı) qanaatlandırılıp, múrájatshılar huqıqları tiklendi.
Sudlarǵa jámi summası 542 mln swmnan artıq 309 dana dawa arzaları kiritilip, puqaralardıń huqıqları sud tárepinen tikleniwine erisildi.
Ministrlikke kelip túsken múrájatlar analizlengende múrájatlardıӊ kópshiligin miynet, úy-jay, sociallıq qorǵaw, mámleketlik xızmetler kórsetiw hám puqaralıq halatı aktlerin jazıw tarawları menen baylanıslı ekenligi kórsetpekte.
Bunnan tısqarı, “ijro.gov.uz” sisteması arqalı Qaraqalpaqstan Respublikası Ministrler Keńesi hám aymaqlardaǵı mámleketlik organlar hám shólkemlerine kelip túsken tapsırmalardıń orınlanıwı hár ayda tallawdan ótkerilip, nátiyjesi boyınsha tiyisli sharalar kóriw ushın Qaraqalpaqstan Respublikası Joqarǵı Keńesine kiritilmekte.
Anıqlanǵan nızambuzılıwı jaǵdayları hám olardı saplastırıw tarawında ministrlik tárepinen mámleketlik uyımlar hám shólkemlerde nızamshılıqtıń durıs tártipke salınıwı ústinen turaqlı ráwishte monitoring alıp barılmaqta.
Usınıń nátiyjesinde, 2026-jıldıń 1-sheregi dawamında mámleketlik uyımlar hám shólkemler tárepinen 5 061 jaǵdayda nızam buzılıwına jol qoyılǵanlıǵı anıqlandı.
Anıqlanǵan nızambuzılıwı jaǵdayların saplastırıw boyınsha 286 usınıs, 22 eskertiwler kiritildi;
169 mámleketlik uyım hám shólkemlerde úyreniwler ótkerildi;
mámleketlik uyımlar hám shólkemlerdiń lawazımlı hám juwapker xızmetkerlerinen 172 shaxs hákimshilik juwapkershilikke tartıldı;
kiritilgen usınısnamalarǵa tiykar puqaralarımızdıń
310 mln swm qarjıları qaytarıldı hám tólep berildi.
Mámleketlik emes kommerciyalıq emes shólkemleri jumısların muwapıqlastırıw tarawında Respublikada jámi 638 mámleketlik emes kommerciyalıq emes shólkemleri, sonday-aq, 67 diniy shólkemler, usınnan 65 islamiy, 2 naislamiy (tolıq Evangeliya xam pravoslav xristian shirkeuleri) hámde 16 tóreshilik sudları óz iskerligin kórsetip kelmekte.
Mámleketlik emes kommerciyalıq emes hám diniy shólkemler menen baylanıslı barlıq mámleketlik xızmetlerin kórsetiw e-ngo.uz saytı arqalı tolıq ámelge asırılmaqta.
Ministrlik xızmetkerleri tárepinen 8 mıńnan zıyat úgit-násiyat ilajları ótkerildi.
Usınnan, 708 si ǵalaba xabar qurallarında ámelge asırıldı hám de 3612 mıńnan aslam awızeki huqıqıy úgit-násiyat ilajları ótkerildi.
Ministrlik tárepinen huqıqıy úgit-násiyat hám aǵartıwshılıq tarawında jaӊadan qabıl etilgen 277 normativ-huqıqıy hújjetlerdi tastıyıqlanǵan dizim boyınsha Respublika aymaǵındaǵı 121 mámleketlik uyım hám shólkemlerge jetkerip berildi.
YUridikalıq xızmetler tarawında Respublikada rayon (qala) ádillik bólimleri quramında 17 YUridikalıq xızmet kórsetiw orayları shólkemlestirildi.
Búgingi kúnde oraylar tárepinen 20 mámleketlik uyımlar hám shólkemlerine, 726 mámleketlik ulıwma bilim beriw mekteplerine, 436 mámleketlik mektepke shekemgi bilimlendiriw shólkemlerine hámde 97 kóp tarmaqlı oraylasqan hám shaӊaraqlıq poliklinikalarına yuridikalıq xızmetler kórsetilmekte.
Huqıqıy xızmet kórsetiw tarawında házirde Qaraqalpaqstan Respublikasında 67 jeke ámeliyat penen shuǵıllanıwshı notariuslar óz jumısların alıp barmaqta.
Bunnan tısqarı, 220 dana advokatlıq dúzilmeleri dizimnen ótken. Sonnan, byurolar – 200, firmalar – 18, kollegiya – 2 ni quraydı.
Mámleketlik xızmetlerin kórsetiwshi uyımlar tárepinen esabat dawirinde 1 919 nızambuzıwshılıq jaǵdaylarına jol qoyılǵan.
Tarawdaǵı kemshiliklerdi saplastırıw maqsetinde mámleketlik uyımlar iskerliginde 5 monitoringler ótkerildi, anıqlanǵan nızambuzıwshılıqlardı saplastırıw hám aldın alıw maqsetinde 9 usınıs kiritildi, 90 lawazımlı shaxsları hám juwapker xızmetkerleri hákimshilik juwapkershilikke tartıldı.
Mámleketlik xızmetleri orayları hám PHAJ organları iskerligin muwapıqlastırıw tarawında Respublikamızda 17 mámleketlik xızmetleri orayları hám de olardıń alıs aymaqlarında jaylasqan 8 filialları tárepinen xalıqımızǵa mámleketlik xızmetler kórsetilmekte.
Mámleketlik xızmetleri orayları 17 rayon hám Nókis qalasında tazadan qurılǵan zamanagóy hám barlıq qolay sharayatqa ie imarat penen támiyinlendi.
Mámleketlik xızmetler orayları tárepinen jámi 349 mıńan aslam mámleketlik xızmetler kórsetildi.
166 mıńnan aslam xızmetler onlayn tártipte kórsetildi.
4 173 isbilermenlik subektleri mámleketlik dizimnen ótkerildi.
PHAJ uyımarınıń jumısların muwapıqlastırıw tarawında 2026-jıl 1-sheregi dawamında 14 mıń 097 akt jazıwları Usınnan, tuwılǵanlıqtı dizimge alıw 7 977, nekeni dizimge alıw 2 734, nekeden ajırasqanlıq 534, ólimdi dizimge alıw jaǵdayı 2 852 ni quraydı.
Sonıń menen qatarda, PHAJ bólimleri tárepinen 2 mlrd 585 mln sumnan artıq mámleketlik bajıları hám gerb jıyımı pulları óndirilgen.
Bunnan tısqarı, rayon (qala) PHAJ bólimleri tárepinen arxivlerde qaǵaz kórinisinde saqlanıp atırǵan 3 mln. 700 mıńnan artıq akt jazıwları “PHAJdıń birden-bir elektron arxivi” málimleme sistemasına kiritilip, sanlastırılıwı támiyinlendi.
Juwmaqlap aytqanda, hár bir islengen jumıslar artında insan hám jámiet mápleri turǵanlıǵın tereń ańlaǵan halda, aldaǵı iskerligimizde xızmet wazıypamızdı ele de juwapkershilik penen dawam ettirip, jámiette nızamlılıqtı elede bekkemlewge hám de insan huqıqları nátiyjeli qorǵalıwın támiyinlewdiń barlıq ilajları kóriliwine ayrıqsha itibarımızdı qaratamız.
Qaraqalpaqstan Respublikası
Ádillik ministrligi sektor baslıǵı Azamat Ernashov