Янгиликлар
19
Nekeleniwshi shaxslardı medicinalıq kórikten ótkeriw tártibi
Salamat shańaraqtı qáliplestiriw, násilge baylanıslı bolǵan hám tuwma keselliklerge shalınǵan balalardıń tuwılıwınıń aldın alıw, sonday aq kesellikke shalınǵan yamasa mayıp balalardıń tuwılıwınıń aldın alıw nekeleniwshi shaxslardı medicinalıq kórikten ótkeriwdiń tiykarǵı maqseti bolıp esaplanadı.
Shańaraq kodeksiniń 17-statyası «Nekeleniwshi shaxslardı medicinalıq kórikten ótkeriw» dep ataladı. Nekeleniwshi shaxslar mámleket Den-sawlıqtı saqlaw mekemelerinde biypul medicinalıq kórikten ótkeriliwi, medicinalıq kórikten ótiw kólemi hám tártibi Ózbekstan Respublikası Ministrler Keńesi tárepinen belgileniwi, nekeleniwshi shaxslar eliw jastan asqan bolsa, sonday aq ayrıqsha jaǵdaylarda, hámledarlıq, bala tuwılıwı, bir táreptiń keselligi bar bolǵanda medicinalıq kórikten óz razılıǵı menen ótkiziliwi belgilengen.
Shańaraq kodeksiniń 17-statyasınıń orınlanıwın támiynlew maqsetinde Ministrler Keńesi 2003-jıl 25-avgust kúni №365-sanlı qararı menen «Nekeleniwshi shaxslardı medicinalıq kórikten ótkeriw haqqında» ǵı Nızamdı tastıyıqladı.
Nızamǵa tiykar nekeleniwshi shaxslar 5 tárepleme:ruwxıy kesellikler, narkologik kesellikler, teri kesellikleri, tuberkulez keselligi, AIJS/AIV(SPID) keselliklerinen medicinalıq kórikten ótkeriledi.
Nekeleniwshi shaxslarǵa PHAJ bólimleri tárepinen medicinalıq kórikten ótiw ushın jergilikli yamasa waqtınsha jasaw ornındaǵı medicinalıq birlespelerden kórikten ótiw ushın jollama beriledi. Medicinalıq kórikten ótiw ushın berilgen jollamalar PHAJ bólimlerinde neke dúziw haqqındaǵı arzalardı kiriske alıw kitabında dizimge alınadı.
Medicinalıq kórikten ótiw múddeti nekeleniwshi shaxslar medicinalıq birlespege múráját etken kúnnen baslap eki hápteden aspawı kerek. Nekeleniwshi shaxslarǵa medicinalıq kóriktiń nátiyjesi haqqında maǵlıwmat beriledi. Maǵlıwmat medicina birlespesiniń móri hám baslıǵınıń qolı menen tastıyıqlanadı.
Nekeleniwshi shaxslarda tekseriw nátiyjesinde emleniwdi talap etiwshi kesellikler anıqlanǵan jaǵdayda, olar belgilengen tártipte tiyisli emlew birlespelerine jiberiledi.
Eger nekeleniwshi shaxslarda medicinalıq kórikten ótkeriw nátiyjesinde olardıń birewinde yamasa ekewinde da Nızamda kórsetilgen kesellik anıqlanǵan jaǵdayda, nekeni dizimge alıw táreplerdiń usı tekseriw nátiyjelerinen xabardarlıǵı tastıyıqlanǵannan keyin ámelge asırıladı.
Shımbay rayonı ádillik bólimi
Mámleketlik xızmetler orayı bas qaniygesi R.Nurullaeva