Янгиликлар
13
Sociyallıq shártnama hám qollap-quwatlaw mexanizmleri
Sociyallıq shártnama hám qollap-quwatlaw mexanizmleri
2025-jıl 20-noyabrde Prezident tárepinen "Jaslar dápteri" qorları arqalı sociyallıq járdem kórsetiw sistemasın ekede jetilistiriw haqqında"ǵı PP-222-sanlı pármanı qabıl etildi. Usı párman sociyallıq járdem kórsetiw sistemasında áhmiyetli qádem boldı hám jaslar menen islesiwde jańa basqıshtı belgileydi. Ol "Jaslar dápteri" qorları arqalı jaslardı qollap-quwatlaw mexanizmlerin keńeytiw, olardıń sociyallıq belsendiligin arttırıw hám keleshekte turaqlı turmıs dáregine iye bolıwın támiyinlewdi gózlegen bolıp, mámleketimizdiń jasları, ásirese, kem támiyinlengen shańaraqlardan shıqqan, bilimlendiriwde, sociyallıq belsendilikte ózine orın tawıp atırǵan jaslarǵa qosımsha imkaniyatlar jaratıwǵa qaratılǵan.
Usı pármanda bir qatar anıq maqset hám wazıypalar belgilengen, olardıń arasında eń tiykarǵıları:
1. 16 mıń jasqa turaqlı dáramat dáregin jaratıw, pármanda "Jaslar dápteri"ne kirgizilgen jaslardıń bir bólegine turaqlı dáramat dáregine iye bolıwına járdemlesiw wazıypası belgilengen.
2. Bilimlendiriwdegi kórsetkishlerdi jaqsılaw hám sociyallıq belsendilikti arttırıw:
- "Oqıw" joybarı sheńberinde ilimiy-ǵalabalıq hám kórkem ádebiyatlardı turaqlı oqıp baratuǵın jaslardıń úlesin 10% ke arttırıwdı názerde tutadı.
- "Ibrat perzentleri" joybarı sheńberinde shet tillerdi ózlestirgen jaslardıń úlesin 30% ke arttırıw rejelestirilgen.
- sociyallıq belsendiligi joqarı bolǵan jaslar - volontyorlıq, "Bes baslama olimpiadası"nda qatnasıw sıyaqlı - qollap-quwatlanadı.
3. Sociyallıq shártnama arqalı járdem sistemasın engiziw:
2026-jıl 1-fevraldan baslap, Kámbaǵal shańaraqlar reestrine kirgizilgen shańaraqlardaǵı jaslardıń jeke rawajlanıwına qaratılǵan jaslar sociyallıq shártnaması dúziw múmkin boladı, shártnamada bilim alıwdı úzliksiz túrde ámelge asırıp barıw, bilim beriw procesinde unamlı ózlestiriw kórsetkishlerine erisiw, volontyorlıq jumısın ámelge asırıw, "Bes baslama olimpiadası" sheńberinde ótkeriletuģin joybarlarda qatnasıw, ilimiy, ilimiy-ǵalabalıq, kórkem kitaplardı turaqlı oqıw, isbilermenlik yamasa ózin-ózi bánt etiw tiykarında jumısın jolǵa qoyıw, shet tillerdi ózlestiriw boyinsha keminde B1 dárejesine erisiw shártleri tiykarında belgilenedi.
4. Bilimlendiriw hám kásiplik rawajlanıwǵa finanslıq qollap-quwatlaw.
2026-jıl 1-fevraldan baslap Kámbaǵal shańaraqlar reestrine kirgizilgen shańaraqlardaǵı jaslarǵa "Jaslar dápteri" qorları arqalı avtomototransport quralları aydawshıların tayarlaw oqiw kursı qárejetlerin qaplaw boyinsha subsidiya aydawshılıq gúwalıǵınıń "A," "B," "D" hám "DE" kategoriyaların alıw ushin tólep beriledi, kásiplik hám joqarı bilimlendiriw shólkemleri oqıwshı-studentleriniń tólemli-kontrakt summasınıń 50 procentke shekemgi bólegi oqıwshı-student penen dúzilgen sociyallıq shártnama shártlerin orınlaw dárejesinen kelip shıǵıp tólenedi hámde járdemniń ulıwma muǵdarı bir oqıw jılı ushın bazalıq esaplaw muǵdarınıń 50 esesinen aspawı kerekligi belgilengen, sonıń menen birge jaslardıń isbilermenlik, dástúriy hám zamanagóy kásiplerdi iyelew, málimleme texnologiyaların úyreniw, shet tillerge oqıtıw, ilim, sport, kórkem óner hám mádeniyat baǵdarlarındaǵı oqıw kursları ushın tólenetuǵın hár aylıq subsidiyalardıń muǵdarı ótken ayda subsidiya alıwshı tárepinen sociyallıq shártnama shártlerin orınlaw dárejesinen kelip shıǵıp belgilenedi.
Egerde sociyallıq shártnama shártleri orınlanbaǵanda yamasa kerekli dárejede orınlanbaǵanda basqıshpa-basqısh tómendegi izbe-izlikte ilajlar qollanıladı:
(a) sociyallıq shartnamanıń orınlanbaǵan shártlerin on bes kún ishinde orınlaw lazımlıǵı haqqında eskertiw;
(b) sociyallıq járdem muǵdarların 15 procentten 30 procentke shekem azaytıw;
(v) sociyallıq járdem kórsetiwdi bir aydan altı ayǵa shekemgi múddetke waqtınsha toqtatıw;
(g) sociyallıq járdem kórsetiwdi bir jıl hám onnan artıq múddetke toqtatıw belgilengen.
Usı párman mámleketimizde jaslar siyasatına bolǵan itibardıń jáne bir ámeliy kórinisi bolıp esaplanadı. Bul hújjet tek ǵana materiallıq járdem beriw emes, al jaslardıń bilim alıwı, kásip ielewi, mádeniy hám sociallıq belsendiligin arttırıwǵa qaratılǵan keń kólemli reformalardı óz ishine aladı.
Párman menen belgilengen imkaniyatlar jaslar ushın jańa esiklerdi ashadı: olardıń erkin turmısqa tayarlıǵı kúsheyedi, óz qábileti hám potencialın júzege shıǵarıwı ushın zárúr sharayatlar jaratıladı. Eń áhmiyetlisi, "Jaslar dápteri" arqalı ámelge asırılatuǵın hár bir joybar - jaslardıń táǵdirine biypárwa emesligimizdiń hám olardı mámleket rawajlanıwınıń tiykarǵı kúshi sıpatında kóriwdiń ayqın dálili bolıp esaplanadı.
Taxtakópir rayonı ádillik bólimi
yuridikalıq xızmet kórsetiw
orayı bas yuriskonsulti D.A.Shaxanov