Янгиликлар
25
Ózbekstanda joqarı kategoriyalı pedagoglarǵa turaq jay alıw ushın ipoteka subsidiyası beriledi
Ózbekstanda joqarı mamanlıq kategoriyasına (bas muǵallim lawazımına) iye hám keminde 15 jıl pedagogikalıq jumıs stajına iye bolǵan muǵallimlerge turaq jay satıp alıw ushın ipoteka krediti boyınsha subsidiya ajıratıladı.
Ministrler Kabinetiniń 19-fevraldaǵı qararı menen ipoteka krediti boyınsha baslanǵısh tólemniń 25 procenti mámleketlik byudjet esabınan qaplap beriledi. Subsidiyanı alıw ushın pedagog Mámleketlik xızmetler orayları yamasa Birden-bir interaktiv mámleketlik xızmetler portalı arqalı arza tapsıradı.
Arza elektron tárizde kórip shıǵıladı hám talaban haqqındaǵı maǵlıwmatlar - puqaralıǵı, jumıs stajı, joqarı mamanlıq kategoriyası, dáramatları hám kredit tariyxı - tiyisli ministrlikler hám uyımlardıń málimleme sistemaları arqalı avtomatikalıq túrde tekseriledi. Qosımsha hújjet talap etiwge jol qoyılmaydı.
Sociallıq normalarǵa muwapıq dep tabılǵan talabanǵa subsidiya ajıratıw yamasa biykarlaw haqqında elektron xabarnama jiberiledi. Bunnan soń pedagog qatnasıwshı kommerciyalıq bankti tańlap, turaq jaydı birlemshi bazardan ipoteka krediti tiykarında satıp aladı. Bank kredit ajıratıw máselesin belgilengen tártipte kórip shıǵadı hám notarial shártnama rásmiylestiriledi.
Qararǵa bola, subsidiya bir shańaraqqa (er yaki hayaldan birine) tek ǵana bir márte beriledi hám tek ǵana birlemshi turaq jay bazarında ámel etedi. 2026-jılı bul maqsetler ushın mámleketlik byudjetten 200 milliard sumǵa shekem qarjı qaratılıwı rejelestirilgen. Subsidiya ajıratıw procesi arnawlı elektron platformalar arqalı ashıq-aydın hám avtomatlastırılǵan tártipte ámelge asırıladı.
Shomanay rayonı ádillik bólimi
MXO bas qánigesi S.Mirzabaev