Янгиликлар
31
Sociallıq járdem hám kem támiyinlengen shańaraqlardı qollap-quwatlaw - jámiyet turaqlılıǵınıń áhmiyetli faktorı
Sociallıq járdem hám kem támiyinlengen shańaraqlardı qollap-quwatlaw - jámiyet turaqlılıǵınıń áhmiyetli faktorı
Insan qádirin ulıǵlaw, xalıqtıń mútáj qatlamların qollap-quwatlaw hár qanday mámleketlik siyasattıń tiykarǵı baǵdarlarınan biri bolıp esaplanadı. Búgingi kúnde elimizde ámelge asırılıp atırǵan reformalar da bárinen burın insan máplerin támiyinlewge, puqaralardıń múnásip turmıs keshiriwi ushın sharayat jaratıwǵa qaratılǵan.
Usı jıldıń aprel ayınan baslap sociallıq járdem hám kem támiyinlengen shańaraqlardı qollap-quwatlaw tarawında bir qatar áhmiyetli jańalıqlar ámelge kiritiliwi kútilmekte. Bul jańalıqlar xalıqtıń járdemge mútáj qatlamlarına mánzilli járdem kórsetiwdi jáne de kúsheytiw, olardıń turmıs sapasın jaqsılaw hám jámiyette sociallıq ádillikti támiyinlewge xızmet qıladı.
Bárinen burın, kem támiyinlengen shańaraqlardı anıqlaw hám olarǵa mánzilli járdem kórsetiw sisteması jáne de jetilistirilmekte. Bul arqalı haqıyqattan da járdemge mútáj bolǵan shańaraqlar óz waqtında mámleketlik qollap-quwatlawǵa iye boladı. Mánzilli sociallıq járdem sisteması ashıq-aydın hám ádillik tiykarda ámelge asırılıwı bolsa xalıqtıń mámleketke bolǵan isenimin jáne de bekkemleydi.
Sonday-aq, kem támiyinlengen shańaraqlarǵa tek ǵana materiallıq járdem beriw menen sheklenip qalmastan, olardı jumıs penen támiyinlew, kásip-ónerge oqıtıw hám isbilermenlik jumısın baslawı ushın sharayat jaratıwǵa ayrıqsha itibar qaratılmaqta. Sebebi insanǵa bir mártelik járdem beriw emes, al onıń óziniń dáramat tabıwına járdemlesiw eń durıs hám nátiyjeli jol bolıp esaplanadı.
Ásirese, hayal-qızlar hám jaslardı qollap-quwatlaw máselesine ayrıqsha áhmiyet berilmekte. Olar ushın kásip-óner úyreniw, isbilermenlik penen shuǵıllanıw, jańa jumıs orınların jaratıw boyınsha keń imkaniyatlar jaratılmaqta. Bul bolsa tek ǵana shańaraqlardıń abadanlıǵın támiyinlewge emes, al jámiyettiń rawajlanıwına da xızmet etedi.
Jámiyette birde-bir shańaraq qıyın jaǵdayǵa tússe, bul pútkil jámiyet ushın táshwishli jaǵday bolıp esaplanadı. Sonıń ushın da kem támiyinlengen shańaraqlardı qollap-quwatlaw - bul tek ǵana mámlekettiń emes, al hár birimizdiń ulıwma wazıypamız bolıp esaplanadı. Máhálle, jámiyetshilik hám barlıq juwapker shólkemler birgelikte háreket etkende ǵana bul baǵdarda joqarı nátiyjelerge erisiw múmkin.
Juwmaqlap aytqanda, usı jıldıń aprel ayınan baslap ámelge kiritilip atırılǵan sociallıq qollap-quwatlawǵa baylanıslı jańalıqlar xalıqtıń turmıs dárejesin jaqsılaw, sociallıq ádillikti támiyinlew hám jámiyette turaqlılıqtı bekkemlewge xızmet qıladı. Insan qádiri ulıǵlanǵan jámiyette bolsa rawajlanıw hám abadanlıq álbette támiyinlenedi.
Joldasov Jaqsılıq Maratovich
Kegeyli rayonı ádillik bólimi
Yuridikalıq xızmet kórsetiw orayı baslıǵı