Янгиликлар
23
Odam savdosi – davr muammosi
Odam savdosi – davr muammosi
Bugungi kunda dunyo hamjamiyati duch kelayotgan eng og‘ir va xavfli muammolardan biri — odam savdosidir. Bu jinoyat turi inson erkinligi va qadr-qimmatiga qarshi qaratilgan bo‘lib, jamiyatning eng og‘riqli nuqtalarini ochib beradi.
Odam savdosi ko‘pincha aldov va yolg‘on va’dalar ortiga yashirinadi. Xorijda yuqori maoshli ish, tez boyish yoki qulay sharoitlar haqidagi takliflar ko‘plab fuqarolarni o‘z domiga tortmoqda. Afsuski, bunday va’dalarga ishongan ayrim insonlar majburiy mehnat, zo‘ravonlik va ekspluatatsiya qurboniga aylanmoqda.
Bu illatning ildizi chuqur. Ishsizlik, iqtisodiy qiyinchiliklar, huquqiy bilimlarning yetishmasligi va axborotga ishonuvchanlik odam savdosining keng tarqalishiga sabab bo‘lmoqda. Ayniqsa, internet va ijtimoiy tarmoqlar orqali tarqatilayotgan shubhali e’lonlar bugun katta xavf tug‘dirmoqda.
Odam savdosi jamiyatga nafaqat ijtimoiy, balki ma’naviy zarar ham yetkazadi. Inson sha’ni toptaladi, oilalar parokanda bo‘ladi, jamiyatda ishonchsizlik kuchayadi. Eng achinarlisi, bu jinoyat qurbonlari ko‘pincha o‘z vaqtida yordam so‘rashga jur’at topa olmaydi.
Mamlakatimizda odam savdosiga qarshi kurashish davlat siyosatining muhim yo‘nalishlaridan biri hisoblanadi. So‘nggi yillarda qonunchilik takomillashtirilib, huquqni muhofaza qiluvchi organlar faoliyati kuchaytirildi. Aholi o‘rtasida targ‘ibot-tashviqot ishlari olib borilib, jabrlanganlarga huquqiy va ijtimoiy yordam ko‘rsatilmoqda.
Odam savdosiga qarshi kurash — faqatgina davlat idoralarining emas, balki butun jamiyatning vazifasidir. Har bir fuqaro ogoh bo‘lishi, shubhali takliflarga befarq qaramasligi va yaqinlarini ham ogohlantirishi zarur. Zero, inson hayoti va erkinligi har qanday manfaatdan ustundir.
Qoraqalpog‘iston Respublikasi Adliya vazirligi
Huquqni qo‘llash va metodik ta’minlash sho‘’basi
kata maslahatchisi Shukurillayev Abdulmalik Ro‘zmat o‘g‘li