Янгиликлар
26
Perzentin nızamsız diniy bilim alıwǵa tartqanlıq ushın hákimshilik juwapkershilik belgilendi
Keyingi jıllarda mámleketimizde balanıń bilim alıw huqıqı kepilliklerin bekkemlew, bilimlendiriwge tiyisli xızmetlerdiń xalıq aralıq standartlar tiykarında kórsetiliwin shólkemlestiriw, balalardıń ruwxıy hám fizikalıq jaqtan jetilisiwine kómeklesiw boyınsha bir qatar ilajlar ámelge asırılıp atır.
Balalardıń ulıwma orta, orta arnawlı bilimlendiriw yamasa baslanǵısh professional bilim alıwın támiyinlewde, olardıń intellektuallıq, ruwxıy hám fizikalıq jaqtan jetilisiwi ushın shárayatlar jaratıwda ata-analardıń yamasa olardıń ornın basıwshı shaxslardıń ornı óz aldına áhmiyetke iye.
Sol sebep penen ata-analardıń hám olardıń ornının basıwshı shaxslardıń balaların oqıtıwǵa baylanıslı minnetlemelerin orınlaw barısındaǵı juwapkerligin kúsheytiw, sonıń menen birge balanıń bilim alıw huqıqı kepilliklerin támiyinlew maqsetinde Ózbekstan Respublikası Hákimshilik juwapkershilik haqqındaǵı kodeksine hám de «Bala huqıqlarınıń kepillikleri haqqında»ǵı Ózbekstan Respublikası nızamına qosımsha hám ózgerisler kiritilip atır, yaǵnıy 2025-jıl 20-fevraldaǵı «Ózbekstan Respublikasınıń ayırım nızam hújjetlerine bala huqıqları qorǵalıwın elede bekkemlewge qaratılǵan qosımsha hám ózgerisler kirgiziw haqqında»ǵı ÓRN-1035-sanlı Ózbekstan Respublikasınıń Nızamı qabıl etildi.
Bul nızam, balanıń bilim alıw huqıqı kepilliklerin támiyinlewge hám de onıń bárkámal shaxs bolıp jetisiwine xızmet etedi.
Nızam menen «Bala huqıqlarınıń kepillikleri haqqında"ǵı nızamǵa kirgizilgen qosımshaǵa kóre, ata-analar yamasa olardıń ornın basıwshı shaxslar óz balasın jeke isenimlerine muwapıq diniy hám ádep-ikramlılıq jaqtan tárbiyalaw huqıqına iye ekenligi, olar tárepinen óz balasın nızamǵa qayshı túrde diniy bilim alıwǵa tartıwǵa, yaǵnıy balanı dizimnen ótkerilmegen yamasa licenziyaǵa iye bolmaǵan shólkemlerge yamasa arnawlı diniy maǵlıwmatqa iye bolmaǵan hám diniy shólkemlerdiń Ózbekstan boyınsha oraylıq basqarıw uyımınıń ruxsatısız diniy bilimlendiriwdi ámelge asırıp atırǵan shaxslarǵa diniy bilim alıw ushın tapsırıwǵa jol qoyılmaytuǵınlıǵı belgilendi.
Ózbekstan Respublikası Hákimshilik juwapkershilik haqqındaǵı kodekske kirgizilgen qosımshaǵa kóre, ata-analar yamasa olardıń ornın basıwshı shaxslar tárepinen óz balasın nızamǵa qayshı túrde diniy bilim alıwǵa tartıw bazalıq esaplaw muǵdarınıń 5 esesinen 10 esesine shekemgi muǵdarda járiyma salıwǵa sebep bolatuǵını belgilendi.
Sonday-aq, usı huqıqbuzarlıq hákimshilik jaza sharası qollanılǵannan keyin bir jıl dawamında qayta ámelge asırılsa bazalıq esaplaw muǵdarınıń 10 esesinen 15 esesine shekemgi muǵdarda járiyma salıwǵa yamasa 15 sutkaǵa shekemgi múddetke hákimshilik qamaqqa alıwǵa sebep bolıwı belgilendi.
Taxtakópir rayonı ádillik bólimi
Yuridikalıq xızmet
kórsetiw orayı bas yuriskonsultı D.Shaxanov