Янгиликлар
16
Nızamshılıqtaǵı ózgerisler
Keyingi jıllarda mámleketimizde jol háreketi qáwipsizligin támiyinlew, jol háreketi shólkemlestiriliwin tolıq sanlastırıw baǵdarında sistemalı jumıslar alıp barılmaqta.
Sonıń menen birge, hákimshilik huqıqbuzarlıqlardıń aldın alıw, arnawlı avtomatlastırılǵan foto hám video jazıw texnika quralları arqalı anıqlanatuǵın huqıqbuzarlıqlar sheńberin belgilew, sonday-aq, jol háreketi qaǵıydalarınıń buzılıwı arnawlı avtomatlastırılǵan foto hám video jazıw texnika quralları arqalı belgilengen jaǵdaylarda hákimshilik jaza qollanılıw múddetlerin qayta kórip shıǵıw zárúrligi júzege kelmekte.
Bul nızam menen Ózbekstan Respublikasınıń Hákimshilik juwapkershilik haqqındaǵı kodeksine jol háreketi qáwipsizligi menen baylanıslı bolǵan az áhmiyetli huqıqbuzarlıqlar ushın hákimshilik eskertiw jazası qollanılıwın, arnawlı avtomatlastırılǵan foto hám video jazıw texnika quralları arqalı dizimge alınatuǵın hákimshilik huqıqbuzarlıqlardıń dizimin jáne bunday texnika quralları arqalı dizimge alınǵan huqıqbuzarlıqlar ushın hákimshilik jaza qollanılıw múddetleriniń anıq belgileniwin názerde tutatuǵın qosımshalar hám ózgerisler kirgizilmekte.
Bul Nızam avtomobillerden paydalanıwda xalıqqa qosımsha qolaylıqlar jaratılıwına, hákimshilik huqıqbuzarlıqlardıń aldın alıwǵa, sonday-aq, xalıqtıń mámleketlik uyımlarǵa bolǵan isenimin jáne de bekkemlewge xızmet etedi.
Usı Ózbekstan Respublikasınıń 2026-jıl 04-fevral kúngi «Ózbekstan Respublikasınıń Hákimshilik juwapkershilik haqqındaǵı kodeksine qosımsha hám ózgerisler kirgiziw haqqında»ǵı WRQ-1116 sanlı nızamı menen Ózbekstan Respublikasınıń 1994-jıl 22-sentyabrde qabıl etilgen 2015-XII-sanlı Nızamı menen tastıyıqlanǵan Ózbekstan Respublikasınıń Hákimshilik juwapkershilik haqqındaǵı kodeksiniń tómendegi bir qatar statyalarına ózgerisler kiritildi. Atap aytqanda:
1) 171-statya:
tómendegi mazmundaǵı birinshi bólim menen tolıqtırılsın:
«Arnawlı avtomatlastırılǵan foto hám video jazıw texnika quralları arqalı usı Kodeks 125-statyasınıń birinshi (qáwipsizlik belbewinen paydalanıw qaǵıydalarına ámel etpewge baylanıslı bóliminde), besinshi hám altınshı bólimlerinde, 128 (usı statyanıń joldıń qatnaw bólegindegi sızıqlar menen belgilengen talaplarǵa ámel etpewge, sırtqı jaqtılandırıw ásbaplarınan paydalanıw qaǵıydaların buzıwǵa, jolawshılarǵa yamasa piyadalarǵa ılay shashıratıwǵa baylanıslı bólimleri buǵan kirmeydi), 1281, 1283, 1284, 1285, 1286, 1287, 1289, 12810, 129 hám 130-statyalarında, 135-statyasınıń ekinshi (transport quralların basqarıw huqıqına iye bolmaǵan shaxslarǵa tiyisli bóliminde) hám úshinshi bólimlerinde názerde tutılǵan hákimshilik huqıqbuzarlıqlar dizimge alınadı»;
birinshi - jetinshi bólimleri tiyislisinshe ekinshi - segizinshi bólimler dep esaplansın;
2) 23-statyanıń:
birinshi bólimi tómendegi redakciyada bayan etilsin:
«Hákimshilik huqıqbuzarlıq islegenlik ushın tómendegi hákimshilik jaza sharaları qollanılıwı múmkin:
1) hákimshilik eskertiw;
2) járiyma;
3) hákimshilik huqıqbuzarlıqtı islew quralı esaplangan yamasa tikkeley sonday nárse bolgan zattı haqı tólew shárti menen alıp qoyıw;
4) hákimshilik huqıqbuzarlıqtı islew quralı esaplangan yamasa tikkeley sonday nárse bolgan zattı konfiskaciya etiw;
5) belgili shaxstı oǵan berilgen arnawlı huqıqtan (transport quralın basqarıw huqıqınan, ań awlaw huqıqınan) ayırıw;
6) haqı tólenetuǵın jámiyetlik jumıslarga májbúriy tartıw;
7) hákimshilik qamaqqa aliw;
8) shet el puqaraların hám puqaralıǵı bolmaǵan shaxslardı Ózbekstan Respublikası aymaǵınan hákimshilik tárizde shıǵarıp jiberiw»;
ekinshi bólimindegi "2 - 6" sanları "1, 3 - 8" sanları menen almastırılsın;
3) tómendegi mazmundaǵı 241-statya menen tolıqtırılsın:
«241-statya. Hákimshilik eskertiw
Hákimshilik eskertiw hákimshilik jaza ilajın qollanıwǵa wákillikli uyım (lawazımlı shaxs) tárepinen hákimshilik huqıqbuzarlıq islegen shaxstı nızamǵa qayshı háreketlerge jol qoymaw haqqında eskerttirgen halda oǵan rásmiy eskertiw beriwden ibarat.
