Янгиликлар
24
PHAJ hújjetlerin dizimge alıw tártibi ózgerdi. Qanday jańalıqlar bar?
Puqaralıq halatı aktlerin dizimge alıw qaǵıydalarına bir qansha ózgerisler kirgizildi. Nátiyjede PHAJ uyımları tárepinen beriletuǵın hújjetlerdi alıw processleri biraz ápiwayılastırıldı.
Jańa tártip boyınsha, tuwılıwdı dizimge alıw múddeti ótkerip jiberilgende 16 jasqa shekemgi balanıń tuwılǵanlıǵı haqqındaǵı gúwalıǵın alıw ushın arza tómendegiler tárepinen beriledi:
- balanıń ata-anası;
- ata-ananıń nızamlı nekesi bar bolǵan jaǵdaylarda olardan biri;
- isenim xatı tiykarında basqa da mápdar shaxs;
- ata-ananıń ornın basıwshı shaxs yamasa qáwenderlik hám qayırqomlıq uyımlarınıń lawazımlı shaxsları.
Jáne bir itibarlı tárepi sonda, akt jazıwlarına ózgerisler, dúzetiwler hám qosımshalar konsul yamasa notarius tárepinen tastıyıqlanǵan isenim xatı hám arza tiykarında ámelge asırılıwı múmkin.
Ólim haqqındaǵı akt jazıwına dúzetiwler kirgiziw jaqın tuwısqanlar yamasa miyrasxorlardıń arzasına bola PHAJ uyımı tárepinen ámelge asırıladı. Qaytıs bolǵan shaxslardıń tuwılǵanlıq, neke dúziw, nekeden ajıralıw haqqındaǵı akt jazıwlarına dúzetiw hám qosımshalar bolsa sud qararına tiykarlanıp PHAJ uyımı tárepinen kirgiziledi.
Jańa tártip ata-analardan biriniń arzası tiykarında balanıń tuwılǵanlıǵın dizimge alıw tártibin ápiwayılastırdı. Puqaralar belgili bir sebeplerge bola jasaw ornın ózgertiwi nátiyjesinde dizimge alınǵan akt jazıwlarına ózgerisler, dúzetiwler hám qosımshalar kirgiziw belgilengen tártipte tastıyıqlanǵan isenim xatı hám arza tiykarında ámelge asırılıwı, sonday-aq, ólim haqqındaǵı akt jazıwına dúzetiwler kirgiziwde PHAJ uyımına wákillik berildi.
Máselen, búgingi kúnge shekem nızam hújjetlerine bola akt jazıwına ózgeris, dúzetiw hám qosımshalar kirgiziw haqqındaǵı arza arza beriwshiniń jasaw ornındaǵı yamasa tiyisli akt jazıwı dizimge alınǵan PHAJ uyımı tárepinen qabıl etiliwi. Akt jazıwına ózgeris, dúzetiw hám qosımshalar kirgiziwdi isenim xatı arqalı ámelge asırıwǵa jol qoyılmaytuǵını belgilengen edi.
Bunıń nátiyjesinde puqaralar tárepinen kóplegen narazılıqlarǵa sebep bolatuǵın edi. Sebebi olar akt jazıwı basqa aymaqtaǵı PHAJ bólimi tárepinen dizimge alınǵan bolsa, sol aymaqqa barıp keliwi yamasa jasap atırǵan jerindegi PHAJ bólimine múrájat etiwi, olar pochta arqalı jiberiwi onıń nátiyjesin alıw ushın belgili bir qarjı hám waqıt talap etiletuǵın edi.
Endi bolsa, joqarıdaǵı talap biykar etilip, hár bir shaxsqa belgilengen tártipte tastıyıqlanǵan isenim xatı hám akt jazıwınıń qaysı baǵanaǵa ózgeris kirgiziletuǵını haqqındaǵı tastıyıqlanǵan arza tiykarında ámelge asırılıwı múmkin boldı.
On altı jasqa tolǵan shaxslardıń tuwılıw, neke dúziw, nekeden ajıralıwdı dizimge alıw dápterlerine ózgerisler kirgiziw olardıń arzalarına bola ámelge asırılıwı, on altı jasqa tolmaǵan shaxslardıń tuwılıw haqqındaǵı jazıwlar dápterine ózgerisler kirgiziw olardıń ata-anasınıń arzasına bola ámelge asırılıwı názerde tutılǵan.
Usı kúnge shekem, ólim haqqındaǵı akt jazıwına tek ǵana tiyisli sudlardıń qararına tiykarlanıp ózgeris, dúzetiw hám qosımshalar kirgizilgen. Biraq, ámeliyatta ólim haqqındaǵı medicinalıq gúwalıq qáte jazılıwı yamasa basqa sebeplerge baylanıslı ólim haqqındaǵı akt jazıwı jazılǵan.
Keyin ala bul qáteni dúzetiw ushın barlıq hújjetler jeterli bolsa da PHAJ uyımında oǵan dúzetiw kirgiziw wákilligi joq edi, sudtıń tiyisli qararına tiykar tiyisli ózgeris kirgizilgen.
Endi bolsa, joqarıdaǵı talap biykar etilip, marhumnıń ólim haqqındaǵı akt jazıwına dúzetiwler kirgiziw jaqın tuwısqanlardıń yamasa miyrasxorlardıń arzasına bola PHAJ uyımı tárepinen ámelge asırıw wákilligi berilgen hám qaytıs bolǵan shaxslardıń tuwılǵanlıq, neke dúziw, nekeden ajıralıw haqqındaǵı akt jazıwlarına dúzetiw hám qosımshalar sud qararına tiykarlanıp PHAJ uyımı tárepinen kirgiziletuǵını anıq belgilep qoyıldı.
Joqarıdaǵılardıń barlıq puqaralarımızdı artıqsha áweregershiliklerine hám usı máseleler boyınsha sudlarǵa múrájat etiwine shek qoyıladı.
Bul baǵdarda, mámleketlik uyımlar tárepinen mámleketlik xızmetlerdi kórsetiwdi jáne de ápiwayılastırıw hám puqaralarǵa qolaylıqlar jaratıw jumısları alıp barılmaqta.
Shımbay rayonı ádillik bólimi
PHAJ bólimi 2-dárejeli inspektorı B.Taganklıchova