Янгиликлар
02
Mútajligi bar shańaraqlarǵa energiya qárejetleri ushın kompensatsiya jańa tártibi engizildi
Ministrler Kábinetiniń 2025-jıl 31-dekabrdegi 848-sanlı qararı menen, mútajligi bar shańaraqlardı janılǵı-energetika resursları bahalarınıń artıwınan sociallıq qorǵaw ilájları kúsheytildi. Qararǵa tiykarlanıp, kem támiyinlengen shańaraqlarǵa tábiyiy gaz hám elektr energiyasın paydalanǵanı ushın bazalıq limit hám bazalıq limitten asqan bahaları ortasındaǵı parqtı mámleket byudjeti esabınan qaplaw ushın qárejet ajıratıladi yaǵnıy kompensatsiya etiledi.
Kompensatsiyanı sotsiyallıq reyestrge kiritilgen shańaraqlar, sonıń menen birge materiyallıq jaǵdayı boyınsha «mámleket támiynatıdaǵı shańaraq» yamasa «kambaǵal shańaraq» kriteriyalarına sáykes keletuǵın, shańaraqtaǵı jan basına dáramatı minimal paydalanǵan qárejetleriniń 1,5 esesinen aspaytuǵın shańaraqlar alıwı múmkin. Bunda bir neshe kóshpes múlkke yamasa avtotransport qurallarına iye bolǵan, sonıń menen birge dáramatı belgilengen kriteryadan joqarı shańaraqlarǵa kompensatsiya berilmeydi.
Jańa tártipke kóre, kompensatsiya belgilew protsesi tolıq sanlastırıladı. Puqaralar arzanı mámleketlik xızmetler orayları arqalı yamasa onlayn tárizde tapsırıwı múmkin. Arzalar arnawlı informatsiya sistemaları arqalı avtomatikalıq túrde kórip shıǵılıp, shańaraqtıń tabısı hám múlki bahalanadı.
Kompensatsiya ısıtıw máwsiminde tábiyiy gazdiń bazalıq limitten artıq 250 kub metrge shekem, basqa dáwirlerde bolsa 150 kub metrge shekem bolǵan bólegi ushın, sonıń menen birge elektr energiyasınıń ayına 150 kvt saatqa shekem artıq sarıplanǵan bólegi ushın ajratıladı hám qárejetler tuwrıdan-tuwrı puqaralardıń bank yamasa sociallıq kartalarına ótkeriledi.
Bul ámeller xalıqtıń sotsiyallıq qorǵawın kúsheytiw, energiya resurslarınan aqılǵa say paydalanǵanı ushın xoshametlew hám de mámleketlik xizmetlerin qolay hám ashıq túrinde kórsetiwge xızmet etedi.
Nókis qalası ádillik bólimi
MXO jetekshi qánigesi S.Mnajov