Янгиликлар
11
Mámleketlik xızmetler orayları - puqaralar ushın qolaylı hám zamanagóy xızmet ornı
Búgingi kúnde elimizde mámleketlik basqarıw sistemasın bunnan bılay da jetilistiriw, xalıqqa qolaylıq jaratıw hám byurokratiyalıq tosqınlıqlardı azaytıw maqsetinde mámleketlik xızmetler kórsetiw sisteması izbe-iz rawajlandırılmaqta. Bul baǵdarda Mámleketlik xızmetler orayları puqaralarǵa operativ, ashıq-aydın hám qolaylı xızmet kórsetiwde áhmietli orın ielemekte.
Mámleketlik xızmetler orayları xalıqqa bir orında túrli mámleketlik xızmetlerden paydalanıw imkaniyatın jaratıp bermekte. Burın puqaralar ápiwayı bir hújjetti rásmiylestiriw ushın bir neshe shólkemlerge múrájat etiwi, kóp waqıt hám qarjı jumsalıwına tuwra keletuǵın edi. Házirgi kúnde bolsa oraylar arqalı kóplegen xızmetler "bir ayna" principi tiykarında kórsetilmekte.
Oraylarda tuwılıwdı dizimge alıw, nekeni rásmiylestiriw, isbilermenlik subektlerin dizimge alıw, kadastr hújjetlerin rásmiylestiriw, túrli maǵlıwmatnamalardı alıw, licenziya hám ruxsatnamalardı rásmiylestiriw sıyaqlı onlaǵan xızmetler kórsetiledi. Bul bolsa puqaralardıń waqtın únemlew menen birge, mámleketlik uyımlardıń jumısınıń ashıq-aydınlıǵın da támiyinleydi.
Mámleketlik xızmetler oraylarında zamanagóy málimleme texnologiyalarınan keńnen paydalanılmaqta. Elektron náwbet sisteması, onlayn múrájat jiberiw imkaniyatı hám xızmetlerdiń elektron túrde kórsetiliwi puqaralar ushın úlken qolaylıq jaratpaqta. Bunnan tısqarı, oraylarda xızmet kórsetiw mádeniyatına ayrıqsha itibar qaratılıp, maman qánigeler xalıqqa másláhát hám ámeliy járdem kórsetip kelmekte.
Sonday-aq, mámleketlik xızmetler orayları xalıqtıń huqıqıy sawatlılıǵın arttırıwda da áhmietli rol atqaradı. Puqaralar orayǵa múrájat etkende olarǵa kerekli hújjetler, tártip-qaǵıydalar hám mámleketlik xızmetlerden paydalanıw usılları haqqında tolıq túsinikler beriledi.
Juwmaqlap aytqanda, Mámleketlik xızmetler orayları mámleket hám xalıq arasındaǵı isenimdi bekkemleytuǵın, puqaralar ushın qolaylı hám nátiyjeli xızmet kórsetiw sistemasın qáliplestiretuǵın áhmietli orınlardan biri bolıp esaplanadı. Keleshekte bul sistema jáne de rawajlanıp, xalıqqa kórsetiletuǵın xızmetlerdiń sapası hám túrleri jáne de keńeyip barıwı sózsiz.
Nókis qalasi ádillik bólimi
Mámleketlik xızmetler orayi jetekshi qánigesi U.Kurbanbayev