Янгиликлар
13
Nızamshılıqta jańalıqlar
Nızamshılıqta jańalıqlar
"Mektepke shekemgi bilimlendiriw hám tárbiya sistemasın bunnan bılay da jetilistiriw ilajları haqqında"ǵı Prezident Pármanı (PP-19-sanlı, 05.02.2026 j.) qabıl etildi.
Pármanǵa bola, 1 jıllıq mektepke tayarlaw toparlarınıń bilimlendiriw baǵdarlaması májbúriy ulıwma orta bilimlendiriwdiń dáslepki basqıshı sıpatında kirgiziledi.
Mektepke shekemgi bilimlendiriw sistemasında balalardı tárbiyalaw, rawajlandırıw hám olarǵa bilim beriwdi unamlı qatnasıqlar arqalı ámelge asırıw maqsetinde oyınǵa tiykarlanǵan bilimlendiriw engiziledi.
Mektepke shekemgi bilimlendiriw hám tárbiya sistemasın jańa sapa basqıshına alıp shıǵıwǵa qaratılǵan hám Balalardı rawajlandırıw innovaciyalıq orayın óz ishine alǵan "Jańa áwlad" mektepke shekemgi bilimlendiriw shólkemleriniń tarmaǵı shólkemlestiriledi.
1 jıllıq mektepke tayarlaw toparlarınıń bilimlendiriw baǵdarlamaları mektepke shekemgi bilimlendiriw shólkemleri, ulıwma orta bilim beriw mektepleri hám basqa da sociallıq taraw obektlerinde tolıq yamasa qısqa múddetli toparlarda ámelge asırıladı.
Mektepke shekemgi hám ulıwma orta bilimlendiriw xızmetlerin kórsetiwshi mámleketlik emes bilimlendiriw shólkemlerine 1 jıllıq mektepke tayarlaw toparların shólkemlestiriwge ruxsat beriledi.
Pármanǵa bola 2027/2028-oqıw jılınan:
- mektepke tayarlaw toparlarında bilimlendiriw processleri joqarı maǵlıwmatlı pedagoglar, sonday-aq, joqarı bilimlendiriw shólkemleriniń pitkeriwshi basqısh studentleri tárepinen alıp barıladı;
- mektepke tayarlaw toparlarında tálim-tárbiya alǵan balalarǵa 1 jıllıq mektepke tayarlıqtan ótkenligi haqqında mámleketlik úlgidegi elektron sertifikat beriledi hám bul maǵlıwmatlar ulıwma orta bilimlendiriw haqqındaǵı attestatında jazıladı.
"Jańa áwlad" mektepke shekemgi bilimlendiriw shólkemleri:
2026-2028-jıllarda Qaraqalpaqstan Respublikası, wálayatlar orayları hám Tashkent qalasında birewden shólkemlestiriledi;
mámleketlik mektepke shekemgi bilimlendiriw shólkemi sıpatında jumıs alıp baradı jáne aldınǵı sırt el tájiriybeleri tiykarında oyınǵa tiykarlanǵan tálim-tárbiya processlerin ámelge asıradı;
Balalardı rawajlandırıw innovaciyalıq oraylarında:
- balalardıń jası hám rawajlanıw basqıshlarına sáykes túrde dóretiwshilik hám kórkem óner, pán hám matematika, fizikalıq belsendilik hám waqıya, til hám qıyal jáne robototexnika hám dáslepki algoritmlew baǵdarlarında tematikalıq oyın maydanshaları shólkemlestiriledi;
- simulyaciyalıq jaǵdaylar arqalı balalarda kásiplerge qızıǵıwshılıq oyatıw, ekologiyalıq mádeniyattı qáliplestiriw sıyaqlı baǵdarlar boyınsha tálim-tárbiya procesi ámelge asırıladı.
Taxtakópir rayonı ádillik bólimi
Yuridikalıq xızmet kórsetiw orayı
bas yuriskonsultı J.Pirnazarov