Янгиликлар
30
Qala transportında ayırım kategoriyadaǵı puqaralarǵa biypul júriw huqıqı: jeńilletilgen transport kartaların beriw tártibi tastıyıqlandı
Ózbekstan Respublikasında xalıqqa kórsetilip atırǵan mámleketlik xızmetlerdi bunnan bılay da jetilistiriw hám sociallıq qorǵawǵa mútáj puqaralardı qollap-quwatlaw maqsetinde áhmiyetli qarar qabıl etildi.
2022-jıl 16-sentyabr kúni Ózbekstan Respublikası Ministrler Kabinetiniń 507-sanlı qararı menen "Qala jolawshıları transportında ayırım kategoriyadaǵı puqaralarǵa biypul júriw huqıqın beretuǵın jeńilletilgen transport kartaların beriw boyınsha mámleketlik xızmetler kórsetiwdiń hákimshilik reglamenti" tastıyıqlandı.
Bul qarar puqaralarǵa qolaylıq jaratıw, transport xızmetlerinen paydalanıwda sociallıq teńlikti támiyinlew jáne mámleketlik xızmetlerdi zamanagóy hám ashıq-aydın tárizde kórsetiwge qaratılǵan.
Jeńillikli transport kartası degen ne?
Jeńilletilgen transport kartası - bul ayırım kategoriyadaǵı puqaralarǵa qalalıq jámiyetlik transportında biypul yamasa jeńilletilgen tiykarda háreketleniw huqıqın beretuǵın arnawlı elektron karta bolıp esaplanadı.
Ol arqalı puqaralar avtobus, metro hám basqa da qalalıq jolawshı transportınan paydalanıwda ózlerine berilgen jeńilliklerden paydalanıwı múmkin.
Kimler jeńillikli kartanı alıw huqıqına iye?
Usı reglamentke muwapıq, jeńilletilgen transport kartaları mámleket tárepinen sociallıq qollap-quwatlanatuǵın ayırım kategoriyadaǵı puqaralarǵa beriledi.
Sonnan:
- mayıplıǵı bolǵan shaxslar;
- urıs hám miynet veteranları;
-mámleket tárepinen belgilengen basqa sociallıq qorǵawǵa mútáj kategoriyadaǵı puqaralar.
Anıq kategoriyalar ámeldegi nızamshılıq hújjetlerine muwapıq belgilenedi.
Mámleketlik xızmet qalay kórsetiledi?
Jeńilletilgen transport kartasın alıw ushın puqaralar:
-mámleketlik xızmetler orayları arqalı;
-yamasa elektron túrde tiyisli málimleme sistemaları arqalı múrájat etiwi múmkin.
Arza kórip shıǵılǵannan soń, belgilengen tártipte puqaraǵa jeńilletilgen transport kartası rásmiylestirilip beriledi.
Qarardıń áhmiyeti sociallıq qorǵawǵa mútáj puqaralarǵa qolaylıq jaratadı, qala transport sistemasında zamanagóy elektron xızmetlerdi engizedi hámde mámleketlik xızmetler kórsetiw procesiniń ashıq-aydınlıǵın hám nátiyjeliligin arttıradı. Nátiyjede, puqaralar transport xızmetlerinen paydalanıwda óz huqıqların jáne de ańsat hám qolaylı tárizde ámelge asırıw imkaniyatına iye boladı.
Nókis qalası ádillik bólimi
MXO aǵa qánigesi G.Utepbergenova