Янгиликлар
31
Balalar napaqası kimlerge beriledi?
Balalar napaqası kimlerge beriledi?
Bala tárbiyalap atırǵan shańaraqlardı qollap-quwatlaw sistemasınıń ónimdarlıǵın asırıw, sociallıq qorǵaw hám kómekke mútáj shańaraqlardı materiallıq támiynatın kúsheytiriw, mútáj shańaraqlardı anıqlawda ulıwma tán alınǵan xalıq aralıq standartlardı hám avtomatlastırılǵan ashıq elektron bahalaw mexanizmlerin eń jaydırıw arqalı napaqalardı tólew sistemasın balalar dúnya qarasın rawajlandırıw hám kámbaǵallıqtı qısqartıwǵa qaratıw maqsetinde Ózbekstan Respublikası Prezidentiniń 2021-jıl 11-avgust kúni «Kem támiyinlengen shańaraqlarǵa materiallıq járdem kórsetiw hámde kámbaǵallıq penen gúresiw kólemin jánede keńeytiriw is-ilájleri haqqında»ǵı PP-6277 sanlı pármanı qabıl etilgen edi.
Oǵan kóre 2021-jıl 1-sentyabrden baslap:
a) 14 jasqa shekemgi balaları bolǵan shańaraqlarǵa napaqa hámde bala 2 jasqa tolǵanǵa shekem onı tárbiya etiw napaqası ornına kem támiyinlengen shańaraqlarǵa balalar napaqası qollanıladı. Bunda, balalar napaqasın tayınlawda:
- esapqa alınatuǵın balalar jası 14 jastan 18 jasqa shekem asırıladı;
- tólem múddeti 6 aydan 12 ayǵa shekem asırıladı;
- onıń muǵdarı shańaraqtaǵı balalar sanınan kelip shıǵıp belgilew tártibi qollanılatuǵınlıǵı belgilengen edi.
Usı párman talapların orınlaw maqsetinde Ózbekstan Respublikası Ministrler Kabinetiniń 2021-jıl 21-oktyabr kúngi «Xalıqtı sociallıq qorǵaw sistemasın jánede jedellestiriw is-ilájleri haqqında»ǵı 654-sanlı qararı qabıl etilip, usı qarar menen «Kem támiyinlengen shańaraqlardı «Sociallıq qorǵaw birden-bir reestri» málimleme sisteması arqalı anıqlaw, olarǵa kem támiyinlengen shańaraqlar balaları ushın napaqa hám materiallıq járdem tayınlaw hám tólew tártibi haqqında»ǵı Reje tastıyıqlanǵan bolıp, oǵan kóre:
2022 jıldan baslap – shańaraqtıń hár bir aǵzasına jámi bir aylıq ortasha dárámat minimal tutınıwshı qárejetleri muǵdarınan aspaǵanda kem támiyinlengen dep tán alınadı.
Bunda shańaraqtıń dárámatları kem támiyinlengenlik kriteriyasına muwapıqlıǵın anıqlawda minimal tutınıwshı qárejetlerdiń jańa muǵdarı Statistika agentligi tárepinen rásmiy járiya etilgen aydan keyingi aydıń 1-sánesinen baslap balalar napaqası hám materiallıq járdem tayınlaw ushın usınılǵan arzalarǵa qollanıladı.
Balalar napaqası hám materiallıq járdem usı Rejede belgilengen tártipte shańaraq aǵzalarınıń usınılǵan arzalarına tiykar «Birden-bir reestr» AT arqalı kem támiyinlengen shańaraq dep tán alınǵannan soń tayınlanadı.
Kegeyli rayonı Ádillik bólimi
Yuridikalıq xızmet kórsetiw orayı
bas yuriskonsultı Salamat BAZARBAEV