Янгиликлар
24
Neke shártnamaların tastıyıqlaw tártibi belgilendi
Nekeleniwshi shaxslardıń yamasa erli-zayıplınıń nekede bolǵan dáwirinde hám (yamasa) erli-zayıplı nekeden ajıratılǵan jaǵdayda olardıń múlk huqıq hám minnetlemelerin belgileytuǵın kelisim neke shártnaması bolıp esaplanadı.
Erli-zayıp neke shártnamasında óz ara materiallıq támiyinlew, shańaraq qárejetlerin kóteriw, bir-biriniń dáramatında qatnasıw, basqa shaxslar menen múlk shártnamaların dúziw, birgelikte isbilermenlik jumısı menen shuǵıllanıw boyınsha óz huqıq hám minnetlemelerin belgilep alıwǵa, nekeden ajırasqanda erli-zayıptan hár birine beriletuǵın múlkti anıqlap alıwǵa, sonday-aq neke shártnamasına erli-zayıptıń múlkshilik qatnasıqlarına baylanıslı basqa da qaǵıydalardı kirgiziwge haqılı.
Mine usınday qatnasıqlardı jáne de tártipke salıw maqsetinde “Notariuslar tárepinen neke shártnamaların tastıyıqlaw tártibi haqqında”ǵı reje Ádillik ministrliginde mámleketlik dizimnen ótkerildi.
Rejege bola, notariuslar tárepinen neke shártnaması notarial uyım imaratında, videokonferencbaylanıs arqalı yamasa múrájat etiwshilerdiń qálewine bola kóshpeli tártipte rásmiylestiriledi.
Múrájat etiwshi shártnamanı rásmiylestiriw ushın notarial uyımǵa ózi kelip múrájat etedi yamasa BIMXP (my.gov.uz) yamasa "E-notarius.uz " málimleme portalı arqalı dizimnen ótedi.
Notarius múrájat etiwshi(ler)diń shaxsına anıqlıq kirgizedi.
Shártnamanı tastıyıqlawda notarius táreplerdiń neke jasına jetkenligin, tárepler arasında neke dúzilgen yamasa dúzilmegenligin, táreplerden biriniń basqa shaxs penen nekesi dizimge alınbaǵanlıǵın hám aldın shártnama dúzilmegenligin anıqlaydı.
Tólemler ámelge asırılıp, shártnama joybarı tolıq tayar bolǵannan soń, tárepler shártnamaǵa qol qoyıw ushın notarius aldına bir waqıtta mirát etiledi.
Shártnamanıń barlıq nusqaların tárepler familiyası, atı hám ákesiniń atın tolıq jazıp notarius qatnasıwında jeke ózi qol qoyadı.
Muxabbat Xojaxmetova
Qaraqalpaqstan Respublikası
Ádillik ministrliginiń
sektor bas másláhátshisi