Hákimshilik eskertiw jazba (elektron) tárizde qollanıladı.
Hákimshilik eskertiw usı Kodeks 125-statyasınıń birinshi hám ekinshi bólimlerinde, 1281, 1282, 1286, 1351-statyalarında jáne 138-statyasınıń birinshi hám ekinshi bólimlerinde názerde tutılǵan huqıqbuzarlıqtı islegen shaxs óz qılmısınan shın kewilden pushayman bolǵanda, sonday-aq usı Kodekste názerde tutılǵan basqa huqıqbuzarlıqlar belgileri bolmaǵan jaǵdayda, hákimshilik jaza ilajın qollanıwǵa wákillikli uyım (lawazımlı shaxs) tárepinen qollanıladı.
Hákimshilik eskertiw jaza sharası birdey shaxsqa bir jıl dawamında bir márteden artıq qollanılıwı múmkin emes»;
4) 36-statya:
tómendegi mazmundaǵı úshinshi bólim menen tolıqtırılsın:
«Jol háreketi qaǵıydaları buzılıwı arnawlı avtomatlastırılǵan foto hám video jazıw texnika quralları arqalı belgilengen jaǵdaylarda hákimshilik jaza huqıqbuzarlıq islengen kúnnen baslap bir aydan keshiktirmey, hákimshilik juwapkershilikke tartıw haqqındaǵı qarar ústinen shaǵım etilgende bolsa huqıqbuzarlıq islengen kúnnen baslap bir jıldan keshiktirmey qollanılıwı múmkin»;
úshinshi bólimi tórtinshi bólim dep esaplansın;
5) 125-statya:
birinshi bóliminiń sankciyası tómendegi redakciyada bayan etilsin:
«hákimshilik eskertiwge yamasa bazalıq esaplaw muǵdarınıń ekiden bir bólegi muǵdarında járiyma salıwǵa sebep boladı»;
ekinshi bóliminiń sankciyası tómendegi redakciyada bayan etilsin:
«hákimshilik eskertiwge yamasa bazalıq esaplaw muǵdarınıń ekiden bir bólegi muǵdarında járiyma salıwǵa sebep boladı»;
6) 1281-statyanıń sankciyası tómendegi redakciyada bayan etilsin:
«hákimshilik eskertiwge yamasa bazalıq esaplaw muǵdarınıń úsh esesi muǵdarında járiyma salıwǵa sebep boladı»;
7) 1282-statyanıń sankciyası tómendegi redakciyada bayan etilsin:
«hákimshilik eskertiwge yamasa bazalıq esaplaw muǵdarınıń bir esesi muǵdarında járiyma salıwǵa sebep boladı»;
8) 1286-statyanıń sankciyası tómendegi redakciyada bayan etilsin:
«hákimshilik eskertiwge yamasa bazalıq esaplaw muǵdarınıń eki esesi muǵdarında járiyma salıwǵa sebep boladı»;
9) 1351-statyanıń sankciyası tómendegi redakciyada bayan etilsin:
«hákimshilik eskertiwge yamasa bazalıq esaplaw muǵdarınıń ekiden bir bólegi muǵdarında járiyma salıwǵa sebep boladı»;
10) 138-statya:
birinshi bóliminiń sankciyası tómendegi redakciyada bayan etilsin:
«hákimshilik eskertiwge yamasa bazalıq esaplaw muǵdarınıń úshten bir bólegi muǵdarında járiyma salıwǵa sebep boladı»;
ekinshi bóliminiń sankciyası tómendegi redakciyada bayan etilsin:
«hákimshilik eskertiwge yamasa bazalıq esaplaw muǵdarınıń ekiden bir bólegi muǵdarında járiyma salıwǵa sebep boladı».
Kegeyli rayonı Ádillik bólimi
Yuridikalıq xızmet kórsetiw orayı bas yuriskonsultı S.Bazarbaev