Янгиликлар
25
Bir múrájat izinen
Shomanay rayonı ádillik bólimine puqara B.Djnıń Ádillik ministrligine murojaat.gov.uz arqalı Shomanay qánigelestirilgen mámleketlik toǵay xojalıǵında islegen dáwirlerdegi is haqıların óndirip beriwde ámeliy járdem beriwdi sorap jollaǵan múrájatı kelip tústi.
Anıqlanıwınsha, puqara B.Djnıń Shomanay qánigelestirilgen mámleketlik toǵay xojalıǵınıń 16.10.2023-jılǵı 192-13-193-ÓX/2023-sanlı buyrıǵına tiykar “shopan” lawazımına jumısqa qabıl qılınǵanlıǵı hám de xojalıqtıń 21.05.2024-jıldaǵı 74-13-193-ÓX/2024-sanlı buyrıǵına tiykar jumıstan bosatılǵanlıǵı málim boldı.
Úyreniw dawamında, puqara B.Djnıń haqıyqatta islegen 2024-jıldıń yanvar-may ayları ushın jámi 7 386 470 sum muǵdarındaǵı aylıq is-haqıları usı kúnge shekem tólenbegenligi anıqlandı.
Ózbekstan Respublikası Miynet kodeksi 243-statyasında miynetke haqı tólew jumıs beriwshi tárepinen xızmetkerge onıń miyneti ushın tólemler belgilew hám olardı ámelge asırıw júzesinen miynet shártnaması tárepleri ortasındaǵı miynet haqqındaǵı nızamshılıq, miynet haqqındaǵı basqa huquqıy hújjetler hám miynet shártnaması menen tártipke salınatuǵın múnásebetler sisteması dep kórsetilgen.
Usı Kodekstiń 244-statyasında miynet haqqındaǵı nızamshılıqta xızmetkerlerdiń miynetine haqı tólew tarawındaǵı tómendegi tiykarǵı kepillikler názerde tutılǵan:
…jumıs beriwshiniń óz finanslıq jaǵdayına qaramastan, nızamshılıqta, miynet haqqındaǵı basqa huquqıy hújjetlerde, miynet shártnamasında belgilengen miynetke haqı tólewdiń shártlerine muwapıq xızmetkerler tárepinen ámelge asırılǵan jumıs ushın haqı tólewdi ámelge asırıw májbúriyatın bekkemlep qoyıw;
is haqını tólew tártibi hám múddetlerine tiyisli talaplardı tártipke salıw;
xızmetkerlerge is haqı óz waqtında tóleniwin támiyinlew dep belgilengen.
Sonday-aq, joqarıdaǵı Kodekstiń 254-statyasında miynet shártnaması biykarlanǵanda jumıs beriwshiden xızmetkerge beriliwi kerek bolǵan barlıq summalardı tólew xızmetker menen dúzilgen miynet shártnaması biykar qılınǵan kúni ámelge asırıladı. Eger xızmetker miynet shártnaması biykar qılınǵan kúni islemegen bolsa, tiyisli summalar usı xızmetker tárepinen esap-kitap qılıw haqqındaǵı talap usınılǵannan keyin úsh kúnnen keshiktirmey tóleniwi kerek dep belgilengen.
Joqarıda belgilep qoyılǵanlarǵa kóre, Shomanay rayonı ádillik bólimi tárepinen puqara B.Djnıń mápinde Shomanay qánigelestirilgen mámleketlik toǵay xojalıǵına tólenbey qalǵan is haqılardı tólep beriw boyınsha orınlanıwı májbúriy bolǵan usınıs kiritildi hám puqaraǵa tiyisli tólemler tólep beriliwi támiyinlendi.
Shomanay rayonı ádillik bólimi
baslıǵı w.w.a Sh.Shadıbekov