Янгиликлар
12
Insan, onıń huqıq hám erkinlikleri-joqarı qádiriyat
Mámleketimizde barlıq tarawlarda alıp barılıp atırǵan keń kólemli reformalarda insan ar-namısı hám qádir-qımbatın húrmet etiw, onıń huqıqların joqarı qádiriyat sıpatında bildiriw sıyaqlı ideyalar óz kórinisin tappaqta.
Insan, onıń huqıq hám erkinlikleri - insanǵa kemshiliksiz jasaw múmkinshiligin beretuǵın hám ekonomikalıq, social, mádeniy, siyasiy tarawlarda óz múmkinshilik hám talaplarınıń ámelge asırılıwın támiyinleytuǵın huqıqıy tiykar bolıp sanaladı. Insan huqıqları hám erkinliklerine ámel etiw Ózbekstan Respublikası konstituciyalıq basqarıw principiniń tiykarı bolıp tabıladı.
Insan huqıqları degenimiz ne?
Insan huqıqları - bul insannıń tuwılıwdan baslap pútkil omiri dawamındaǵı onıń huqıq hám erkinlikleri bolıp tabıladı. Bul universal huqıqlar milleti, jınısı, ırqı, dini, tili hám basqa huqıqıy dárejesine qaramastan, hámme ushın tán bolıp tabıladı.
Insan huqıqları jasaw huqıqı sıyaqlı eń tiykarǵı huqıqlardan baslap, múnásip turmıs tárizin támiyinlewge xızmet etetuǵın bilim alıw, miynet etiw yamasa sociallıq támiyinat sıyaqlı barlıq huqıqlardı óz ishine aladı.
Insan huqıqları múnásip turmıs keshiriw hám insanıy potencialımızdı rawajlandırıwǵa múmkinshilik beriw ushın zárúr bolǵan barlıq insaniy pazıyletler ushın zárúrli bolıp tabıladı. Insan huqıqların támiyinlew qáweter, qorqıtıw hám xorlıqlarsız jámiyette jasaw ushın úlken áhmiyetke iye.
Insannıń tiykarǵı huqıq hám erkinlikleri Jańa redakciyada qabıl etilgen Ózbekstan Respublikası Konstituciyasınıń V-XI-baplarında insan huqıqları, puqaralıq, jeke huqıq hám erkinlikler, siyasiy huqıqlar, social, ekonomikalıq, mádeniy hám ekologiyalıq huqıqları, insan hám puqaranıń huqıq hám erkinlikleri kepillikleri hám puqaralardıń minnetleri belgilep qoyılǵan. Konstituciyanıń 19-statyasına muwapıq Ózbekstan Respublikasında insannıń huqıq hám erkinlikleri xalıq aralıq huqıqtıń bárshe tarepten tan alınǵan normalarına qaray hám Konstitutsiyaǵa muwapıq tán alınadı hám kepillik beriledi.
Insan hám puqaranıń huqıq hám erkinlikleri - insanǵa kemshiliksiz jasaw múmkinshiligin beretuǵın hám ekonomikalıq, social, mádeniy, siyasiy tarawlarda óz múmkinshilik hám talaplarınıń ámelge asırılıwın támiyinleytuǵın huqıqıy dáreje. Insan huqıqları hám erkinliklerine ámel etiw Ózbekstan Respublikası konstituciyalıq basqarıw principiniń tiykarı bolıp tabıladı.
Ózbekstan Respublikası Konstituciyasında belgilengen huqıq hám erkinlikler: nızamlardıń mazmunı hám qollanılıwına, nızam shıǵarıwshı, atqarıwshı hákimiyat iskerligine tikkeley tásir kórsetedi;
Ózbekstannıń hár bir puqarasına, jınısı, ırqı, milleti, tili, dini, sociallıq kelip shıǵıwı, jeke hám sociallıq jaǵdayına qaramastan, insan huqıqları hám erkinlikleri buzılmaslıǵın, sud jolı menen qorǵalıwın kepilleydi. Konstituciya barlıq puqaralardıń nızam aldında teńligine tiykarlanǵan halda, ózgelerdiń huqıqlarına húrmet menen qaraw principlerin, ózgelerdiń nızamlı máplerin, huqıq hám erkinliklerin buzıw esabına óz huqıq hám erkinliklerin ámelge asırıwǵa jol qoymawǵa, social ádalat hám awızbirshilikti támiyinlewge qaratılǵan.
Óz gezeginde respublika aymaǵında jasawshı shaxslar Konstituciyada belgilengen huqıq hám erkinliklerge, xalıq aralıq huqıq normalarına ámel etiwi zárúr.
Juwmaqlap aytqanda, insan huqıq hám erkinliklerin, onıń nızamlı máplerin támiyinlew mámleketimizdiń túrli tarawlarında ámelge asrılıp atırǵan keń kólemli reformalar negizinde jaqsı maqsetke-insan máplerine xızmet etedi.
Taxtakópir rayonı ádillik bólimi
Yuridikalıq xızmet kórsetiw
orayı baslıǵı A.Allaniyazov