Янгиликлар
28
Ata-ananıń erjetpegen balalarına támiyinlew minnetlemesi (aliment)
Ata-ananıń erjetpegen balalarına támiyinlew minnetlemesi (aliment)
Erjetpegen balaların baǵıw minnetlemesin ıqtıyarlı túrde orınlamaǵan ata (ana) dan sudtıń sheshiwshi qararı yamasa sud buyrıǵı tiykarında aliment óndiriledi.
Erjetpegen balalarǵa aliment tólew haqqında ata-ana arasında kelisim bolmaǵanda yamasa aliment ıqtıyarlı túrde tólenbegende hám ata-anadan hesh biri aliment óndiriw haqqında sudqa dawa yamasa arza menen múrájat etpegen jaǵdaylarda, qáwenderlik hám ámengerlik uyımları erjetpegen balanıń támiynatı ushın ata yamasa anadan nızamda belgilengen muǵdarda aliment óndiriw haqqında dawa qozǵawǵa haqılı.
Ata-analar erjetpegen balalarına támiynat beriw ushın aliment tólew tártibin óz-ara kelisken halda belgilewge haqılı.
Erjetpegen balalarına támiynat beriw ushın aliment tólew tártibi hám forması haqqında ata-ana arasındaǵı kelisim nızamda belgilengen qaǵıydalarǵa hám balanıń máplerine qayshı kelmewi kerek.
Ata-ananıń erjetpegen balalarına tóleytuǵın aliment muǵdarı
Eger erjetpegen balalarına támiynat beriw haqqında ata-ana arasında kelisim bolmasa, olardıń támiynatı ushın aliment sud tárepinen ata-ananıń hár aydaǵı is haqısı hám (yamasa) basqa dáramatınıń:
bir bala ushın - tórtten bir bólegi;
eki bala ushın - úshten bir bólegi;
úsh hám onnan artıq bala ushın - yarımı muǵdarında óndiriledi.
Bul tólemlerdiń muǵdarı táreplerdiń materiallıq yamasa shańaraqlıq jaǵdayın hám basqa itibarǵa ılayıq jaǵdaylardı esapqa alǵan halda sud tárepinen azaytılıwı yamasa kóbeytiliwi múmkin.
Hár bir bala ushın óndiriletuǵın aliment muǵdarı nızam hújjetleri menen belgilengen miynetke haqı tólew eń az muǵdarınıń 26,5 procentinen kem bolmawı kerek.
Ata-ananıń er jetken balalarına aliment tólewi.
Ata-ana er jetken miynetke jaramsız, járdemge mútáj balalarına támiynat beriwi shárt.
Er jetken miynetke jaramsız, járdemge mútáj balalarına támiynat beriw ata-ananıń kelisimine muwapıq ámelge asırıladı. Ata-ana arasında bunday kelisimge erisilmegen jaǵdayda kelispewshilik sud tártibinde sheshiledi.
Ata-anadan er jetken miynetke jaramsız, járdemge mútáj balalarına óndiriletuǵın alimenttiń muǵdarı sud tárepinen aliment tólewi shárt bolǵan ata-ananıń shańaraqlıq hám materiallıq jaǵdayı esapqa alınıp, hár ayda pul menen tólenetuǵın qatań summada belgilenedi.
Ata-anadan balalarǵa óndiriletuǵın aliment muǵdarın anıqlaw tártibi
Ata-anadan balalarǵa óndiriletuǵın aliment muǵdarı aliment tólewshiniń aylıq miynet haqısına hám (yamasa) basqa da dáramatına salıstırǵanda úlesler esabınan yamasa aqsha menen tólenetuǵın qatań summada belgileniwi múmkin.
Aliment tólewi shárt bolǵan ata-ananıń miynet haqısı hám (yamasa) basqa da dáramatı turaqlı birdey bolmasa, ózgerip tursa yamasa dáramatınıń bir bólegin natura tárizinde alatuǵın bolsa, sonday-aq dáramattan úles tárizinde aliment óndiriw imkaniyatı bolmasa yamasa ata-ana rásmiy belgilengen miynet haqı yamasa dáramatqa ie bolmasa, erjetpegen balalardıń támiynatı ushın tóleniwi kerek bolǵan aliment muǵdarı hár ayda aqshalay tólenetuǵın qatań summada belgileniwi múmkin.
Aliment Ózbekstan Respublikası aymaǵında hám onıń sırtında aqsha yaki natura túrinde alınǵan barlıq túrdegi dáramatlardan uslap qalınadı.
Shet el valyutasında alınatuǵın dáramatlar aliment óndiriletuǵın kúnde ámelde bolǵan Ózbekstan Respublikası Oraylıq bankiniń rásmiy kursı boyınsha sumlarda esaplanadı.
Eger aliment tólewi shárt bolǵan shaxs usı dáwirde islemegen bolsa yamasa onıń miynet haqısı hám (yamasa) dáramatın tastıyıqlawshı hújjetler usınılmaǵan bolsa, aliment qarızı óndirilip atırǵan waqıtta aliment Ózbekstan Respublikasındaǵı ortasha aylıq miynet haqı muǵdarı boyınsha esaplanadı. Eger qarızdı bunday belgilew táreplerden biriniń máplerine sezilerli dárejede zıyan jetkeretuǵın bolsa, máplerine zıyan jetkerilgen tárep sudqa múrájat etiwge haqılı. Sud táreplerdiń materiallıq hám shańaraqlıq jaǵdayın hám basqa itibarǵa ılayıq jaǵdaylardı esapqa alıp, qarızdıń aqshalay tólenetuǵın qatań summanı belgilewi múmkin.
Qaraózek rayonı
ádillik bólimi PHAJ
bólimi baslıǵı N.Erejepova