Янгиликлар
28
Miynet intizamı hám intizamiy jaza sharaları
Miynet intizamı hám intizamiy jaza sharaları
Miynet nızamshılıǵında hár bir jámiyette miynet intizamı bas faktor ekeni anıq kórsetip berilgen. Miynet intizamın buzıw bul nızam buzıwshılıq esaplanadı. "Ishki miynet tártibi" hár bir mákeme, kárxana hám shólkemlerde miynet intizamı hám tártip qaǵıydaların belgileytuǵın tiykarǵı hújjet bolıp tabıladı.
Ózbekstan Respublikası Miynet Kodeksiniń 295-statyasında kórsetilgenindey miynet intizamı nızamshılıqqa, jámáát kelisimlerine, sonday-aq, ishki miynet tártibi qaģıydalarına basqa ishki hújjetlerge hám miynet shártnamasına muwapıq kelisip tastıyıqlanǵan "Ishki miynet tártibi qaǵıydaları" belgilenedi. Ózbekstan Respublikası Miynet Kodeksiniń 312-statyasına kóre jumıs beriwshi yaǵnıy shólkem baslıǵı miynet intizamın buzǵan xızmetkerge miynet intizamın buzǵanı ushın "sógis", "ortasha is haqınıń otız payızınan aspaǵan muǵdarda járiyma", "miynet shártnamasın biykar etiw" (161-statyanıń ekinshi bóliminiń 4-bánti) sıyaqlı intizamiy jaza sharaların qollanıwǵa haqılı. Usı statyada názerde tutılmaǵan intizamiy jaza sharaların qollanıw qadaǵan etiledi.
Ózbekstan Respublikası Miynet Kodeksiniń 313-statyasında intizamiy jaza sharaları jumısqa qabıl etiw huqıqı berilgen shaxslar tárepinen, yaǵnıy jumıs beriwshi (shólkem baslıǵı) tárepinen qollanıladı. Intizamıy jaza qollanıwdan aldın xızmetkerden jazba túrde túsinik xatın talap etiw lazım. Xızmetkerdiń túsinik xat beriwden bas tartıwı onıń aldınǵı qáte is-háreketi ushın jaza qollanıwǵa tosqınlıq ete almaydı. Intizamiy jaza sharasın qollanıwda islegen nadurıs is-háreketi qanshelli dárejede awır ekenligi, usı is-háreket islengen jaǵday, xızmetkerdiń aldıńǵı jumısı hám minez-qulqı esapqa alınadı.
Intizamiy jaza tikkeley nadurıs háreket anıqlanǵannan keyin, biraq bul qılmıs-háreket anıqlanǵanınan baslap, xızmetkerdiń miynetke jaramsızlıq dáwiri yamasa dem alısta bolǵan waqtın esapqa almaǵan halda, kóbi menen bir ay ishinde qollanıladı. Nadurıs háreket islengen kúnnen baslap altı ay ótkennen keyin, finans-xojalıq xızmetin tekseriw yamasa auditorlik tekseriw nátiyjesinde anıqlanǵanda, nadurıs háreket islengen kúnnen baslap eki jıl ótkennen keyin intizamiy jazanı qollanıwǵa bolmaydı. Jınayat isi boyınsha is júrgizilgen dáwir bul múddetke kirmeydi
Sonıń menen birgelikte jumıs beriwshi hám intizamiy jaza alǵan xızmetkerde "intizamiy jazanıń ámel etiw múddeti qansha boladı?" degen soraw payda bolıwı múmkin.
Ózbekstan Respublikası Miynet Kodeksiniń 315-statyasında intizamiy jazanıń múddeti jaza qollanılǵan kúnnen baslap bir jıldan aspawı belgilengen. Eger xızmetker usı múddet ishinde jáne intizamiy jazaǵa tartılmasa, ol intizamiy jaza almaǵan dep esaplanadı. Bir jıllıq múddet ótkennen keyin intizamiy jaza óziniń yuridikalıq áhmiyetin joǵaltadı hám intizamiy jazanı alıp taslaw haqqında arnawlı buyrıq shıǵarıw talap etilmeydi.
Intizamiy jazanı qollanǵan jumıs beriwshi óz baslamasına, xızmetkerdiń tikkeley basshısınıń ótinishine yamasa kásiplik awqamı komitetiniń iltimasnamasına tiykar jazanı bir jıl ótpey-aq alıp taslawǵa haqılı. Eger xızmetkerdiń jumıs ornında miynet dawları komissiyası dúzilmegen bolsa, tikkeley aymaqlıq puqaralıq isleri boyınsha sudlarǵa múrájat etiwi múmkin.
Nókis rayonı ádillik bólimi Yuridikalıq xizmet kórsetiw
orayı bas yuristkonsultı A.Dauletbayeva