Янгиликлар
12
Elimizde jaslarǵa ayrıqsha jeńillikler jaratılmaqta
Elimizde jaslarǵa ayrıqsha jeńillikler jaratılmaqta
Búgingi kúnde oqıyman, izlenemen, bilim alaman hám jumıs isleymen degen jaslarǵa nızamshılıq hújjetleri menen ayrıqsha jeńillikler berilip atır.
Mine usınday jeńilliklerdiń biri, yendigiden bılay kámbaǵal shańaraqtıń perzentine tálim krediti protsentsiz beriledi, yaǵnıy kem támiyinlengen shańaraqta keminde bir perzent joqarı maǵlıwmatlı bolıwı ushın zárúr sharayatlar jaratıladı.
Sonıń menen birge, oqıw orınlarında qosımsha grant ajıratıladı, kontrakt tóleminiń bir bólegi qaplap beriledi.
Jáne bir jańalıq - qábiletli, bilimge qushtar, biraq, awır shańaraqlıq sharayatı sebepli oqıw imkaniyatına iye bolmaǵan jaslardı sırt yelde oqıtıw boyınsha jańa sistema - "Jarqın talant" joybarı yengiziledi.
Onda hár bir máhálleden sotsiallıq qorǵawǵa mútáj, bilimge qushtar jaslar tańlap alınıp, qábileti anıqlanadı. Olardıń potensialına sáykes sırt yel joqarı oqıw ornı tańlap alınıp, tayarlaw kurslarında oqıtıladı. Sırt yelde bilim alıp qaytqan jaslar Milliy kadrlar rezervine tikkeley kirgiziledi, olar mámleketlik uyımlarǵa tańlawsız jumısqa alınadı. Hár jılı tańlawdan ótken 1 mıń jas dúnyanıń "top-100" joqarı oqıw orınlarına jiberilip, oqıw hám jasaw qárejetleri qaplap beriledi.
Bunnan tısqarı, yendigiden bılay Jaslarǵa 100 mln sumǵa shekem jeńilletilgen kreditler beriledi, yaǵnıy Prezidentimizdiń usı jıldıń 14-fevralındaǵı “Jaslar isbilermenligin rawajlandırıw hám bántligin támiyinlewge baylanıslı qosımsha ilajlar haqqında”ǵı 62-sanlı qararına tiykar, 2025-2027-jıllarda "Jaslar biznesi" baǵdarlaması ámelge asırıladı.
Usı baǵdarlama sheńberinde "Bizneske birinshi qádem" joybarına muwapıq 18 jasqa tolǵan hám 30 jastan aspaǵan sotsiallıq salıq tólegen ózin-ózi bánt yetken puqaralarǵa onlayn formada jeńilletilgen dáwir menen 7 jılǵa shekemgi múddetke 100 mln sumǵa shekem kreditler jeńilletilgen mikroqarız retinde ajıratıladı.
"Jaslar ushın jumıs orınları" joybarı tiykarında JShJ retinde jumıs alıp barıwshı jas puqaralarǵa, sonday-aq, shólkemlestiriwshileri jas puqaralar bolǵan yuridikalıq shaxs shólkemlestirgen halda jumıs alıp barıwshı kishi isbilermenlerdiń keminde 20 jumıs ornın jaratıwdı názerde tutıwshı joybarlarına jeńilletilgen dáwir menen 7 jılǵa shekemgi múddetke 5 mlrd sumǵa shekem qarjılar ajıratıladı.
Bunnan tısqarı Nızamshılıqqa tiykarlanıp, dápterdegi jaslardıń avtomektepte oqıw qárejetleri qaplanadı. Bul muǵdar ─ BEMnıń 4 yesesine shekemgi, 1 mln 500 mıń sumdı quraydı.
Bunıń ushın avtomektepte oqıwdı qálegen jaslar rayonlıq (qalalıq) jaslar isleri bólimine arza hám oqıw kursı shártnamasınıń nusqasın beredi. Shártnamada bilimlendiriw shólkeminiń atı, STIR, oqıw kursı yamasa kásip-óner atı, bir aylıq tólem muǵdarı hám ulıwma múddet kórsetilgen bolıwı kerek.
Oqıw pulın qaplap beriw boyınsha arzaǵa ortasha 8 kún ishinde juwap beriledi.
Nurya Berdiniyazova
Qaraqalpaqstan Respublikası
Ádillik ministrligi sektor baslıǵı
I dárejeli yurist