Янгиликлар
25
Jańalanǵan Konstituciya Qaraqalpaqstan Respublikasınıń sociallıq-ekonomikalıq rawajlanıwında huqıqıy tiykar bolmaqta
Jańalanǵan Konstituciya Qaraqalpaqstan Respublikasınıń sociallıq-ekonomikalıq rawajlanıwında huqıqıy tiykar bolmaqta
Elimiz tınıshlıǵı, xalqımız abadanlıǵı, jámiyet rawajlanıwı – áweli mámlekette qabıl etilip atırǵan nızam hújjetleriniń jetikligi, bekkemligi hám álbette onıń orınlanıwınıń támiyinleniwinde kórinedi.
Biz jańa Ózbekstandı qurar ekenbiz, barlıq reformalar negizindegi baslı nızamımız esaplanǵan Konstituciyanı da jámiyet hám mámleket penen teńbe-teń túrde jańalawǵa zárúrlik júzege keldi.
Óz náwbetinde, aldın ala insan degen ideyanı ilgeri súrgen túrde xalıqtıń pikiri hám usınısı tiykarında milliy nızamshılıǵımız tiykarın jańalawdı maqset ettik hám de xalıq tańlawı menen 2023-jıl 30-aprel kúni ótkerilgen Ózbekstan Respublikası referendumında ulıwmaxalıqlıq dawıs beriw arqalı jańa redakciyadaǵı Ózbekstan Respublikası Konstituciyası qabıl etildi.
Referendum kóp milletli xalqımızdıń awızbirshiligi, suveren, demokratiyalıq, huqıqıy, sociallıq hám dúnyalıq mámleket qurıw jolındaǵı qararınıń isenimli sáwlesi boldı.
Ásirese, Konstituciyada mámleket qurılısınıń jańa strategiyalıq maqseti etip – sociallıq mámleket qurıw ekenligi belgilep berildi, sociallıq ádalat hám birdemlik principleri engizildi, insan huqıq hám erkinliklerin qorǵawdıń jańa mexanizmlerin názerde tutıwshı konstituciyalıq tiykarlar bekkemlendi.
Jańalanǵan Konstituciya mámleket, millet hám xalıq sıpatında keyingi qádemlerimizdi anıqlap alıwımız ushın oǵada áhmietli másele, ádil jámiet qurıw jolındaǵı úlken qadem sanaladı.
Konstituciyada Ózbekstan – suveren, demokratiyalıq, huqıqıy hám sociallıq mámleket ekenligi qatań belgilep qoyıldı.
Insan huqıq hám erkinlikleri nızamlarımızdıń, hár bir ministrlik hám keńseler iskerliginiń mazmunına aylanıwı qatań talap sıpatında belgilendi. Bul bolsa, mámleketlik uyımları hám de lawazımlı shaxslardıńǵana emes, al puqaralardıń máplerin gózlep iskerlik kórsetiwine tiykar boları sózsiz.
Hátteki, nızamlardaǵı anıqsızlıqlar, tosqınlıqlar insan paydasına sheshiliwi shárt hám zárúr. Buǵan kóre, insan hám mámleket ortasındaǵı qatnasıqlardı tártipke salıwshı nızamshılıqtaǵı anıqsızlıqlar, túrli túsinbewshilikler sheshiledi.
Xalıq turmısı hám salmatlıq dárejesin jaqsılawdıń zárúr shárti sıpatında Konstituciyada qorshaǵan ortalıqtı qorǵaw boyınsha kompleks ilajlar belgilendi.
Usı múnásibet penen, mámleket qorshaǵan ortalıqtı jaqsılaw, tiklew hám qorǵaw, ekologiyalıq teńlikti saqlaw boyınsha ilajlardı ámelge asıradı, puqaralardıń ekologiyalıq huqıqların támiyinlew hám qorshaǵan ortalıqqa zıyanlı tásir kѳrsetiliwine jol qoymaslıq maqsetinde qalasazlıq iskerligi tarawında jámáátshilik qadaǵalawdı ámelge asırıw ushın shárayatlardı jaratadı degen norma belgilenip, qalalardıń bas rejelerin jámáátshilik qadaǵalawınan májbúriy ótkeriliwi shártligi kórsetildi.
Mámleket Aralboyı regionınıń ekologiyalıq sistemasın qorǵaw hám de tiklew, regiondı sociallıq hám ekonomikalıq tárepten rawajlandırıw boyınsha ilajlar kóredi. Mine usınday ilajlar qatarında, mámleketimiz basshısınıń tiyisli párman hám qararları menen Qaraqalpaqstan Respublikasın hár tárepleme rawajlandırıwǵa qaratılǵan kompleks ilajlar ámelge asırılıwı jolǵa qoyıldı. Solardan biri, Ózbekstan Respublikası Prezidentiniń 2024-jıl 9-fevraldaǵı “Qaraqalpaqstan Respublikasın kompleks sociallıq-ekonomikalıq rawajlandırıw hám xalıqtıń bántligin támiyinlewdiń qosımsha ilajları haqqında”ǵı PQ-66-sanlı qararı bolıp esaplanadı.
Bul qarar menen puqaralar, isbilermenler, mámleket rawajlanıwı ushın bir qansha jeńilliklerdi engiziw arqalı sociallıq-ekonomikalıq turaqlılıqqa erisiw maqset etildi.
Juwmaqlap aytqanda, biz basıp ótken búgingi qádemler erteńgi kúnniń tariyxına aylanadı. Demek, biz búgin bekkem nızamdı jaratıw arqalı ullı keleshegimizdi tik turıp qura alamız!
Qaraqalpaqstan Respublikası
Ádillik ministrligi bas másláhátshisi Atabek Gulimbetov