Янгиликлар
10
Nekeden ótiwge juwapkershilik penen qarayíq!
Eger hayal salamat bolsa, onnan on eki múshesi pútin salamat bala dúnyaǵa keledi. Ol ózin baxıtlı ana sezinip, perzentin bawırına bassa, bunnan pútkil shańaraq quwanıshqa bólenedi. Bul bolsa jas shańaraqtıń awızbirshilikli hám keregesi bekkem shańaraqlar qatarınan orın alıwına tiykar jaratadı.
Hayal-qızları qádirlengen jurttıń keleshegi párawan hám abadan boları sózsiz. Sonlıqtanda, mámleketimizde nawqıran áwladtı tárbiyalawǵa ayrıqsha itibar hám ǵamqorlıq kórsetilip kelinbekte. Eń áhmiyetlisi, hayal-qızlardıń densawlıǵın saqlaw, ana hám bala salamatlıǵın qorǵaw mámleketlik siyasat dárejesine kóterilgen. Bul tosınnan emes.
Hár tárepleme jetik hám sıylasıqlı shańaraqta erjetken perzentler fizikalıq tárepten salamat, ruwxıy jaqtan sergek, intellektual qábileti joqarı bolıp kamalǵa keledi. Bunday shańaraq perzentleri, nekeden ótip, shańaraq qurǵanda ómirde qıynalmay, jámiyette óz ornın taba aladı.
Al, ajırasıw-sózi esitken qulaqqa suwıq hám jaǵımsız esitiledi. Ókinishke bola, bunday sóz zamanlaslarımız arasında jeke siyrek bolsa da esitilip turadı. Kimlerdiń perzenti bolmasın, qatıqtay uyıp jasap atırǵan shańaraqta bereket qashıp, ajırasıwǵa sheshim baylasa naǵız baxıtsızlıq júz beredi. Mine usınday kewilsiz jaǵdayǵa túsip qalıwdan hár birimiz saqlanıwımız kerek.
Kúndelikli turmısta shańaraqta quwanıshlı kúnlerde yamasa mashkalalar da júz beriwi múmkin. Eger shańaraq aǵzaları ádep-ikramlı, tınısh-tatıw, óz qádiri-qımbatın saqlay alatuǵın bolsa, olardıń ómiride mazmunǵa bay boladı.
Erli zayıplılar shańaraqlıq turmıs máselelerin birgelikte oylasıp-keńesip sheshiwde teńdey huqıqqa ie. Yaǵnıy, bunnan olar balalar tárbiyası hám shańaraqlıq turmıstıń basqa máselelerin birge sheshedi degen mazmun kelip shıǵadı.
Juwmaqlastırıp aytqanımızda, shańaraqlar tınısh-tatıw bolsa, jámiyetimizde ajırasıwlardıń azayıwına unamlı tásirin tiygizeri anıq.
Nókis qalası ádillik bólimi
PHAJ bóliminiń inspektorı G.Opaeva