Янгиликлар
30
Ólim jazası qadaǵan etildi
Insan huqıqlarınıń fundamenti - bul sózsiz, jasaw huqıqı. Ólim jazası bolsa - bul huqıqtıń qarama-qarsı elementi bolıp tabıladı. BMSh, Evropa Keńesi hám Evropa Awqamı kóp jıllardan beri dúniya mámleketlerin ólim jazasın biykar etiwge shaqırıp keledi. Qalaberse, úyreniwler nátiyjelerinde awır jınayatlar ushın qollanıw názerde tutılǵan ólim jazası bunday jınayatshılıqtı uslap turmawı hám qáwipsizlew jámiyet qurıwǵa aytarlıqtay xızmet etpewi anıqlanǵan.
Ózbekstan Respublikasında jınayıy jazalardı liberallastırıwdaǵı birinshi qádem 1994-jılda qoyılǵan edi. Sol dáwirden baslap jınayat nızamshılıǵındaǵı ólim jazasın qollaw múmkin bolǵan jınayatlar sanı kemeyip bara berdi. Ólim jazasın biykar etiw hám onı ómirlikke yamasa uzaq múddetke azatlıqtan ayırıw jazası menen almastırıw maqsetinde 2005-jıl 1-avgust kúni “Ózbekstan Respublikasında ólim jazasın biykar etiw haqqında”ǵı Prezident Pármanı qabıl etildi.
2007-jıl 11-iyulda qabıl etilgen “Ólim jazasın biykar etiw múnásebeti menen Ózbekstan Respublikasınıń ayrım nızam hújjetlerine ózgeris hám qosımshalar kirgiziw haqqında”ǵı Ózbekstan Respublikası Nızamı 2008-jıl 1-yanvardan kúshke kirdi. Sonıń menen Ózbekstan dúniyadaǵı ólim jazası biykar etilgen 135-mámleket boldı.
Prezident Shavkat Mirziyoyevtiń bergen usınısı menen “Ózbekstan Respublikasında ólim jazası qadaǵan etiledi” degen sózler jańalanǵan konstituciyanıń 25-statyasında óz ornın iyeledi hám ólim jazasınıń qayta tiklenbewi kepillendi.
Nókis qalası ádillik bólimi
YXKO bas yuriskonsultı G.Dauletova