Янгиликлар
Soraw beriń juwap beremiz
Soraw beriń juwap beremiz
Soraw: Miynet dáptershem jaramsiz jaǵdayǵa kelip qalǵan, ishindegi jazıwlar kórinbeydi qay jerden tastıyıqlatıp alsam boladı?
Juwap: Jaramsız jaǵdayǵa kelgen yáki joytılǵan miynet dáptershesindegi jazıwlardı tastıyıqlaw boyınsha mámleketlik xızmet kórsetiw tártibi Ózbekstan Respublikası Ministrler Kabinetiniń 2021-jıl 23-sentyabrdegi “Arxiv isi hám is júritiw tarawında mámleketlik xızmetler kórsetiwdiń ayırım hákimshilik reglamentlerin tastıyıqlaw haqqında”ǵı 597-sanlı qararı menen tártipke salınadı.
Arza beriwshi mámleketlik xızmetlerden paydalanıw ushın mámleketlik xızmetler orayına ózi kelip múrájat etedi yáki mámleketlik xızmetlerden elektron formada paydalanıw ushın Birden-bir interaktiv mámleketlik xızmetler portalınan dizimnen ótedi. Arza beriwshi ózi kelip múrájat etkende, mámleketlik xızmetler orayı xızmetkeri arza beriwshi atınan, Birden-bir interaktiv mámleketlik xızmetler portalı arqalı múrájat etkende - ǵárezsiz sorawnamanı elektron tárizde toltıradı.
Arza beriwshi isenimxat tiykarında háreket etip atırǵan bolsa, sorawnamaǵa notarial tastıyıqlanǵan isenimxat nusxası júklenedi. Mámleketlik xızmetler orayı tárepinen sorawnama toltırılǵannan soń arza beriwshi maǵlıwmatlardıń tuwrılıǵın tekserip, sorawnamanı qol tańbalardı identifikaciya qılıwdıń tiyisli quralları (ESI, daktiloskopiya, elektron sanlı qol tańba, Mobil-ID hám basqalar) menen tastıyıqlaydı. Arza beriwshi Birden-bir interaktiv mámleketlik xızmetler portalı arqalı múrájat etkende, sorawnamanı ESI (elektron sanlı qol tańba) menen tastıyıqlaw talap etilmeydi.
Mámleketlik xızmet kórsetilgenligi ushın jaramsız jaǵdayǵa kelgen yáki joytılǵan miynet dáptershesindegi bir shólkemdegi jumısqa kirgen hám jumıstan bosatılǵanlıǵı boyınsha jazıwlardı tastıyıqlaw ushın bazalıq esaplaw muǵdarınıń 0,08 esesi muǵdarında jıyım óndiriledi. Bunda mámleketlik xızmetlerden paydalanıw ushın Birden-bir interaktiv mámleketlik xızmetler portalı arqalı múrájat etkende, jıyım summasınıń 90%i óndiriledi.
Tiyisli mámleketlik arxiv sorawnama túsken waqıttan baslap jaramsız jaǵdayǵa kelgen yáki joytılǵan miynet dáptershesindegi jazıwlardı tastıyıqlaw boyınsha maǵlıwmatnamalar ushın 20 jumıs kúninen aspaǵan múddette tiyisli QR-kodli
(matrik shtrixli kod) maǵlıwmatnamanı qáliplestiredi hám de ( ózi kelip múrájat etken jaǵdayda) tiyisli mámleketlik xızmetler orayına yáki (elektron formada múrájat etken jaǵdayda) Birden-bir interaktiv mámleketlik xızmetler portalı arqalı elektron formada arza beriwshige jiberiledi. Bunda tólengen jıyım, eger bar bolsa, bank xızmeti tólewin ayırǵan halda, sorawnamanı qabıl qılǵan arxivtan sorawnamanı orınlaǵan arxivqa ótkeriledi. Sorawnama arxiv hújjetleri tiykarında kórip shıǵılıp, tiyisli maǵlıwmat anıqlanbaǵan jaǵdayda, tólengen jıyım muǵdarı arza beriwshige qaytarılmaydı.
Arıslan Ixlasov
Qaraqalpaqstan Respublikası
Ádillik ministrligi sektor baslıǵı